Нæ республикæйы æфсирон культурæтæ байтауынц Ленингор, Знауыр æмæ Цхинвалы районты фермерон æмæ хицæн хæдзарадты хоргуыстгæнджытæ.

Куыд иннæ азты, афтæ та ацы аз дæр фылдæр бафснаинаг ис Ленингоры районы зæхкусæг хæдзарадтæн æмæ уыцы куыст цалдæр къуырийы размæ райдыдта фыццагдæр ацы ран. Тыллæгæфснайæн комбайнтæ сæм  æдæппæт ис цыппар, уыдонмæ фæлтæрд комбайнертæ дарынц аудгæ ахаст æмæ уый фæстиуæгæн куыстыты сезонмæ сты æххæст цæттæ.

Бригадир Габиты Хвича хъæууонхæдзарадон техникæйыл рагæй кусы æмæ йæ разамындæй иннæты дæр разæнгард кæны къухты фылдæр æнтыст бафтын кæнынмæ. Уымæ гæсгæ сæ алчидæр æнкъары фылдæр бæрндзинад æмæ иумæйаг тыхтæй архайынц хойрагон культурæтæ цыбыр æмгъуыдтæм бабæстон кæныныл. Куыд радзырдта, афтæмæй  сын æдæппæт æркæрдинаг ис 900 гектары, уыцы нымæцы хъæбæрхор – 800 га, иннæ та у фæззыгæнд мæнæу.

Сæйраджыдæр æфсирон культурæтæ байтыдтой Цъинагар, Орчъосан æмæ Аб-реуы зæххыты æмæ уал дзы бафснайдтой се ‘мбисæй фылдæр. Кæрдыныл кусынц Габиты Хвича йæхæдæг, Хуриты Зураб, Мæргъиты Бесик æмæ Габиты Радик. Хоргуыстгæнджытæ уалдзæджы йæ рæстæгыл байтыдтой сæ зæххы фæзуæттæ, уый фæстæ æвзарты уындæй  рухс кодта адæймаджы зæрдæ, фæлæ сын фæстæдæр ратых кодтой мæгуырау боныгъæдтæ æмæ уымæ гæсгæ нæу зæрдæйы фæндиаг тыллæгæрзад.

Габийы фырт куыд радзырдта, афтæмæй тыллæгæфснайыны куыст ахицæн кæндзысты 10-14 кусгæ бонмæ æмæ уый фæстæ та сæ техникæ йæ куыст бакæндзæн республикæйы иннæ хæдзарадты. Æнæуый та зæгъын хъæуы, хойрагон культурæтæ æфснайынмæ кæй æрæвнæлдтой иннæ районты иуæй-иу хæдзарадтæ дæр.

                                                                      Хуыбиаты Никъала

Comments are closed, but trackbacks and pingbacks are open.