Президент Гаглойты Алан хайад райста горæт Минводыйы Кавказаг инвестицион равдысты.
РХИ-йы делегацийы сконды уыдысты Хицауады Сæрдар Джуссойты Константин, Хицауады сæрдары дивæг – Экономикон рæзты министр Тадтаты Дзамболат, Хъæууон хæдза-рады министр Мæргъиты Алан, УФ-йы Республикæ Хуссар Ирыстоны Базарадон минæвар Таймураз Гогинов.
Пленарон æмбырды хайадисджытæ уыдысты УФ-йы Цæгат-Кавказаг федедералон зылды сæргълæуджытæ æмæ регионтæй уазджытæ.
Йæ раныхасы УФ-йы Хицауады Сæрдары хæдивæг Александр Новак банысан кодта мадзалы масштабондзинад, æмæ ныфс бавæрдта, Кавказаг инвестицион равдыст ног импульс кæй ратдзæн Ставраполы бæстæмæ инвестицитæ æрбаздахынæн.
Мадзалы ахсджиагдзинад банысан кодтой ЦКФЗ-ы УФ-йы Президенты Æххæстбарджын минæвар Юри Чайка æмæ Ставрополы крайы губернатор Владимир Владимиров.
БАЗАРАДОН-ЭКОНОМИКОН ФАДЫГ РÆЗЫН КÆНЫН
Президент Гаглойты Алан «МинводыЭКСПО»-йы фæзуаты фембæлд Республикæ Дагъыстаны сæргълæууæг Сергей Меликовимæ.
Президент банысан кодта, Хуссар Ирыстоны æмæ Дагъыстаны аккаг фырттæ фæрсæй-фæрстæм сæрмагонд æфсæддон операцийы зонæйы кæй тох кæнынц иумæйаг истори æмæ кæстæр фæлтæры ирд фидæн.
Гаглойты Алан бузныг загъта Сергей Меликовæн æмæ зæрдыл æрлæууын кодта, бирæнацион Дагъыстаны Республикæйы æфсæддонтæ хуссарирыстойнаг хъахъхъæнджытимæ 2008 азы кæй хъахъхъæдтой Хуссар Ирыстоны хæдбардзинад. Йæ ныхæстæм гæсгæ, Дагъыстаны Республикæ Хуссар Ирыстонæн бакодта зынгæ гуманитарон æххуыс.
Сергей Меликов, фæндон бахаста, цæмæй Гаглойты Алан бабæрæг кæна Дагъыстан, бынаты базонгæ уа кондадон куыстуæттимæ, сæйраджыдæр, агробизнесы фадыджы, æмæ иумæ æруынаффæ кæной æмгуыстады фадæттыл.
Уый ма йæ хъус æрдарын кодта æхсæнпарламентон æмгуыстады рæзтмæ.
«Мæн фæнды спорт, культурон бастдзинæдтæ, фæсивæдон политикæ, фæлтæрддзинад амонынимæ баст мадзæлттæ рæзын кæнын, афтæ ма сæрмагонд æфсæддон операцийы архайджыты бинонтæн æххуыс бакæнын», – загъта Дагъыстаны Республикæйы сæргълæууæг.
Йæ рады, Гаглойты Алан загъта, зæгъгæ, цæттæ кæй у конструктивон куыстмæ. Афтæ ма Президент банысан кодта, æфсымæрон республикæтæй хуыздæр фæлтæрддзинад исын кæй хъæуы рæстæгимæ иумæ рæзыны сæраппонд.
Фембæлды кæрон æруынаффæ кодтой базарадон-экономикон фадыджы æмархайды фарстатыл.
ÆХСÆНРЕГИОНАЛОН ÆМГУЫСТАДЫ РÆЗТ
Гаглойты Алан фембæлд Ставрополы губернатор Владимир Владимировимæ.
Æруынаффæ кодта базарадон-экономикон, ахуырадон, туристон фадгуыты æхсæнрегионалон æмгуыстады рæзты фарстатыл.
«Бузныг, нæ фыццаг форум нын кæй бабæрæг кодтай. Мæнæн тынг æхсызгон у демæ базонгæ уæвын. Ставрополы край æмæ Республикæ Хуссар Ирыстоны ‘хсæн рагæй ис хæларадон æмахастытæ, ам ахуыр кæнынц уæ студенттæ, мах сымахмæ цæуæм улæфынмæ. Æз мæхæдæг уыдтæн Хуссар Ирыстоны.
Мах кæддæриддæр цæттæ стæм æххуысмæ», – загъта Владимир Владимиров.
Гаглойты Алан банысан кодта, зæгъгæ, Ставрополы край периодикон æгъдауæй æххуыс кæны Хуссар Ирыстонæн æмæ раарфæ кодта губернаторæн.
Гаглойты Алан стыр аргъ скодта Ставрополы крайы инвестицион хъомысад, регионы аграрон секторы рæзты фадæттæн æмæ загъта, зæгъгæ, Хуссар Ирыстон фыццаг рады здæхт у агросæудæджерадон комплексы рæзтыл бакусыны ‘рдæм.
«Хорз уаид нæ ведомствоты ‘хсæн æнгомдæр æмархайд куы уаид, сæйраджыдæр, хъæууон хæдзарад æмæ Экономикæйы министрадты ‘хсæн. Мах æхсызгонæй пайда кæндзыстæм сымах уæ регионы рæзты тыххæй цы фæлтæрддзинадæй пайда кæнут, уымæй», – загъта уый.
Уымæй уæлдай ма, дыууæ фарсы банысан код-той бизнесы фадыджы æмгуыстады рæзты план. Губернатор бамбарын кодта, цæттæ кæй у Хуссар Ирыстонмæ бизнесы рæзт æмæ хъуыддагон бастдзинæдтæ æрбæстон кæныны фарстаты тыххæй специалистты къорд арвитынмæ.
***
Президент Гаглойты Алан фембæлд УФ-йы Хицауады Сæрдары хæдивæг Александр Новак, УФ-йы Экономикон рæзты министр Максим Решетников æмæ УФ-йы Экономикон рæзты министры хæдивæг Дмитри Вольвачимæ.
Фембæлды хайад райстой РХИ-йы Хицауады Сæрдар Джуссойты Константин, РХИ-йы Хицауады Сæрдары хæдивæг-Экономикон рæзты министр Тадтаты Дзамболат.
Дыууæ фарсы æруынаффæ кодтой Республикæ Хуссар Ирыстоны территорийыл инвестицион проекттæн хатырон (льготон) кредитты механизм реализаци кæнын æмæ инвестицион архайдæн паддзахадон æххуыс бакæныны фарстатыл.
