ФИДÆНЫ АМАЛХЪОМТÆН
Республикæйы Сæргълæууæг Битарты Вячеславы хъæппæрисæй царды уагъд æрцыд ног программæ «Алания Бизнес Акселератор». Йæ фыццаг хайы нысан у фæсивæды экономикæйы къабазмæ здахын, бизнесы сусæгдзинæдтæ сын амонын, амалхъомады куыстмæ сæ разæнгард кæнын. Организатортæ зилынц скъолатыл, уæлдæр ахуыргæнæндæттыл æмæ фæсивæдимæ кæнынц æмбарынгæнæн куыст, зонгæ сæ кæнынц программæйы уагæвæрдимæ.
Проекты дыккаг хайы йæ архайджытæн сæ бон уыдзæн сæ арæхстдзинæдтæ равдисын, районты ʻхсæн ерыстæ аразын, проекттæ, презентацитæ, докладтæ цæттæ кæнын, кейс-чемпионатты архайын, æнтыстджын бизнесменты куыстытимæ зонгæ кæнын…
Алыхуызон фæлварæнты хуыздæр зонындзинæдтæ чи равдиса, уыдон ахиздзысты финалон хаймæ æмæ архайдзысты регионалон конкурсты. Уæлахиздзауты бавдисдзысты паддзахадон гранттæ райсынмæ, цæмæй бизнесы сæ арæхстдзинæдтæ адарддæр кæной…
ÆХХУЫС – ТЕРАКТЫ АМÆТТÆГТÆН
Бæслæны трагедийæ кæд бирæ азтæ рауад, уæддæр нæ дзæбæх кæнынц нæ дæр зæрдæйы хъæдгæмттæ, нæ дæр буарыл нæмыджы фæдтæ. Абоны онг дæр хъыгдардбаййафджытæн сæ фылдæр хай у фæкæсинаг, хос кæнинаг. Райдианы цы æххуыс фæистой, уыдон сын, хъыгагæн, се ʻнæниздзинад бынтон нæ раздæхтой. Бирæтæн дзы сæ æвæрæз уавæртæм гæсгæ нæу сæ бон сæхи сдзæбæх кæнын.
Уый нымайгæйæ республикæйы Сæргълæууæг Битарты Вячеслав бахæс кодта Æнæниздзинад хъахъхъæнынады министрадæн, цæмæй сбæрæг кæной теракты амæттæгтæй кæмæн цы æмæ цас æххуыс хъæуы, уыдæттæ.
Ныридæгæн бюджетæй рахицæн кодтой 44 милуан сомы 336 адæймагæн. Уыдонæй кæй рынчындоны дзæбæх кæнын хъæуы, кæй – санаториты. Алчидæр, йæхи кæм сдзæбæх кæна, уый æвзары йæхæдæг. Алы адæймаг дæр хос кæнынæн райсдзæн 120 мин сомы.
Теракты амæттæгтæй абоны онг дæр æхсæз сты уæззау уавæры, хуысгæ рынчынтæ. Уыдоны хъæуы фæсарæнты дзæбæх кæнын, уымæ гæсгæ сын министрад рахицæн кодта фæйнæ дыууæ милуан сомы.
Республикæйы Сæргълæууæджы администрацийæ куыд фехъусын кодтой, афтæмæй кæддæриддæр ахадгæ æххуыс кæндзысты Беслæны скъолайы судзгæ цæхæры чи бахауд, йе ʻнæниздзинад уым чи ныууагъта, йæ бинонтæ дзы кæмæн бацарæфтыд сты, уыцы рыстзæрдæ адæмæн.
ÆППÆТ ДÆР – ЗАКЪОНЫ БЫНДУРЫЛ
Ацы фæстаг бонты та Дзæуджыхъæуы уынгты сарæх сты Паддзахадон автоинспекци æмæ Транспорты министрады кусджыты рейдтæ. Уыдонæн сæ нысан у хисæрмагонд такситы æнæзакъон куыст бауромын. Цалдæр бонмæ арæзт æрцыд иу 30 протоколы. Йæ машинæйыл таксийы нысан чи сæвæра, уый бафиддзæн ивар 5000 сомы, бæлцæттæ æнæзакъонæй ласыны тыххæй та – дыууæ мины бæрц.
Уымæй дарддæр, бæрæг цæуы бæлцæттæласæн маршрутон такситы уавæр дæр. Йæ техникон æмæ санитарон уавæр цауд кæмæн сты, пандемийы ныхмæ фæрæзтæ кæй машинæйы нæй, æнæ маскæтæй бæлцæтты чи ласы, уыдонмæ дæр æнхъæлмæ кæсы стыр ивартæ.
Транспорты куысты системæйы ма ис ахæм ногдзинад дæр: абон горæты уынгты цы маршрутон такситæ кусынц, уыдонæн сæ фылдæр сты зæронд, кæлæдздзаг, тæссаг сæ у адæмы ласын. Уымæ гæсгæ, нæ республикæ Петербургæй балхæдта, абоны домæнтæн дзуапп чи дæтты, ахæм егъау, райдзаст микроавтобустæ. Уыдон ауадздзысты горæты уынгты куыд муниципалон транспорт, афтæ. Кæй зæгъын æй хъæуы, адон баивдзысты кæцыдæр хисæрмагонд маршрутты. Куыд зæгъынц, афтæмæй зæронд транспорт иууылдæр къæпхæнгай ивд æрцæудзæн ног муниципалон, ома паддзахадон транспортæй.
Уый хорз у, бæргæ, фæлæ адæймагыл сагъæс æфтауы æндæр хъуыддаг: цы фæуыдзысты уый æппæт хисæрмагонд «Газель»-тæ, кæм кусдзысты сæ шофыртæ, цæмæй цæрдзысты, йæхи рог машинæйыл цыдæр капеччытæ чи акусы, уыцы адæм? Фарстытæ бирæ, дзуапп та сын нæй.
Нæ уацх.
Comments are closed, but trackbacks and pingbacks are open.