Зынгæ ахуыргонд-иранист, филологон зонæдты доктор, профессор, Хуссар Ирыстоны зонæдты сгуыхт архайæг, Хетæгкаты Къостайы номыл паддзахадон премийы лауреат, РХИ-йы Кады ордены кавалер Гæбæраты Никъала Ясоны фырты райгуырдыл абон, 13-æм январы, сæххæст 100 азы.
Ахуыргонды райгуырæн боны цытæн горæт Цхинвалы Галаты Барисы хæдзар-музейы уыд мысæн изæр. Сорганизаци йæ кодтой Никъалайы фырт Андрей æмæ йæ цардæмбал Гаглойты Лианæ. Никъала уыд Галаты Барисы сиахс. Йæ цардæмбал Зарифæ уыд Галайы фырты цардæмбал Нинæйы хæрæфырт. Мадзалмæ æрбацыдысты зонад-иртасæн институты æмæ интеллигенцийы минæвæрттæ, афтæ ма æндæр уазджытæ.
Хæдзар-музейы музыкалон уазæгдоны стъолыл æвæрд уыдысты Никъалайы фыст чингуытæ, куыд зæгъæм, «Афтæ цæмæн дзурæм», «Морфологическая структура слова и словообразование в современном осетинском языке», «Ирон æвзаджы æмбарынгæнæн дзырдуат»-ы 1 æмæ 2-аг томтæ, астæуккаг скъолатæн цы ахуыргæнæн чингуытæ сарæзта, уыдон, афтæ ма йæхи фыст æмæ йæхиуыл фыст уацтæ æмæ бирæ æндæр æрмæджытæ. Стеллажтыл та уыдысты ахуыргонды тыххæй фыст чингуытæ æмæ йын йæ коллегæтæ автографтимæ цы чингуытæ балæвар кодтой, уыдон.
Гаглойты Лианæйы ныхæстæм гæсгæ, уыдон фæнд кæнынц чингуыты зонад-иртасæн институты библиотекæйæн балæвар кæнын.
Фембæлдмæ æрбацæуджытæ байхъуыстой цалдæр азы размæ Гæбæраты Никъала Екатеринбургы паддзахадон университеты ректораты фæхуындмæ гæсгæ, студенттæн нырыккон уырыссаг æвзагæй цы цымыдисон лекци бакаст, уымæ.
Ахуыргонд РХИ-йы паддзахадон телерадиокомпани «Ир»-ы уагъта сæрмагонд алæвæрд «Не ‘взаг – нæ хæзна», зæгъгæ. Æрæмбырдуæвджытæ стыр цымыдисæй байхъуыстой уыцы алæвæрдтæй цалдæрмæ. Уый дзырдта, зæгъгæ, æнæ æвзаг дуне нæ цæры. Адæм, зæгъ, се ‘взаг куы фесафой, уæд наци нал уыдзæн. Адæмы, дам, æвзаг иу кæны.
Йæ фырт Гæбæраты Андрей банысан кодта: «Ирон æвзаджы æмбарынгæнæн дзырдуат»-ыл Никъала йæ коллегæтимæ фæкуыстой 40 азы бæрц æмæ абоны онг 4 томæй мыхуыры рацыд æрмæстдæр дыууæ томы. Иу хорз уыд æмæ уыцы дыууæ томы рухс федтой йæ удæгасæй. Фæлæ æнхъæлмæ кæсæм иннæ дыууæ томы рацыдмæ дæр. Мæ фыдæй хъæр ныхас никуы фехъуыстон. Архайдта, цæмæй ирон æвзаг æххæстæй сахуыр кодтаиккам. Зыдта цалдæр æвзаджы: ирон, уырыссаг, зæронд-славяйнаг, гуырдзиаг, англисаг æвзæгтæ. Хорз уаид уый дæр, æмæ бирæ азты дæргъы цы кабинеты фæкуыста, уым бахъахъхъæд куы æрцæуиккой йæ кусæн стъол æмæ æндæр дзаумæттæ. Афтæмæй дзы рауаид мемориал æмæ йын йæ ном сæнусон кæниккам».
Музыкалон уазæгдоны ма æвæрд уыд Никъала йæ диссертаци йæхæдæг цы мыхуыргæнæн машинкæйыл ныммыхуыр кодта, уый дæр.
Зонад-иртасæн институты зонадон кусæг Квагинидзе Жаннæ загъта: «Ныр 10 азмæ æввахс нæ фарсмæ нал ис нæ куырыхон хистæр Гæбæраты Никъала. Нал ын хъусæм йæ уæздан ныхас, фæлæ йæ ном махæй рох нæу. Хатт цыма йæ хъæлæс мæ хъустыл ауайы, афтæ мæм фæкæсы. Йæ ном цæры йæ коллегæты зæрдæты, йæ зонадон куыстыты. Йе студенттæ, йæ бирæ зонгæтæ йын мысынц йæ уæздан, хуымæтæджы ныхас. Уый у 100 фылдæр зонадон куыстыты æмæ дæсгай монографиты автор».
Фембæлды хайадисджытæ лекцитæм байхъуысыны фæстæ сæ хъуыдытæ загътой кæрæдзийæн. Бакастысты профессоры фыст уацау «Сыкъа», кæцы мыхуыры рацыдис 2006 азы журнал «Фидиуæджы». Никъала тынг æмбæрста юмор. Бакастысты йын йæ пародитæ дæр, кæцыты уый мыхуыр кодта Пиранты Миккайы псевдонимы бын. Фембæлды онлайнрежимы хайад райста Цæгат Кавказы хæххон-металлургион институты ахуыргæнæг Захъаты Белæ.
Мадзал рауад цымыдисон æмæ дзы йæ хайадисджытæ райгондæй баззадысты.
Гаглойты Лианæйы ныхæстæм гæсгæ, не ‘мбæстæгтæй кæй бафæнда Гæбæрайы фырты цардвæндаг æмæ сфæлдыстадимæ базонгæ уæвын, уый, табуафси, æрбацæуæт Галаты Барисы хæдзар-музеймæ.
ДЖИОТЫ Екатеринæ
