Раздæр азты мыхуыр парахат кæнынæн цы стыр гæнæнтæ уыд, уый хистæр фæлтæрæй чи нæ хъуыды кæны. Газеттæ рафыссæн уыд суанг фæсарæнтæм дæр. Нæхи бинонтæ сæ царды бонты Гуырдзыстоны регион Къахеты цæргæйæ, фыстой газеттæ «Рæстдзинад» æмæ «Советон Ирыстон», журналтæ «Фидиуæг» æмæ «Мах дуг».
Фæлæ уыцы амондджын рæстæг раджы аивгъуыдта. Мыхуырæн раздæры кад нал ис, уæлдайдæр, интернеты бастдзинад куы фæзынд, уæдæй фæстæмæ. Уæрæсейы пост чысыл республикæты мыхуыры куысты фарстатæ йæхимæ райста æмæ йæ куыд фæнды, ахæм æргътæ æвæры. Нал сæм ис паддзахадон цæстдард. Æхгæд æрцыд «Союзпечать». Газет ма чи уарзы, уыдонæй дæр алкæй бон нал у сæ рафыссын, ахæм зынаргъ систы. Иунæг фæрæз ма сын баззад: газеттæ уæйгæнæг киоскты-иу æй асламмæ рафыстой æмæ йæ уырдыгæй хастой. Фæлæ та уыцы киосктыл дæр сæрæнтæ фæхæлоф кодтой æмæ сæ сæхи бакодтой. Райдианы ма дзы уæй кодтой, стæй йын чи йæ товар раивта, чи бынтондæр систа. Цалдæр азы адæм хъаст кæнынц, нал дæр сын киоскты газет рафыссæн ис, нал дæр æй кæм балхæной, уый ис.
Уыдæттæ нымайгæйæ, Цæгат Ирыстоны Мыхуыр æмæ дзыллон коммуникациты комитет бакуыста ног проектыл «Развитие средств массовых информаций, массовых коммуникаций, книгоиздания на период до 2025 года». Проекты нысан у, цæрджыты домæнтæ æххæстгæнгæйæ, хæрзвадат административон-экономикон уавæртæ саразын, хъæугæ информаци æнæкъуылымпыйæ райсынæн, Уæрæсейы иумæйаг информацион тыгъдад бахъахъхъæнын æмæ фæхъомысджындæр кæнын.
Ацы ног проекты фæлгæты уал ивгъуыд аз Дзæуджыхъæуы фæзынд нырыккон домæнтæн дзуапп чи дæтты, ахæм дыууæ киоскы. Уыдоныл ма æрæджы бафтыд фондз – Мæздæджы, Дыгуры, Рахизфарсы, Горæтгæрон æмæ Кировы районты. Уыцы куыст дарддæр цæуы Алагиры, Æрыдоны æмæ Æрæфы районты. Алы районы дæр хъуамæ уа иу киоск.
Ног киосктæ сты стыр, дуканиты æнгæс. Газеты продукцийæ уæлдай сæ асламмæ дæр балхæнæн ис журналтæ, чингуытæ, ирон сувениртæ, фыссæнгæрзтæ, кофе, цай, адджын дæттæ… Саразæн дзы ис ксерокопи, бафидæн дзы ис цыдæр лæггæдтæн. Уымæн æмæ ныртæккæ афтид мыхуыры фæрæзтæй базарадон кусæндон йæхи нæ фæдардзæн.
Ацы ног киоск-дуканитæ сты рауагъдад «Ир»-ы дæлбар æмæ стыр удæнцой сты мыхуыргонд дзырд чи уарзы, уыцы адæмæн.
Комитетæй куыд фехъусын кодтой, афтæмæй киоскты арæзтад алы цæрæн бынæттыл нæ аххæсдзæн, стæй йæ хæрдзтæ дæр не ʻмбæрзы æмæ уымæн дæр æрхъуыды кодтой æндæр амал: районты, хъæуты посты хайæдты арæзт цæудзæн сæрмагонд тематикон стендтæ киоскты кæй уæй кæнынц, ахæм продукциимæ. Уым алкæй бон дæр уыдзæн ирон мыхуырæй дарддæр уæлдæр амынд продукци балхæнын.
«Ацы киосктæн ма сæ хорздзинад уый мидæг ис æмæ сæ иуæй-иуты раздæрау асламмæ рафыссæн уыдзæн канд республикон нæ, фæлæ центрон мыхуыр дæр. Уымæй дарддæр арзт цæудзæн алыхуызон конкурстæ газеттæ æмæ журналтæ рафыссыны тыххæй. Ацы проектæй мах фæнды советон системæйæ иу гыццыл хай уæддæр раздахын æмæ уый нæ къухы æфты: æдзух исæм арфæтæ хицауад æмæ цæрджытæй, мах та уымæй стырдæр хорзæх нæ хъæуы. Цавæрфæнды рæстæг æрцæуæд, уæддæр дзы мыхуыргонд дзырдæн аргъ нæй. Йæ бахъахъхъæнын та у нæ хæс», – загъта Мыхуыры комитеты сæрдары хæдивæг Гæбæлаты Мæдинæ.
ДЖУСОЙТЫ Нинæ
