20-æм апрелы горæт Цхинвалы администрацийы цур хореографион ансамбль «Ирон» Хуыгаты Дианæйы разамынадæй хайад райста Железноводскы уагъдцæуæг дунеон фестиваль-конкурс «Мир талантов»-ы æмæ сæхи равдыстой аккагдæртæй. Астæуккаг къорд сæ хореографион номыртæ иттæг хорз кæй сæххæст кодтой, уымæ гæсгæ рамбылдтой Гран-при. Уый тыххæй нын фехъусын кодтой нæ республикæйы культурæйы пресс-службæйы.
Хуыгаты Дианæ нын йæхæдæг куыд загъта, афтæмæй ансамблы хистæр къорд уый размæ конкурсы хайад райста Железноводскы æмæ уæд кафджытæ бацахстой фыццаг бынат. Кæстæр къордæн ацы сфæлдыстадон балц Стъараполы краймæ уыдис фыццаг хатт æмæ тынг райгондæй баззадысты.
Ансамбль «Ирон» дунеон фестиваль-конкурсы сæххæст кодтой дыууæ кафты – «Симд» æмæ «Зилгæ кафт» æмæ сæхимæ æркæсын кодтой аивадуарзджыты. «Æндæр коллективты ‘хсæн рахицæн кодтой нæ ансамблы æмæ нын банысан кодтой нæ хорз куыст. Нæ сывæллæттæ кæд дыууæ кафты дæр тынг аив сæххæст кодтой, уæддæр жюрийы уæнгтæ иууыл тынгдæр саргъ кодтой кафт «Симд»-æн æмæ сын уый тыххæй лæвæрд æрцыд Гран-при дæр», – загъта Дианæ.
Нæ уацх.
