17-æм майы Хуссар Ирыстоны паддзахадон университеты фыццаг хатт музейы этнографийы залы адæмы рæгъмæ рахастой зæххы къахæггæгты хуызæгтæ, кæцыты ссардтой Хуссар Ирыстоны территорийыл. Ацы хъуыддагмæ чи цымыдис кæны, уыцы адæмæн музейы ног равæргæ экспонаттæ уыдзысты цымыдисон.
Ныртæккæ музейон комплексы Ирыстоны историйы залы æвæрд сты æндæр æмæ æндæр æнустæй суанг ныртæккæйы дуджы онг алыгъуызон экспонаттæ. Уый та радон хатт зæрдыл æрлæууын кæны нæ рагфыдæлты цардуаг æмæ истори. Музейон комплексы ма фенæн ис кусæгон инструментты уникалон коллекци, зæгъæм, Уæрæсейы революцийы агъоммæйы периодæй. Абон уыцы предметтæ, уæлдайдæр музейтæм арæх чи нæ цæуы, уыдонæй сты рох æмæ ныр университеты ацы мадзал фадат дæтты, уыдон ногæй базонын æмæ сæ зæрдыл æрлæууыны тыххæй. Адæмæн ма цымыдисон уыдзысты æхсæнгарзы экспонаттæ, Стыр Фыдыбæстæйон хæсты тыххæй сæрмагонд къуым æмæ бирæ æндæр цымыдисон æрмæг.
Университеты музейон комплексы зоологийы хайад дæр у тынг цымыдисон, ам та фенæн ис нæ республикæйы цы сырдтæ æмæ цъиутæ цæры, уыдоны быдыргътæй 50-йæ фылдæр экспонаты. Уæдæ хуызфыссынады аивадæн чи табу кæны, уыцы адæмæн дæр музейон комплексы равдыстыты залы ис бирæ зындгонд нывгæнджыты цымыдисон нывтæ, афтæ ма хицæн авторты куыстытæ, уыдон нымæцы куклæты коллекци.
Музейты боны мадзалмæ бацæуын адæмæн уыд æнæаргъæй, уымæй дарддæр ма университет сæ уазджыты сбуц кодтой цай æмæ адджинæгтæй.
Нæ уацх.
