Куыд зонæм, афтæмæй Дзау æмæ Знауыры районты арæзт цæуы æртæуæладзыгон хæдзæрттæ. Уыдон аразын райдыдтой азы райдианы æмæ хъуамæ эксплуатацимæ лæвæрд æрцæуой декабры мæйы кæрон, цæмæй, фатертæ лæвæрд кæмæн æрцæуой, уыцы амондджын бинонтæ сæ фатерты фембæлой сæ Ног азыл.
Бирæуæладзыгон хæдзæрттæ арæзт цæуынц Инвестицион программæйы фæлгæтты. Ахæм æнгæс бирæуæладзыгон хæдзæрттæ 2020 азы ноджыдæр Дзауы районы арæзт æрцæудзæнис дыууæ.
Дзауы районы администрацийы сæргълæууæг Джиоты Андрей куыд зæгъы, афтæмæй ныридæгæн арæзт æрцыд цæрæнуатон къамис, кæцы бæстонæй æмæ алыварсонæй сахуыр кæндзæнис, къамисмæ цы 400 куырдиат æрбацыд цæрджытæй, уыдоны царды уавæртæ.
Уый ма куыд загъта, афтæмæй администрацимæ куырдиæттæ цæуынц 1991 азæй.
«Бæстыхайы ис æрмæстдæр 18 фатеры, уымæ гæсгæ мах фæнд кæнæм уыдон закъонмæ гæсгæ байуарын. Иууыл тыхстдæрты сбæрæг кæндзæн цæрæнуатон къамис æмæ ахæм бинонтæ чи сты, уыдоныл байуардзыстæм фатертæ. Цы 400 куырдиат нæм ис цæрджытæй, уыдонæй азилæм бон 10 хæдзары бинонтыл, алыварсонæй дæр дæр сын сахуыр кæнæм сæ уавæр. Хъыгагæн, бирæ куырдиæтты хицæуттæ разынынц фæлитой, уыдонæн кæмæндæрты фатертæ рабæрæг вæййы Цæгат Ирыстоны æмæ горæт Цхинвалы дæр», – зæгъы Джиоты Андрей.
Дзауы районы цы бирæуæладзыгон хæдзар аразынц, уый арæзт цæуы, раздæры санатори «Дзау»-ы фарсмæ цы сæрдыгон лагерь уыд, уый бынаты. Ныридæгæн бæстыхайы цæуы мидæггагон цалцæггæнæн куыстытæ. Фатертæ ифтонг уыдзысты æппæт хъæуæг коммуникацитæй. Хæдзарæн йæ кæрт дæр цæуы хæрзарæзт, йæ алфæмблай та сагъд æрцæудзæнис алыгъуызон цъæхдарæнтæ.
Знауыры поселочы дæр арæзт цæуы 18-фатерон хæдзар. Уыцы фатертæ дæр хъуамæ радтой æвзонг бинонтæн, æмæ цæрджытæй иууыл тынгдæр чи тыхсы, уыдонæн. «Ацы хабарыл тынг æхсызгонæй сæмбæлдысты знауырæгтæ. Цæрæнуæттæм чи æнхъæлмæ кæсы, кæд уыдоны нымæц бирæ у, уæддæр æхсызгон у, Знауыры районы дæр кæй бавнæлдтой бирæуæладзыгон хæдзæрттæ аразынмæ, уый. Фæстаг хатт ма Знауыры муниципалон хæдзæрттæ сарæзтой 1985 азы. Кæд ацы аз æрмæст 18 бинонтæ ифтонг æрцæудзысты, уæддæр Президент ныфс куыд æвæры, афтæмæй дарддæр дæр рæздзысты ахæм хæдзæрттæ», – зæгъы Знауыры районы администрацийы пресс-службæ.
УАЗÆГТЫ Марфа
Comments are closed, but trackbacks and pingbacks are open.