Ленингоры районы Цъинагары хъæуы культурæйы хæдзары хореографион ансамбль «Арвырон» хайад райста Хъæрæсе-Черкессийы сырæзтыл 100 азы сæххæсты боны цытæн Цæгат Кавказы сывæллæтты аивадон сфæлдыстады фестиваль «Зори Кавказа»-йы. Фестиваль уагъд цыд 13-15 майы. Ансамбль акафыд «Хонгæ» æмæ «Сиргæ». «Арвырон»-ы аивадон къухдариуæггæнæг Гуссойты Ласкойы сæргълæудæй æвзонг æххæстгæнджытæ равдыстой ирон культурæйы рæсугъддзинад.
Гуссойты Ласко нын радзырдта сывæллæттимæ йæ балцы тыххæй: «Фестивалмæ акодтам ансамблы дæс хайадисæджы. Сценæмæкæсджытæ нæ хъармæй райстой, тыхджын къухæмдзæгъдимæ. Мæнмæ гæсгæ сæ зæрдæмæ фæцыдис нæ архайд. Стæй æнæуый дæр æввахс стæм кæрæдзимæ, кæрæдзийы культурæ æмбарæм. Фестивалмæ ацыдыстæм нæ Культурæйы министрады фæрцы æмæ сын бузныг зæгъын. Уымæй дарддæр ма мæ фæнды раарфæ кæнын Ленингоры районы администрацийы культурæйы хайады сæргълæууæг Битарты Бессарионæн ацы балцмæ йæ хайбавæрды тыххæй. Алцы дæр уыд хорз. Хорз æмвæзадыл ацыд фестиваль. Æмæ ма мæ сæрмагондæй раарфæ кæнын фæнды, Хъæрæсейы зæххыл не ‘мбæстæгтæй чидæриддæр ис, уыдонæн. Сæрмагондæй мæ уæлдай бузныджы ныхæстæ зæгъын фæнды Хуыгаты Эдуардæн. Уый у УФ-йы сгуыхт артист, Хъæрæсейы адæмон артист æмæ Хуссар Ирыстоны сгуыхт артист. Тынг хорз ныл сæмбæлд, йæ ансамблы хайадисджытæ сты нæ сывæллæтты æмцахъхъæнтæ. Сывæллæтты ансамбль ын ис Кавказы. Æмæ нын уым, æртыккаг бон фæстæмæ куы цыдыстæм, уæд йæхи хъæппæрисæй сорганизаци кодта чысыл равдыст, гæнæн ис афтæ зæгъæн дæр æмæ нын ауагъта мастер-кълас. Сывæллæтты зæрдæмæ дæр фæцыдис. Фембæлдыстæм ансамбль «Ритмы гор»-ы къухдариуæггæнæг, РЦИ-Аланийы адæмон артист Карсанты Мæхæмæтимæ дæр. Мæнмæ гæсгæ нæ сывæллæттæн уый дæр уыдис стыр урок. Ахæм зынгæ адæмимæ кæй фембæлдыстæм, уый стыр ахъаз фæуыдзæн нæ сывæллæттæн, кæд сæ сомбоны алчи артист не суа, уæддæр сæ бахъуыды кæндзысты цæрæнбонтæм».
Ленингоры районы администрацийы культурæйы хайады сæргълæууæг Битарты Бессарионы ныхæс-тæм гæсгæ, сценæмæкæсджытæ ирон хайадисджытыл æмбæлдысты тыхджын къухæмдзæгъдимæ. «Ахæм мадзæлтты нæ коллективы хайадист ахъаз кæны æвзонг курдиаттæ раргом кæнынæн. Ан-самблы уæнгтæ райгонд сты сæ къухдариуæггæнæг Гуссойты Ласкойæ, семæ æвæллайгæ куыст кæй кæны æмæ сын республикæйæн æддейæ стыр аудиторийы раз сæ арæхстдзинад равдисыны фадат кæй фæвæййы, уый тыххæй», – банысан кодта Битарты Бессарион.
Æдæппæт фестивалы хайад райстой 500 æвзонг артисты бæрц Уæрæсейы алы къуымтæй, Хъырым, Краснодар æмæ Ставрополы крайтæй, Республикæ Дагъыстан, Мæхъæл, Хъалмыхъ, Кæсæг-Балхъар, Цæгат Ирыстон, Ростовы област, афтæ Абхаз, Республикæ Хуссар Ирыстон æмæ æндæртæй.
Банысан кæнын хъæуы уый дæр, æмæ ансамбль «Арвырон» 2020 азы та хайад кæй райста æппæт-уæрæсейон фестивалтæ «Рождественская елка» æмæ «Казачий круг»-ы æмæ сын дыууæ фестивалы дæр кæй уыд хорз æнтыстытæ. Ныр дæр ансамблы арæхстдзинадæн скодтой æмбæлон аргъ. Хорзæхджын æрцыд фестивалы дипломтæй.
«Мах бакастыстæм сывæллæтты сфæлдыстадмæ, кæцыйæн нæй арæнтæ. Æппæт рæстæджыты дæр музыкæ, кафт æмæ зарджытæ иу кодтой адæмы. Бузныг нæ уазджытæн ахæм диссаджы бæрæгбоны тыххæй, ирд эмоцитæ æмæ æнæферохгæнгæ уысмтæ. Нæ ног фембæлдмæ!», – ныффыста йæ официалон телеграмм каналы Хъæрæсе-Черкессийы сæргълæууæг Рашид Темрезов.
Джиоты Е.
Comments are closed, but trackbacks and pingbacks are open.