Цæрджыты сфæлдыстадон активондзинад рæзын кæнгæйæ

Хуссар Ирыстоны Культурӕйы министрады цур Адӕмон сфӕлдыстады центрӕн куыд уымӕй размӕ азты, афтӕ 2018 азы дӕр ахадæн уыд сæ куыст. Центры методисттӕ ӕмбырд кодтой ӕрмӕджытӕ бӕлвырд темӕты фӕдыл, бацӕттӕ кодтой докладтӕ ӕмӕ сӕ уый фӕстӕ бынаты рахастой уынаффӕ кӕнынмӕ. Ӕндӕр ӕмӕ ӕндӕр рӕстӕджыты байхъуыстӕуыд ахӕм докладтӕм, куыд «Нырыккон хореографийы анализ», «Мард бавӕрыны ӕгъдау Хуссар Ирыстоны», «Вокалон аивады уавӕры анализ», «Абоны бон ирон театры уавӕр», «Культурон-рухсадон куыст» ӕмӕ ӕндӕртӕ. Бацӕттӕ сӕ кодтой методисттӕ Санахъоты О., Мӕргъиты И., Гуыцмӕзты Г., Къӕбысты З., Гуыцмӕзты Е., Ковалева Л. ӕмӕ Дзеранты Дж.

25 майы Анахарсисы номыл республикон национ библиотекӕйы ауагъдӕуыд цыппӕрӕм фотоконкурс ахӕм темӕйыл – «Хуссар Ирыстон-2018» ӕмӕ йӕ нысан уыд республикӕйы цӕрджыты сфӕлдыстадон активондзинад рæзын кæнын. Конкурсы уыд ахӕм номинацитӕ, Хуссар Ирыстоны пейзаж, флорӕ ӕмӕ фаунӕ, рагон цыртдзӕвӕнтӕ, зӕрдылдарӕн бынӕттӕ, портрет ӕмӕ Цхинвал абон. Къамты конкурсы ӕндӕр ӕмӕ ӕндӕр кары ӕмбӕстӕгтӕй ӕдӕппӕт хайад райстой 13 адӕймаджы. «Пейзаж, флорӕ ӕмӕ фаунӕ»-йы номинацийы фыццаг бынат бацахста Бестауты Ларисӕ (йӕ куыст уыд «Дыууӕ хойы»), дыккаг бынатмӕ рацыд Хаситы Геннади (йӕ куыст уыд «Ком») ӕмӕ ӕртыккаг бынат та бацахста Туаты Иринӕ ( йӕ куысты темӕ уыд «Царды фӕндаг»). «Рагон цыртдзӕвӕнтӕ ӕмӕ Хуссар Ирыстоны зӕрдылдарӕн бынӕттӕ»-йы номинацийы фыццаг бынат бацахста Мӕргъиты Ирбег ахӕм куыстӕй – «Хӕдзар хъӕуы» (Уӕллаг Рукъ), дыккаг бынатмӕ рахызт Къӕбулты Ӕхсар ӕмӕ ӕртыккаг бынат та лӕвӕрд ӕрцыд Гӕззаты Тимурӕн ахӕм темӕйӕ – «Изӕры театр».

«Портрет»-ы номинацийы фыццаг бынат рамбылдта Гасситы Зӕринӕ ахӕм куыстӕй – «Бӕлццоны фӕндараст кӕнын», дыккаг уыд Къӕбулты Ӕхсар – «Ветерантӕ» ӕмӕ ӕр-тыккаг призон бынат та фӕци Цхуырбаты Марияйы ахӕм куыстӕй – «Ӕвзонгады зӕр-дӕскъӕф». Иннӕ номинаци «Цхинвал абон»-ӕй та дыккаг ӕмӕ ӕртыккаг бынӕттӕ бацахста Къӕбулты Ӕхсар ахӕм куыстытӕй – «Зӕронд Цхинвал» ӕмӕ «Оркестр». Фотоконкурсы фӕстиуджытӕм гӕсгӕ 30 майы Хетӕгкаты Къостайы цырты раз уыд нывты равдыст «Уысм ӕрлӕуу, ды зынаргъ дӕ», зӕгъгӕ, ахӕм темӕйӕ Республикӕ Хуссар Ирыстоны Хӕдбардзинад банымайыны сӕраппонд. Конкурсы хайадисджытӕ хорзӕхджын ӕрцыдысты дипломтӕ ӕмӕ зӕрдылдарӕн лӕвӕрттӕй, уӕлахиздзаутӕ ӕмӕ призон бынӕттӕ бацахсджытӕ та хорзӕхджын ӕрцыдысты Культурӕйы министрады Кады грамотӕтӕ ӕмӕ призтӕй.

