Кадимæ хæссынц ахуыргæнæджы ном

Скъоладзауы ахуыр ӕмӕ хъомыладыл ныййарӕджы фӕстӕ ӕппӕты тынгдӕр чи тыхсы, уый ахуыргӕнӕг у. Уымӕн бӕрзонд ӕвӕрд у ӕхсӕнады раз ацы дӕсныйад ӕмӕ йын аргъ дӕр уымӕн кӕны махӕй алы адӕймаг дӕр, уымӕн ӕмӕ уый ӕдзухдӕр тыхсы ӕмӕ ауды рӕзгӕ фӕлтӕры зонындзинӕдтӕй схотыхджын кӕныныл, раст фӕндагыл сӕ бафтауыныл.

Ацы професси чи бауарзы ӕмӕ дзы чи фӕллой кӕны, уый бынтондӕр ном ӕмӕ кады тыххӕй нӕ фыдӕбон кӕны. Уымӕн йӕ уӕнгты арф бынат ӕрцахсы кӕстӕрты, сомбоны цардаразджыты рӕсугъд фӕндаг, цӕмӕй суой хӕрзӕгъдау, ахуыры раззагдӕртӕ ӕмӕ ныфсджынӕй ӕрлӕууой фидӕны цардарӕзтады. Йӕ хъуыддагыл ӕнувыд ахуыргӕнӕгӕн кӕддӕриддӕр йӕ куыстимӕ фӕдзуры йӕ зӕрдӕ, ӕрмӕг куыд хуыздӕр ӕмӕ ӕнцондӕр амӕлтты фӕрцы бацамона, ууыл вӕййы ӕдзухдӕр йӕ фыдӕбон. Вӕййы афтӕ ӕмӕ йӕ иу амалӕй кӕцыдӕр ахуыргӕнинаг тынг нӕ бамбӕрста, уӕд та спайда кӕны ӕндӕр амалӕй. Цас ӕхсызгондзинад банкъары зондамонӕг, иугӕр йӕ хъомылгӕнинӕгтӕ кӕронмӕ ӕрмӕг куы бамбарынц, уӕд. Цхинвалы районы скъолаты дӕр бирӕ ис, йӕ куыстыл иузӕрдион чи у, ахуыр-хъомыладон куыстмӕ бӕрндзинады цӕстӕй чи кӕсы, ахӕм раззагон ахуыргӕнджытӕ. Адӕмон ахуырады сӕргълӕууӕг Лолоты Барис куыд загъта, уымӕ гӕсгӕ йӕ дӕлбаруӕвӕг коллективы ӕнувыд архайды фӕстиуӕгӕн скъоладзауты зонындзинӕдтӕ кӕнынц хуыздӕр ӕмӕ уый та алы хъомылгӕнӕгӕн дӕр вӕййы ӕхсызгон. Ахуыр-хъомыладон куыстмӕ сӕ хъус лӕмбынӕг дарынц ӕмӕ бынӕтты мидӕг ӕнӕмӕнгхъӕуӕг методикон ӕххуыс ахуыргӕнджытӕн бакӕнынц адӕмон ахуырады методикон кабинеты кусджытӕ ӕмӕ инспекторон службӕ.

– Фӕнды мӕ уый банысан кӕнын, – зӕгъы Ахуырады хайады сӕргълӕууӕг, – ӕмӕ не скъолаты ис бирӕ раззагон ахуыргӕнджытӕ, уыцы нымӕцы Къостайыхъӕу, Дменис, Сатихъар, Арцеу, Рустау, Гром ӕмӕ Зары скъолатӕй: Козаты Валентинӕ, Плиты Заирӕ, Дудайты Земӕ, Бестауты Валери, Чысиаты Иринӕ, Лалыты Дианӕ, Коцты Фатимӕ, Куыдзеты Вандӕ, Бикойты Эльзӕ ӕмӕ ӕндӕртӕ. Уыдон се ‘рвылбонон куысты архайынц, цӕмӕй сӕ ахуыргӕнинӕгтӕ уой раззагон, исой фаг зонындзинӕдтӕ. Уымӕй дарддӕр бузныджы ныхас зӕгъын ӕмбӕлы районы администрацийы сӕргълӕууӕгӕн, скъолаты проблемӕтӕм йӕ хъус лӕмбынӕг кӕй дары ӕмӕ се скъуыддзаг кӕныныл зæрдиагæй кӕй бацархайы, уый тыххӕй. Иуӕй-иу рӕтты ма цы чысыл згъуыдтӕ ис, уыдон аиуварс кӕныны фӕстӕ скъолатӕ се ‘ппӕт дӕр хъармгӕнӕн сезоныл сӕмбӕлдзысты цӕттӕйӕ. Ахуыры ӕнтыст бирӕбӕрцӕй баст у, ахуыргӕнӕн чингуытӕ ӕмӕ инвентарӕй куыд ифтонг вӕййынц ӕмӕ уыдонӕй дӕр сты цӕттӕ. Ацы хъуыддаджы раппӕлинагдӕр сты Дменис ӕмӕ Къостайыхъӕуы  астӕуккаг скъолатӕ. Афтӕ ӕмӕ нӕ ахуыргӕнджытӕ сӕ профессионалон бӕрӕгбоныл ӕмбӕлынц хорз зӕрдӕйы уагимӕ ӕмӕ сын  ноджы  фылдӕр  ӕнтыстытӕ  уӕд.

ХУЫБИАТЫ Никъала