Кæд байгом уыдзæн Цъинагары спортзал?

«Цъинагары скъолайы спортивон зал ацы аз эксплуатацимæ лæвæрд æрцæудзæн», – зæгъы Ленингоры районы администрацийы сæргълæууæг Гæджиты Иларион.

Цъинагары астæуккаг скъолайæн нæй фадат, æвзæр боныгъæд æмæ зымæгон бонты ахуыргæнинæгтæн æмбæлон æмвæзадыл физкультурæйы уроктæ уадзынæн. Скъолайæн спортивон зал æнæмæнгхъæуæг кæй у, уый тыххæй скъолайы директор Гусойты Ласко дзырдта алы инстанциты. Объекты арæзтадмæ æрæвнæлдтой цалдæр азы размæ. Цъинагайрæгты цинæн кæрон нал уыд. Бæстыхай рауад аив, сагъуыстой йын йæ сæр дæр, бакодтой ыл рудзгуытæ, бауагътой йæм инженерон-коммуникацион хызæгтæ, архайдтой хъæрмадон системæ саразыныл. Мидæггагон куыстытæ дæр бæргæ бакодтой, фæлæ уæддæр спортзал не скуыста. Спортивон залмæ хъуамæ бахизæн уа скъолайæ, йæ мидæг хъуамæ уа алы уавæртæ дæр. Залы хъазæн хъуамæ уа мини футболæй, баскетбол æмæ волейболæй хъазынæн. Хъуамæ дзы уа физикон цæттæдзинады ахуыргæнæгæн хатæн. Скъоладзаутæн та дзаумæттæивæн, хинайæнтæ, куыд лæппутæн, афтæ чызджытæн дæр. Фæлæ… зал эксплуатацимæ нæ райстой, уымæн æмæ дзуапп нæ лæвæрдта уæлдæр æрнымад нормæтæн. Объект аразджытæ сæ куыст нывыл нæ бакодтой. Афтæмæй йæ саразынмæ æнхъæлмæ кастысты Цъинагары алфæмблай цæрæг фæсивæд дæр.

«Агъуысты сæр раст æмбæрзт не ‘рцыд. Æвзæр боныгъæдты йæ систыл фæлæдæрсы къæвдайы дон æмæ систæ ныскъуыдтæ сты. Объект куы арæзтой, уæд бирæ къуыхцытæ ауагътой инженерон-хъармгæнæн куыстыты дæр. Скъолайы директор бæргæ дардта йæ хъус ацы аразджытæм, уайдзæфтæ дæр сын кодта, фæлæ йын прораб зæрдæтæ æвæрдта, зæгъгæ, спортивон зал куы сырæза, уæд дзы æппæт фадæттæ дæр кæй уыдзæн. Фæстагмæ куыд рабæрæг, афтæмæй уал азы дæргъы кæмæ æнхъæлмæ кастысты, уыцы спортивон зал не сбæззыд физикон цæттæдзинады уроктæ уадзынмæ», – зæгъы Гæджиты Иларион.

Администрацийы сæргълæууæджы фæнды 2023 азы Цъинагары скъолайы ахуыргæнинæгты бæллиц сæххæст кæнын. Республикæйы разамынады æх-хуысæй бацархайдзæн, спортивон залы аразджытæ цы цухдзинæдтæ ауагътой, уыдон аиуварс кæнын. Спортивон зал ахсджиаг объект у, уый хорзæрдæм бандавдзæн хъæуы фæсивæдыл се ‘нæниздзинад фидардæр кæнынæн.

«Скъолайы кæрты ис сæрдыгон спортивон фæзуат, уый, кæй зæгъын æй хъæуы, стыр æххуыс у ахуыргæнинæгтæн, фæлæ къæвдайы рæстæджы, зымæгон бонты физкультурæйы уроктæ фæуадзынц скъолайы агъуысты. Уым та нæй уавæртæ, скъолайæн йæ фыццаг уæладзыг дæр цалцæгкæнинаг у æмæ йæ хъуамæ саразæм», – загъта ма районы сæргълæууæг.

Цъинагары скъолайы  ахуыргæнджытæ, ахуыргæнинæгтæ æмæ хъæуы фæсивæд æнæрхъæцæй æнхъæлмæ кæсынц спортзалы цæттæдзинадмæ.

УАЗÆГТЫ Марфа