Завод «Эмальпровод»-ы куыст куы банымæг, уæд цадæггай бæстыхай дæр скæлæддзаг. Паддзахад хуыздæрыл банымадта, заводы цы цехтæ уыд, уыдон хицæн амалиуæггæнджытæн нардуат радтыныл. Ам конд æрцыд ахæм куыстуæттæ, куыд, зæгъæм, сæндуцæн мини-завод, агуыридуруадзæн куыстуат, профнастил уадзæн æмæ столярон цехтæ, афтæ ма пластикон мигæнæнты æмæ телуадзæн цехтæ.

2008 азæй фæстæмæ нæ республикæйы æнæкъуылымпыйæ æххæст цæуы арæзтадон куыстытæ, уыдон цæмæй бынæттон хомысæй уадзой хъæугæ æрмæджытæ. Фæлæ ам цы 19 куыстуаты конд æрцыд, уыдонæй ма абон кусынц æрмæст сæнуадзæн завод æмæ столярон цех.

Мах цымыдис кодтам, цæмæн сæхгæдтой агуыридуруадзæн завод, кæм ис ныртæккæ заводы генералон директор Бестауты Инал? Цæмæн у завод æхгæд, кæд æмæ куы байгом, уæд æй кусынæн цыдæриддæр хъуыд, уыдон самал кодта, цех бацалцæг кодта æмæ сæ сæвæрдта. Завод байгом кæнæн церемонийы уыдтæн мæхæдæг дæр, куыд журналист, афтæ. Мæхи цæстæй федтон куыд цыд агуыридуры цæттæгæнæн процесс. Кусджытæ куыд амыдтой, афтæмæй нæ республикæйы территорийыл ис, агуыридур цы хомысæй цæттæ кæндзысты уыцы змис. Бынæттон хомысæн, дам, йæ хорздзинад уый мидæг ис æмæ дзы æлыг ис 30 проценты, иннæ та у сыгъдæг змис. Уый, дам, у нормæ, кусын æмæ хорз продукци уадзынæн. Заводы директор Бестауты Инал та нын радзырдта, агуыридур куыд цæттæ цæуы. Фыццаг уал æй прессы рауадзынц, уый фæстæ йæ ныллыг кæнынц. Куы басур вæййы, уæд æй самайынц пецы æмæ йæ райдайынц фыцын дыууæ суткæйы дæргъы. Пецы тæвд сындæггай фылдæрæй-фылдæр скæнынц æмæ схæццæ вæййы иу мин градусмæ. Ахæм пецтæ заводы уыд æртæ. Сæ иу – æппæты стырдæр, уыцы-иу рæстæг уагъта 60 мин агуыридуры. Иннæ дыууæ уыдысты къаннæгдæртæ æмæ дзы цыд 35 мин агуыридуры. Пецтæ куыстой газæй æмæ электроны рухсæй. Нæ зæрды, дам, ис фæстæдæр стационарон пецтæ самал кæнын.

Заводы продукцийæ арæзтады спайда кодтой нæ горæты 3-аг скъола, уыцы азты цы бирæуæладзыгон хæдзæрттæ арæзтой, уым æмæ хицæн æмбæстæгтæ дæр сæ арæзтæдты. Завод йæ продукци зынаргъ нæ кодта, иу агуыридуры аргъ уыд дæс сомы, фæлæ заводы къухдариуæгад куыд дзырдта, афтæмæй сæ зæрды ис фæстæдæр ноджы фæасламдæр кæнын. Заводы разамынад ницæмæй хъаст кодта, æрмæст загъта, нырма кæй кусынц æххуырст техникæйæ, фæлæ куысты процессы рæстæджы уыдон дæр самал кæндзысты.

Ныртæккæ ацы куыстуатæн «Эмальпровод»-ы территорийыл цы минизавод ис, уый у æхгæд. Куыстуаты генералон директоры телефон та дзуапп нæ дæтты.

УАЗÆГТЫ  Марфæ

Comments are closed, but trackbacks and pingbacks are open.