4 сентябрæй 11 сентябрмæ Хуссар Ирыстоны территорийыл æрцыдис 4 фыдракæнды æмæ дзы 3 раргом сты. Наркотикон буарадтӕй ӕнӕзакъонӕй спайда кӕныны тыххӕй урӕд ӕрцыдысты цалдӕр ӕмбӕстаджы. Республикæйы фæндæгтыл æрцыдис иу фæндагон-транспортон цау. Аварийы фæстиуæгæн рынчындонмæ алыгъуызон цæфтимæ бахаудтой 3 адæймаджы.
Алыгъуызон бархалыны фæдыл горæты милицийы управленийы кусджытæ бæрндзинадмæ æркодтой цыппар адæймаджы.
Фæндагон змæлды æдасдзинады инспекци къуырийы дæргъы сбæлвырд кодта 316 фæткхалæн цауы. Уыдонæй 14 уыдысты нозтджынæй машинæ скъæрыны цаутæ.
4 сентябры фæндагон змæлды æдасдзинады инспектортæ Цхинвал-Ленингоры фæндагы 1-æм километры баурæдтой автомашинæ «ВАЗ-21093», кæцыйы шофыр фехæлдта фæндагон фæткойтæ. Басгæрсты рæстæджы автомашинæйы бæлццон, 34-аздзыд горæттаг цæрæг, къухæй цалдæр хатты ныццавта автоинспекторы. Бынатмæ ссыдысты ОМОН-ы кусджытæ æмæ æрцахстой фыдгæнæджы дæр æмæ шофыры дæр, кæцытæ разындысты нозтджын.
5 сентябры милицийы кусджытæ Ногхъæуы баурæдтой зæрдæхсайгæ автомашинæ, кæцыйы шофыр спайда кодта марихуанайæ.
7 сентябры Ленингоры районы милицийы кусджытæ оперативон информацийы фæдыл басгæрстой Абреуы хъæугæрæттæ æмæ хуссар хайы ссардтой æмæ скуынæг кодтой 128 гæны къутæры.
7 сентябры Ленингоры районы Циры хъæуы 47-аздзыд цæрæг нозтджынæй дзырдта æнæуаг дзыхæй, лæбурдта æмæ къухæй цалдæр хатты ныццавта фæндагон инспекторы, кæцы патруль кодта Ленингоры поселочы. Фыдгæнæг ахст æрцыд æмæ йыл бакодтой уголовон хъуыддаг.
9 сентябры райсомæй Хъайтарты уынгæй Тæболты уынгмæ азилæны æрцыд фæндагон-транспортон цау. 19-аздзыд Къостайыхъæуы цæрæг нæ сарæхст йæ автомашинæ «ВАЗ-2107» скъæрын, ахызт светофоры сырх рухсыл æмæ сæмбæлд автомашинæ «Mersedes»-ыл, кæцыйы шофыр та разынд æнæххæст кары сывæллон, 17-аздзыд горæттаг цæрæг. Аварийы фæстиуæгæн дыууæ шофыры æмæ «ВАЗ-2107»-ы бæлццон, 20-аздзыд Къостайыхъæуы цæрæг, алыгъуызон цæфтимæ бахаудтой рынчындонмæ.
9 сентябры 25-аздзыд горæттаг цæрæг милицимæ барвæндонæй бахаста пистолет «Макарова» 8 нæмыгимæ, цæмæй уголовон бæрндзинадмæ конд ма æрцыдаид.
Цхинвалы районы милицийы кусджытæ баурæдтой горæттаг 25-аздзыд, 36-аздзыд æмæ Тбеты хъæуы 29-аздзыд, цæрджыты, кæцытæ спайда кодтой марихуанайæ. Баурæдтой ма 43-аздзыд горæттаг цæрæджы дæр, кæцымæ сæ зæрдæ фехсайдта наркотиктæй спайда кæнынмæ, фæлæ фæткхалæг нæ бакуымдта медицинон басгæрстмæ æмæ йæ уый тыххæй тæрхондон фæивар кæндзæнис. Милицийы наркотикты æрзылды контроль кæныны управленийы кусджытæ та баурæдтой 20-аздзыд Къостайыхъæуы цæрæджы, кæцы спайда кодта марихуанайæ.
