Инвестпрограммæйы фæлгæтты цы мадзæлттæ рахызт 2022 азæй 2023 азмæ, уыдонæй иу у республикæйы ног электронымайæнтæй сифтонг кæнын. Йæ нысан – электрохæххытыл электроэнерги дæттыны рæстæджы технологион сæфтытæ фæкъаддæр кæнын. Ацы æмæ æндæр фарстатыл дзырдта «Спутник»-ы тыгъдады Паддзахадон унитарон куыстуат «Энергоресурс – Южная Осетия»-йы ног сæргълæууæг Къæбысты Ацæмæз.
«Рухс фидыны дисциплинæ бæллиццаг нæу республикæйы. Электроэнерги сæфы хызæгтæй. Хардзгонд электроэнерги рационалонæй нымад нæ вæййы, уымæн æмæ иуæй-иутæ алыгъуызон махинацитæ кæнынц, цæмæй сæ рухс æмæ газы хæстæ ма фидой. Фиддонты дисциплинæ чи халы æмæ электроэнерги чи давы, уыдоны нымæц фæкъаддæр кæныны тыххæй райстой ацы программæ. Ныртæккæ цы ног нымайæнтæ æвæрæм, уыдон автоматикон æгъдауæй «Энергоресурс-Южная Осетия»-йы сервермæ дæтдзысты бахардзгонд электроэнергийы зонæнтæ. Уый хорз ахъаз уыдзæн, контролертæ нал зилдзысты хæдзари-хæдзар, электроэнергийы давдтытæ та фæкъаддæр уыдзысты. Ивгъуыд азы кæрон ахæм нымайæнтæ æвæрд æрцыд Шанхай æмæ Гудзабары. Ныр та сæ æвæрын райдайдзыстæм Цæрæн массивы. Цадæггай ифтонг æрцæудзысты районтæ се ‘ппæт дæр. Уый фæстæ та дæрддзæф хъæутæм дæр», – загъта «Энергоресурс – Южная Осетия»-йы генералон директор.
Ног электронымайæнтæм цы хорздзинад ис, зæгъгæ, журналистты ацы фарстайæн ахæм дзуапп радта: «Фиддонтæ æгæр куы сбирæ уой, бæрæг лимитæй куы схизой, уæд абонент электрохызæгæй автоматикон æгъдауæй ахицæн уыдзæн. «Электрохызæджы» кусджытæ кæд систематикон æгъдауæй бамбарын кæнынц, фиддонтæ афоныл фидын хъæуы, зæгъгæ, уæддæр бирæтæ уыцы ныхæстæ мурмæ дæр не ‘рдарынц, цалынмæ сæ хъуыддаг тæрхондоны нæ аскъуыддзаг вæййы, уæдмæ. Ныр дæр абонентæн лæвæрд уыдзæн иу мæйы бæрц хатырон рæстæг, фæлæ æртæ мæйæ фылдæр куынæ бафида йæ фиддон, уæд ын хицæн æрцæудзæн йæ рухс», – дзырдта Къæбысы фырт.
«Энергоресурс – Южная Осетия»-ы куыстуатыл негативонæй æндавы, цæрджытæ рухс æмæ газæн кæй нæ фидынц, уыцы хъуыддаг.
Нæ адæмæн, æнæ электроэнерги у зын цæрæн, бахардзгонд рухс æмæ газæн та æнæфидгæ нæй. Ахæм бæстæ æмæ адæм нæй, кæм нæ фидынц сæ фиддонтæ. Хъуамæ алчи дæр бæрндзинад æнкъара Уæрæсейы Федерацийы раз», – дзырдта Къæбысты Ацæмæз.
Уый ма загъта, «Энергоресурс – Южная Осетия»-йы куыстуаты дæлбар арæзт кæй æрцæудзæнис ног бригадæ, кæцы бæрæг кæндзæн æмæ уыцы иурæстæг иуварс кæндзæн газы хæтæлты æдзæллаг уавæр. Уыцы куыстытæ араздзысты æнæаргъæй. Специалон бригадæ зилдзæн хæдзари-хæдзар, амындтытæ æмæ фæдзæхстытæ чи не ‘ххæст кæна, уыдон та кæндзысты ивар.
Уазæгты Марфа
Comments are closed, but trackbacks and pingbacks are open.