Ирон адæмæн номгæнæг Хетæгкаты Къостайы сфæлдыстад цымыдис тынг бирæ адæмыхæттытæм сæвзæрын кодта. Æвæццæгæн, уый тыххæй æмæ йæ дуджы ссæст фæллойгæнджыты уæззаудзинады хъизæмаргæнæджы хæс йе уæхсчытæм кæй райста. Æвæццæгæн, уый тыххæй æмæ дунейы цæрæг адæмы æмхуызон кæй уарзта. Сæ цинтыл сын цин кодта хи удыл хæрзиуæг æрцæуæгау. Сæ хъыгтæ та сын иста хи удыл æрцæуæг мастау.
Къостайы сфæлдыстад, сæйраджыдæр, та йæ поэзи бирæ æвзæгтæм æрцыд тæлмац. Канд раздæры ССР Цæдисы цæрæг адæмты æвзæгтæм нæ, фæлæ фæсарæйнаг æвзæгтæм дæр.
Цæвиттонтæ æрхæссæн бирæ ис, чингуытæ дæр бирæ ис уый тыххæй æвдисæнæн. 1942 азы Стыр Фыдыбæстæйон тугкалæн хæсты рæстæджы Къостайы æмдзæвгæты немыцаг æвзагмæ ратæлмац кодта антифашист, немыцаг поэт æмæ тæлмацгæнæг Эрих Вайнерт.
Къостайæн канд йæ поэзийæн нæ аргъ кодтой, фæлæ ма йын аргъгæнæг уыдысты йæ адæймагдзинадæн дæр. Йæ уарзæгой парахат зæрдæйы тыххæй йæ, æвæццæгæн, нымадтой, куыд фæзæгъынц, бон цырагъы рухсæй агургæ æмæ æнæссаргæ поэтыл…
Æрæджы та Къостайы «Ирон фæндыр» мыхуыры рацыд Цæгат Ирыстоны рауагъдад «Ир»-ы. Чиныг мыхуыр æрцыд æртæ æвзагыл: ирон, уырыссаг æмæ французаг. Йæ тæлмацгæнæг, Къостайы сфæлдыстадæн аргъгæнæг æмæ табугæнæг, Цæгат Ирыстоны Хетæгкаты Къостайы номыл паддзахдон университеты профессор, французаг æвзаджы кафедрæйы сæргълæууæг Рашид Кулиев. Рашид Кулиев у горæт Греноблы Стендалы номыл университеты филологон зонæдты доктор. Хорзæхджын æрцыд «Во славу Осетии»-йы майданæй. Кулиев авд азы куыста Францийы æмæ уырдыгæй æрыздæхыны фæстæ, бæстонæй æрæвнæлдта гениалон поэты «Ирон фæндыр» тæлмац кæнынмæ.
Профессоры зонадон куыстытæ мыхуыр цыдысты æмæ цæуынц Дзæуджыхъæуы, Махачкалайы, Екатеринбурджы, Кемеровойы æмæ æндæр рæтты.
Йæ тæлмацгонд чиныджы редактор у Тъехты Тамерлан. Разныхас ын ныффыста филологон зонæдты кандидат, доцент Хозиты Барис. «Ирон фæндыр»-ы тæлмацы автор спайда кодта Къостайæн 2009 азы Дзæуджы-хъæуы рауагъдад «Ир» цы чиныг рауагъта «Произведения» æмæ Мæскуыйы 1989 азы поэтæн рауагъдад «Современник»-ы уагъд цы чиныг æрцыд «Весь мир — мой храм, любовь — моя святыня», уыдонæй. Рашид Кулиев ма фæнд кæны Къостайы поэмæ «Фатимæ»-йы дæр французаг æвзагмæ ратæлмац кæнынмæ.
Нæ зæрдæ йын зæгъы йæ дарддæры зонадон куысты æнтыстытæ æмæ хуымæтæджы чиныгкæсджыты номæй та æгæрон бузныг, ирон гениалон поэт Хетæгкаты Къостайы «Ирон фæндыр» французаг æвзагыл кæй сдзурын кодта, уый тыххæй.
Нафийы номыл премийы лауреат ОСТЪАТЫ Алан
