Немыцаг фашистон тыхæйисджытыл фæуæлахизы боныл 77 азы сæххæсты цытæн нæ горæты Æнусон арты раз Хъайтарты Аллеяйы æрвыл аз дæр уагъд æрцæуы традицион номарæн мадзал. Ацы аз дæр ам хайад райстой бæстæйы къухдариуæгад Бибылты Анатолийы сæргълæудæй, хицауады бæрнон кусджытæ, парламенты депутаттæ, æхсæнады минæвæрттæ.
Мадзалы райдианы Æнусон арты раз, сæрæгæсты кадæн, æмæ 1941-1945 азты Советон цæдисы сæрибардзинады сæрыл йæ уд чи рауæлдай кодта, уыдон номыл, бæстæйы сæргълæууæг Бибылты Анатоли сæвæрдта Кады гирляндæ.
Мадзалы хайадисджытæ – Хуссар Ирыстоны Уæрæсейы Федерацийы Æххæстбарджын минæвар Марат Кулахметов, бæрнон кусджытæ, тыхон æмæ барадхъахъхъæнæг структурæты кусджытæ дæр хайад райстой æмæ ном арынæн дидинджытæ æмæ веноктæ сæвæрдтой Хъайтарты Аллеяйы Æнусон арты раз.
Хъыгагæн, азæй-азмæ ихсийынц нæ цытджын ветеранты рæнхъытæ. Стыр Фыдыбæстæйон хæсты уæлахизыл 77 азы сæххæсты цытæн æфсæддон парад ацы аз æрæййæфтой дыууæ ветераны. Уымæ гæсгæ мах хъуамæ кад кæнæм, не ‘хсæн чи нал ис, уыдонæн.
Бæстæйы сæргълæууæг Бибылты Анатолийы ныхæстæм гæсгæ 9 май егъау бæрæгбон у, цæстысыгимæ бæрæгбон. Ацы бон, зæгъгæ, мах хъыг кæнæм милуангай сырх æфсæддонты, афицерты, инæлæртты, сабыр цæрджыты, сывæллæтты, сылгоймæгты, зæрæдты цардыл.
Стыр Уæлахизы бон нын æхсызгондзинады æнкъарæнтæ æвзарын кæны, фæлæ уыцы-иу рæстæг хъыг кæнæм, не ‘хсæн чи нал ис, бæрæгбон чи нал æрæййæфта, рæстдзинадыл фæуæлахизы тыххæй йæ цард чи рауæлдай кодта, уыдоныл.
Бибылты Анатолийы ныхæстæм гæсгæ советон адæм фашизмыл куы фæуæлахиз сты, уымæй рацыд 77 азы. Уал азы мах сæрыстыр стæм не ‘мзæххонтæй, Стыр Фыдыбæстæйон хæсты тохы быдырты лæгдзинад æмæ хъæбатырдзинад чи вдыста, уыдонæй. 77 азы мах стæм уыцы хъæбатырты фæдонтæ æмæ сын дарддæр кæ-нæм сæ хæстон традицитæ. Уымæн æвдисæн сты, ныртæккæ Украинæйы зæххыл сæрмагонд æфсæддон операцийы не ‘мзæххонтæ цы хъæбатырдзинæдтæ æвдисынц, уый дæр.
Йæ ныхæстæм гæсгæ нæ кадджын фыдæлты фæдонтæ ныртæккæ дарддæр кæнынц кады хъуыддаг.
«Стыр хъыгагæн, Украинæйы къухдариуæгад дунеон æмæхсæнады разæнгардæй, фашизм ногæй схæцыд йæ сæрыл. Мæн ныфс ис, æмæ сæрмагонд æфсæддон операцийы уæлахизы бон дæр нысан кæндзыстæм æмæ сæрыстыр уыдзыстæм уымæй, нæ фыдæлты фæдонтæ кæй сарæзтой æппæт дæр, цæмæй ралыг кæной фашизмы сæр», – дзырдта Бибылты Анатоли.
Стыр Фыдыбæстæйон хæсты уæлахизы боныл дзургæйæ бæстæйы сæргълæууæг банысан кодта, зæгъгæ, хъæуы хъуыды æмæ кад кæнын нæ ветеранты сгуыхтдзинæдтæн.
«Уыимæ иумæ ма æз сæрыстыр дæн уымæй, нæ цытджын ветерантæн бæрæгбоны тыххæй кæй арфæ кодтам, сæ къухтæ сын кæй истам, сæ хæстон тохвæндæгты хабæрттæм сын кæй хъуыстам. Мах стæм уæлахизхæссæг адæмы фæдонтæ, æмæ уымæ гæсгæ æз не ‘ппæтæн дæр арфæ кæнын, фæнды мæ алы фронтты дæр куыд уæлахиз кæнæм, æмæ сæйраджы та, ныртæккæ цæмæ æнхъæлмæ кæсæм – Уæрæсе цы сæрмагонд æфсæддон операци уадзы нацизм скуынæг кæныны тыххæй, уым уæлахиз къухы бафтын кæнын.
Мадзалы рæстæджы Культурæйы министр Зассеты Жаннæ йæ хайадисджыты базонгæ кодта, Бибылты Анатоли æмæ Хуссар Ирыстоны адæмы номыл Уæрæсейы Федерацийы президент Владимир Путин цы арфæйы фыстæг æрæрвыста, уыимæ.
Къæбулты Марина
Comments are closed, but trackbacks and pingbacks are open.