МИДХЪУЫДДÆГТЫ МИНИСТРАД ХЪУСЫН КÆНЫ

4-æм июлæй 12 июлмæ Хуссар Ирыстоны территорийыл æрцыдис дыууæ фыдракæнды æмæ раргом сты. Наркотикон буарадтӕй ӕнӕзакъонӕй спайда кӕныны тыххӕй урӕд ӕрцыдысты цалдӕр ӕмбӕстаджы. Уымæй уæлдай ма республикӕйы фӕндӕгтыл ӕрцыдис цыппар фæндагон-транспортон цауы. Авариты фæстиуæгæн рынчындонмæ алыгъуызон цæфтимæ бахаудтой æртæ адæймаджы.

Алыгъуызон бархалынæдты фӕдыл бӕрндзинадмӕ конд ӕрцыдысты æртæ адӕймаджы.

Фæндагон змæлды æдасдзинады инспекци къуырийы дæргъы сбæлвырд кодта 212 фæткхалæн цауы. Уыдонæй 9 уыдысты нозтджынæй машинæ скъæрыны цаутæ.

Милицийы наркотикты ӕрзылдыл контроль кӕныны управленийы кусджытӕ оперативон информацийы фæдыл басгæрстой Цхинвалы районы Зары хъæуы 55-аздзыд цæрæджы хисæрмагонд хæдзар. Басгæрсты рæстæджы цæхæрадоны ссардтой 128 гæны къутæры. Уымæй уæлдай ма сыхаджы цæхæрадоны дæр ссардтой 30 гæны къутæры æмæ куыд рабæрæг, афтæмæй уыдоны дæр байтыдта ацы адæймаг. Фыдгæнæгыл баконд æрцыд уголовон хъуыддаг.

7 июлы милицийы наркотикты ӕрзылдыл контроль кӕныны управленийы кусджытӕ ма оперативон информацийы фæдыл басгæрстой горæты 63-аздзыд адæймаджы хисæрмагонд хæдзар æмæ цæхæрадоны ссардтой 15 гæны къутæры. Фыдгæнæгыл баконд æрцыд уголовон хъуыддаг.

Милицийы кусджытæ ма басгæрстой Цхинвалы 28-аздзыд цæрæджы хисæрмагонд хæдзар æмæ цæхæрадоны ссардтой 2 гæны къутæры. Ленингоры районы милицийы фæдагуырды кусджытæ та басгæрстой бынæттон 72-аздзыд цæрæджы хисæрмагонд хæдзар æмæ цæхæрадоны ссардтой 6 гæны къутæры.

8 июлы милицийы патрулон экипаж горæты баурæдта зæрдæх-сайгæ автомашинæ «BMW», кæцыйы шофыр разынд Дзауы районы 31-аздзыд цæрæг. Басгæрсты рæстæджы милицийы кусджытæ машинæйы салоны ссардтой гæххæттæй тыхтон, кæцыйы мидæг разынд гæны ссадæг. Горæт Цхинвалы тæрхондон фæткхалæджы фæивар кодта.

Милицийы наркотикты ӕрзылдыл контроль кӕныны управленийы кусджытӕ ма баурæдтой горæттаг 40-аздзыд цæрæджы, кæцы спайда кодта наркотикон буарадтæ «метадон» æмæ «марихуана»-йæ. Фæткхалæджы бартæ горæт Цхинвалы тæрхондон æриста иу мæйы æмгъуыдмæ. Уымæй уæлдай ма баурæдтой 44-аздзыд горæттаг цæрæджы, кæцы нæ бакуымдта медицинон басгæрстмæ æмæ йæ тæрхондон фæивар кодта.