Хетæгкаты Къостайы номыл Цæгат Ирыстоны паддзахадон университеты президент Мæхæмæтты Ахуырбегæн лæвæрд æрцыд «Ирыстоны куысты Хъайтары» кадджын ном. УФ-йы зонæдты сгуыхт архайæгæн, Ахуырады уæрæсейаг академийы уæнг-уацхæссæг, историон зонæдты доктор, профессорæн Хъайтары майдан радта Цæгат Ирыстоны Сæргълæууæг Сергей Меняйло. Республикæйы къухдариуæггæнæг банысан кодта бирæ азты дæргъы цæсгомджын архайды рæстæджы Цæгат Ирыстоны уæлдæр ахуырады рæзтмæ Мæхæмæтты Ахуырбеджы стыр хайбавæрды тыххæй.

«Ды дæ цард снывонд кодтай зонад æмæ ахуырадæн лæггад кæнынæн, бацæттæ кодтай алыгъуызон къабæзты профессионалты цалдæр фæлтæры. Æмæ абон дæр хъæуæг сты дæ фæлтæрддзинад, куырыхондзинад æмæ организаторон курдиæттæ. Мах иууылдæр сæрыстыр стæм дæуæй — нæ кадджын хистæрæй», — банысан кодта Сергей Меняйло.

Мæхæмæтты Ахуырбег раарфæ кодта, йæ архайдæн ын ахæм стыр аргъ кæй скодтой, уый тых-хæй. Банысан кодта, зæгъгæ, йын йæ куысты æнтыстытæн алыхатт дæр æххуыс кодта Цæгат Ирыстоны паддзахадон университеты æнгом æмæ профессионалон коллектив.

Мæхæмæтты Алиханы фырт Ахуырбег Цæгат Ирыстоны паддзахадон университеты схызт æппæт къæпхæнтыл дæр — студентæй ректоры онг, ректорæй президенты онг, йæ царды æппæтдæр йæ зондæй, йæ æвæллайгæ куыстæй къухты бафтын кæнгæйæ. Цæгат Ирыстоны паддзахадон университеты президент у æнахуыр зæрдæхæлар адæймаг. Зæрдæбынæй ауды уæлдæр ахуыргæнæндоны кусджытыл, йæ алыварс адæмыл. Æрдзæй рахæсгæ уæздандзинад, æвидигæ оптимизм, æгæрон куыстхъомæй йæ базыдтой адæм.

Мæхæмæтты Ахуырбег дæргъвæтин азты дæргъы ссис фыдыбæстæйон æмæ фæсарæй-наг уæлдæр ахуыргæнæндæттимæ бирæ иумиаг проектты инициатор. Республикæйы уæлдæр ахуыргæнæндон — Цæгат Ирыстоны паддзахадон университет хаст æрцыд Уæрæсейы хуссары хуыздæр ахуыргæнæндæтты нымæцмæ.

Хъысмæт ын йæхæдæг схай кодта абон цахæм адæймаг ссис, уый суæвын (йæ номы фыццаг хай АХУЫР нысан кæны ахуыр, дыккаг БЕГ кæнæ БЕК та — къухдариуæгад кæнын). Къаддæр монон магнетизм нæй йæ мыггаджы дæр, уымæн та йæ бындур у пехуымпар МÆХÆМÆТЫ ном.

Æнæ банысан кæнгæ нæй уыцы фактæн дæр, æмæ йæ къухдариуæгадæй фæстаг азты студентты нымæц кæй фæфылдæр дыууæ хатты. Профессорты-ахуыргæнджыты сконды ис 700 адæймаджы, уыдоны ’хсæн — сæдæйæ фылдæр зонæдты доктор-тæ æмæ профессортæ, 250 зонæдты кандидаттæ æмæ доценттæ. УФ æмæ РЦИ-Аланийы зонæдты 24 сгуыхт архайæджы. Цыбыр рæстæгмæ уый ссис дыууæ престижон æхсæнадæмон академиты æцæг уæнг, РЦИ-Аланийы ректорты советы Сæрдар, Уæрæсейы уæлдæр ахуыргæнæндæтты ректорты централон советы уæнг, УФ-йы зонæдты сгуыхт архайæг, Гæдиаты Цомахъы номыл премийы фыццаг лауреат, Хетæгкаты Къостайы номыл Паддзахадон премийы лауреат, 200 фылдæр зонадон куысты автор, се ’хсæн сты 20 монографийы, популярон аивадон æмæ публицистон чин-гуытæ. Уый æддейæ ма хъуыддагон контакттæ сарæзта Герман, Франц, Сири, Канадæ, Ирланди, Хуссар Корея, Турк, Болгари, Иордани æмæ æндæр бæстæты уæлдæр ахуыргæнæндæттимæ.

Уый у ЦИПУ-йы фыццаг æвзæрстгонд ректор. Университет ссис ЮНЕСКО-йы æууæнкджын партнер.

Мæхæмæтты Алиханы фырт Ахуырбег у искæйы рыст æнкъараг, адæймаджы йæ тыхтыл æууæндынгæнæг, хорздзинад тауæг. Мах дæр ын арфæ кæнæм, кадджын ном йын кæй саккаг кодтой, уый фæдыл.

ДЖИОТЫ Екатеринæ

Comments are closed, but trackbacks and pingbacks are open.