Ирыстойнаг дохтыртæ-бархионтæ Æлборты Юри æмæ Мзокты Хетæг сæрмагонд æфсæддон операцийы хæстонтæ æмæ сабыр цæрджытæн сарæзтой 500 вазыгджын операцийæ фылдæр. Не ‘мзæххонтæ сты зæрдæ-дадзинты хирургтæ. Юри кусы Мæскуыйы бирæпрофилон клиникон центр «Коммунарка»-йы, æмæ Хетæг та – мæскуыйаг 15-æм клиникон рынчындоны.
Сæрмагонд æфсæддон операци райдайыны фыццаг бонтæй фæстæмæ уыдон аскъуыддзаг кодтой, зæгъгæ, Райгуырæн бæстæйы бахъахъхъæныны сæр куы бахъуыд, уæд сæ бон не суыдзæн иуварс лæууын. Сæ куыстытæй райстой æнæ мыздæй улæфтытæ æмæ дохтыртæ-бархионты къорди-мæ ацыдысты Луганскы Адæмон Республикæмæ специализацигонд медицинон æххуыс бакæныны тыххæй æнæмæнгхъæуæг хирургион ифтонггæрзтæ æмæ хардзы æрмæджытæ семæ аласгæйæ. Уæдæй фæстæмæ регулярон æгъдауæй æрбацæуынц Луганскы республикон клиникон рынчындонмæ æмæ æххуыс кæнынц сæ коллегæтæн. Иумæ операцитæ аразынц, карз тохты рæстæджы чи фæцæф вæййы, уæрæсейаг уыцы æфсæддон службæгæнджытæн. Кæй зæгъын æй хъæуы, æнæ хъусдардæй нæ ныууадзынц карз зæрдæ-дадзинты низтимæ бынæттон цæрджыты дæр.
Цæгатирыстойнаг специалисттæ – зæрдæдадзинты хирургты удуæлдай æмæ ахсджиаг куысты тыххæй РЦИ-Аланийы Сæргълæууæджы «электроникæ»-мæ арфæ æрбарвыста Луганскы республикон клиникон рынчындоны сæйраг дохтыр Олег Вольман.
Афтæ ма бирæнымæц саразгæ алыгъуызон операцитæй дарддæр не ‘мзæххонтæ эксплуатацимæ радтой эндоваскулярон ифтонггарз, сæ фæлтæрддзинадыл сахуыр кодтой дохтырты æмæ медицинон персоналы. Куыстмæ сæ бæрнон ахасты æмæ æххуысмæ фæзынынмæ сæ цæттæдзинады тыххæй Юри æмæ Хетæг Луганскы Адæмон Республикæйы ахæм хорз фæд кæй ныууагътой, афтæ ма экстремалон уавæрты медцинон æххуыс бакæныны тыххæй, арфæйы гæххæттытæй хорзæхджын æрцыдысты Уæрæсейы Федерацийы президенеты барамындæй.
«Лæппутæ, стыр бузныг уын! Сымах стут Ирыстоны æцæг фырттæ. Фæнды мæ раарфæ кæнын уæ ныййарджытæн дæр, ахæм хорз хъæбултæ кæй схъомыл кодтой, уый тыххæй. Уадз, цардæй хорзæхджын ут уæ удуæлдай куыст æмæ æххуысы тыххæй! Бирæ уын бантысæт», – йæ телеграм-каналы фыссы РЦИ-Аланийы Сæргълæууæг Сергей Меняйло.
Нæ уацх.