20 сентябры Хетӕгкаты Къостайы цырты раз ауагъдӕуыд республикон ӕртыккаг -армукъа-равдыст хуызфыссынады, декоративон-нывӕфтыдон аивад ӕмӕ ӕрмгуыстады фӕдыл. Ацы армукъа-равдысты нысан ӕмӕ хӕстӕ уыдысты, цӕмӕй сӕндидза ӕмӕ размӕ цӕуа ӕрмдӕсныйад, рабӕрӕг кӕна ацы къабазы дӕсны архайджыты ӕмӕ балӕууа се ‘нцой. Ацы равдысты та хайад райстой 19 адæймаджы, уыдонæй 9 уыдысты сылгоймæгтæ. Уыдысты дзы тынг зӕрдӕмӕ-дзӕугӕ куыстытӕ ӕмӕ сæм сӕвзӕрын кодтой хорз тӕлмӕнтӕ. Уӕлахиздзаутӕ райстой зӕрдылдарӕн лӕвӕрттӕ.

11 ноябры киноконцертон зал «Чермен»-ы уыд эстрадон зарӕг «Ирыстоны хъӕлӕстӕ»-йы республикон фестиваль-конкурс ӕмӕ дзы йӕ хайадисджытӕ сӕ тыхтӕ фӕлвӕрдтой ахӕм номинациты, куыд хицӕн ӕххӕстгӕнджытӕ, вокалон къорд, вокалон-инструменталон ансамбль. Конкурсы сӕйраг хӕстӕ уыдысты эстрадон аивады рæзтæн ахъаз кæнын, ног курдиӕттӕ раргом кӕнын, ирон эстрадон зарджыты авторты пропагандӕ ӕмӕ кӕрӕдзийы фӕлтӕрддзинадимæ зонгæ кæнынæн уавӕртӕ аразын. Фестиваль-конкурсмӕ сӕ куырдиӕттӕ балӕвӕрдтой районтӕ ӕмӕ горӕтӕй ӕдӕппӕт 14 адӕймаджы. Жюрийы уынаффӕмӕ гӕсгӕ фестивалы уӕлахиздзаутӕ ӕмӕ призон бынӕттӕ бацахсджытӕ систы Мегрелишвили Индирӕ, Тыджыты Аллӕ, Гаглойты Вячеслав, Плиты Григол, Къуезерты Фатимӕ, Теблойты Камиллӕ, Тыджыты бинонтӕ, Бикойты Светланӕ ӕмӕ Багаты Владӕ. Уӕлахиздзаутӕ хорзӕхджын ӕрцыдысты Культурӕйы министрады Кады грамотӕтӕ ӕмӕ призтӕй, ӕппӕт хайадисджытӕ та дипломтӕ зӕрдылдарӕн лӕвӕрттӕй.

14 декабры «Чермен»-ы ауагъдӕуыд «Ирон кафт»-ы республикон фестиваль-конкурс адӕмон кафтӕй, уым сӕ арӕхстдзинад фенын кодтой куыд горӕт, афтӕ районты 8 хореографион коллективы. Уыдонӕй алчи дӕр хъуамӕ сӕххӕст кодтаид фӕйнӕ дыууӕ кафты, сӕ иу ӕнӕмӕнг хъуамӕ уыдаид «Зилгӕ кафт», иннӕ та уыд ӕххӕстгӕнджытӕн сӕхи фӕндонмӕ гӕсгӕ. Хореографион коллективты ‘хсӕн фыццаг бынат жюри саккаг кодта Дменисы Культурӕйы хӕдзары ансамбль «Фидӕн»-ӕн, дыккаг бынӕттӕ адих кодтой Къостайыхъӕуы Культурӕйы хӕдзар ӕмӕ 9-ӕм астӕуккаг скъолайы коллективтӕ «Нарты Сослан» ӕмӕ «Сӕууон стъалы». Ӕртыккаг бынӕттӕ та фесты Знауыры Культурӕйы хӕдзары ансамбль «Ныфс» ӕмӕ Тъбеты хъӕууон Культурӕйы хӕдзары . Хӕдархайгӕ хореографион скъола-студийы номинацийы фыццаг бынӕттӕ бацахстой Цхинвалы Администрацийы цур ансамбль «Ирон» ӕмӕ Сывӕллӕтты сфӕлдыстадон галуаны ансамбль «Аланты сабитӕ».

Адæмон сфæлдыстады центр организаци кодта æндæр ахæм мадзæлттæ дæр.

ХУЫБИАТЫ Никъала