Хуссар Ирыстоны Президент Гаглойты Алан, Уæрæсейы президенты администрацийы сæргълæууæджы хæдивæг Дмитрий Козакимæ фембæлды рæстæджы, æрдзырдтой æмгуыстады актуалон фарстатыл, фехъусын кодта бæстæйы сæргълæууæджы пресс-службæ. Сæрмагондæй сæ цæст æрæвæрдтой 2025 азы онг Хуссар Ирыстоны социалон-экономикон райрæзты Программæйыл æмæ Уæрæсейы Федераци Хуссар Ирыстоны социалон-экономикон уавæр сфидар кæнынæн цы бюджетон фæрæзтæ радих кодта, уыдоны эффективон хардз кæнынадыл.
Гаглойты Алан æмæ Дмитрий Козак дзырдтой республикæйы æххæстгæнæн органты æмæ тыхон структурæты кусджыты мызд фæфылдæр кæныны фарстатыл. Уыимæ ма ныхас цыдис прокуратурæйы æмæ иннæ барадхъахъхъæнæн органты пенсион ифтонгадыл. Хицæнæй æрдзырдтой энергетикон сферæйы æмархайдыл.
Дмитрий Козак сæрмагондæй бахахх кодта, хицауады æххæстгæнæн æмæ закъондæттæн къабæзты координацигонд архайды ахсджиагдзинад мидполитикон стабилон уавæрæн æмæ республикæйы райрæзты перспективæтæн.
Президенты пресс-службæ ма фехъусын кодта, Мæскуымæ кусæгон визиты рæстæджы Президент Гаглойты Алан кæй фембæлдис УФ-йы Ӕдасдзинады советы секретары хæдивæг Рашид Нургалиевимæ. Уыцы фембæлды ныхас цыдис Хуссар Ирыстоны æдасдзинады фарстаты спектрыл.
