Царды алы ныййарæгæн дæр йæ иууыл стырдæр амонд йæ кæстæртæ сты. Уыдон раст фæндагыл лæуд куы вæййынц, зонæдты бæрзæндтæм схизынмæ куы фæтырнынц, уæд сæ цинæн кæрон дæр нал вæййы. Цæвиттойнаг, æгъдауджын кæстæртæ чи схъомыл кæны, уыцы ныййарджыты ма цы фæхъæуы, цæмæй сæхи амондджыныл нымайой. Ахæм амондджын ныййарджытæ сты нæ горæты цæрæн массивы цæрджытæ Джиоты Роберт æмæ Джиголаты Мальвинæ. Хуыцауы цæст сын бауарзта дыууæ хорз хъæбулы – иу чызг æмæ иу лæппу.
Джиоты Нодар райгуырд горæт Цхинвалы 2006 азы. Скъоламæ цæуынхъом куы фæцис, уæд æй йæ ныййарджытæ радтой 2-æм астæуккаг скъоламæ æмæ йæ æнтыстджынæй каст фæцис. Скъолайы ахуыр кæнгæйæ, уыд цæвиттойнаг йæ алы хъуыддагæй дæр. Æгъдауджын æмæ ахуырмæ æвзыгъд лæппуйæ райгонд уыдысты йæ ахуыргæнджытæ.
«Райгонд дæн мæ ахуыргæнджытæй иууылдæр, фæлæ мын мæ царды стырдæр фæд ныууагъта нæ къласгæс, ирон æвзаг æмæ литературæйы ахуыргæнæг Гæбæраты Лианæ. Бирæ мын бацамыдта. Йæ фæрцы бамбæрстон нозт æмæ æндæр негативон фæзындтæй хи хизын кæй хъæуы», – загъта Нодар.
«Райгонд уыдтæн Нодарæй. Тынг æгъдауджын лæппу, тырныдта ахуырмæ дæр. Активон хайад иста скъолайы æхсæнадон царды. Цыфæнды йын ма бахæс кодтаин, уайтагъд-иу æй ацарæзта. Никуы никæйы фæхъыг кодта йе ‘мкъласонтæй дæр», – загъта йæ къласгæс Гæбæраты Лианæ.
11-æм къласы куы ахуыр кодта, уæд мыхуыры рауагъта йæ фыццаг философон чиныг «Неизвестность», зæгъгæ. Чиныг мæм иу цалдæр мæйы размæ æрбахаста мæ коллегæ Гæззаты Иван æмæ йæ куы базыдтон ахуырдзауы фыст у, уæд мæ дисæн кæрон нал уыд. Зæрдæ цины малы аныгъуылд, æгайтма нæ чысыл хæстæфхæрд Ирыстонæн ахæм хорз кæстæртæ ис. Нодары хуызæн фæсивæд цы бæстæйæн уа, уымæн йæ фидæн хорз уыдзæн. Куы йæ афарстон, зæгъын, куыд дæм æрцыд ахæм чиныг ныффысыны хъуыды, уæд мын сдзуапп кодта:
«Мæ чысылæй фæстæмæ хъуыды кæнын бирæ уарзтон æмæ абон дæр уарзын. Æхсæз азы мыл куы цыд, уыцы зымæг мит не ‘руарыд æмæ мæм хъуыдытæ фæзынд, схуыдтон æй «зымæгæй сæрд». Мæ чиныг ныффыстон 6 мæймæ. Иу дзырдæй, мæ хъуыдытæ раргом кодтон мæ чиныджы фæрцы», – банысан кодта уый.
Нодар 2-æм астæуккаг скъолайы хайад иста алыгъуызон мадзæлтты, уыцы нымæцы биологи, хими æмæ англисаг æвзагæй уагъдцæуæг олимпиадæты. 2023 азы скъола расидт конкурс «Азы хуыздæр ахуыргæнинаг», зæгъгæ, æмæ дзы бацахста призон бынат.
Нодар йæ чысылæй бауарзта йæ сомбоны професси. Равзæрста дохтыры дæсныйад. Бацæуæн фæлварæнтæ æнтыстджынæй радта Цæгат Ирыстоны медицинон академимæ. Ам дæр ын йæ ахуыргæнджытæ уайтагъд фæхатыдысты йе ‘взыгъддзинад. Йæ ахуыр æмæ уагахастæй йæхимæ æркæсын кодта академийы лекторты.
Мæ фарст, дохтыры професси цæмæн равзæрстай, зæгъгæ, мын афтæ загъта: «Адæймагæн йе ‘нæниздзинадимæ проблемæтæ куы уа, уæд ын хъæуы баххуыс кæнын. Чы-сылæй фæстæмæ мæ фæнды тыхст адæмæн æххуыс кæнын æмæ уымæ гæсгæ равзæрстон дохтыры професси. Фæнды мæ нейрохирург суæвын æмæ уыцы иурæстæджы философ дæр. Æрæджы нын райдыдта практикæ Дзæуджыхъæуы клиникон рынчындоны», – загъта уый.
Йæ ныхæстæм гæсгæ, йæ лектортæй йæ зæрдæмæ иууыл æввахсдæр у химийы ахуыргæнæг Закаты Раисæ. Нодар академийы йæ фыццаг семестры фæлварæнтæ радта æнтыстджынæй æмæ улæфтбонты æрцыд йæ райгуырæн Цхинвалмæ. Редакцимæ йæ куы фæхуыдтон йемæ аныхас кæныны тыххæй, уæд æфсæрмытæгæнгæ кабинетмæ æрбахызт бæрзонд рæсугъд лæппу. Йæ радтæг Ирыстонæн аккаг фыртæй кæй басгуыхдзæн, ууыл дызæрдыггæнæн нæй. Уыимæ йæ дарддæры плæнттæ дардыл сты. Академи каст фæуыны фæстæ, кæй зæгъын æй хъæуы, рацæудзæн ординатурæ. Фæлæ ууыл не ‘рлæудзæн. Фæнд кæны аспирантурæмæ бацæуын дæр.
Иннæ ахæм ахуыры æмрæнхъ дарддæр дæр фæнд кæны фыссын. «Иу хорз хæлар мын ис академийы. Уый та ахуыр кæны стоматологон факультеты. Иумæ кусæм чиныгыл, хъавæм философон хъуыдытæ хъуамæ прозæйы равдисынмæ схæццæ кæнæм. Нæ чиныг хъуамæ рацæуа 800-900 фарсæй. Адæймаджы куы бафæнда, уæд рæстæг алыхатт дæр ссардзæн. Хъуыдытæ мæм куы фæзыны, уæд мæ иннæ хъуыддæгтæ дыккаг планмæ ахизынц», – радзырдта мын йæ дарддæры плæнтты тыххæй æвзонг курдиатджын лæппу.
Сæ фыртæй райгонд сты Роберт æмæ Мальвинæ дæр. Мальвинæ куыд загъта, афтæмæй Нодар йæ чысылæй фæстæмæ у æнæхин, æнæзивæг.
Нæ зæрдæ йын зæгъы æнæниздзинад, хорз æнтыстытæ йæ ахуыры. Уадз, йæ рæсугъд фæндтæ сæххæст уæд йæхи уды фæндиаг.
ДЖИОТЫ Екатеринæ
