Тедеты Георгийы номыл Цхинвалы 1-æм музыкалон скъола зындгонд у йæ кадджын традицитæй. Советон Цæдисы рæстæджы-иу скъолайы ахуыр кæнын кæй фæндыд, уыцы сывæллæтты нымæц-иу тынг егъау кæй уыд, уымæ гæсгæ скъоламæ ахуыргæнинæгты истой конкурсы бындурыл. Йæ бакондæй фæстæмæ ацы скъолайы къæсæрæй бирæ сывæллæттæ рахызт. Уыдо-нæй бирæтæ систы зындгонд адæймæгтæ музыкæйы къабазы.
Абон дæр скъола дарддæр кæны йæ кадджын традицитæ. Ахуырадон уагдоны цы куыстуарзаг æмæ æнгом коллектив кусы, уыдон сæ зонындзинæдтæ рæдауæй амонынц сæ хъомылгæнинæгтæн. Уыдонæй сæ иу – Республикæ Хуссар Ирыстоны сгуыхт ахуыргæнæг Котолиты Тамарæ ауагъта гом урок сольфеджиойæ йæ фыццагкъласонтæн. Гом урокмæ æрбацыдысты РХИ-йы Культурæйы министрады минæвæрттæ Жуйкова Наталияйы сæргълæудæй, музыкалон скъолаты ахуыргæнджытæ. Музыкалон аивады сольфеджиойы урок нымад цæуы иууыл зындæр æмæ вазыгджындæрыл. Сольфеджиойы зарæджы ныхæсты бæсты фæдзурынц нотæты нæмттæ.
Гом урочы хайадисæг сывæллæттæ кæд нырма музыкалон скъолайы фыццаг къласы ахуыр кæнынц, уæддæр сын ныридæгæн ис хорз æнтыстытæ. Уыдон сæ хæслæвæрд сæххæст кодтой тынг хорз, цæттæдзинады бæрзонд æмвæзад равдисгæйæ. Сывæллæтты хорз цæттæдзинад банысан кодтой Культурæйы министрады минæвæрттæ æмæ фыццæгæм музыкалон скъолайы директор Тедеты Маринæ дæр. «Иууыл сæйрагдæр у уый, æмæ урокы рæстæджы сывæллæттæ иууылдæр хайад кæй истой. Зын рахатæн нæ уыд, сывæллæттимæ ахуыргæнæг тынг хорз кæй бакуыста. Стæй дæр ирдæй зыны сывæллæттæ сæ ахуыргæнæджы кæй уарзынц. Гом урок мæ зæрдæмæ тынг фæцыд, сывæллæттæ æмбæрстой дзырд цæуыл цæуы, уый. Бузныг Тамарæ Иналы чызгæн»,- банысан кодта музыкалон скъолайы директор.
Банысан кæнын хъæуы уый дæр, æмæ Котолиты Тамарæ 2012 азы ахæм гом урок музыкалон аивады историйы фæдыл бæрзонд æмвæзадыл кæй ауагъта, уый тыххæй нымад кæй æрцыд РХИ-йы Культурæйы министрады хаххыл азы хуыздæр ахуыр-гæнæгыл.
«Сольфеджио у музыкæзонынады бындур. Ахуыргæнинаг сольфеджио хорз куы бамбара, хорз æй куы базона, уæд ын дарддæр ахуыр кæнын æнцондæр уыдзæн. Ахуыргæнæг сывæллонæн хъуамæ бамбарын кæна музыкæ теоретикон æгъдауæй куыд æнкъарын хъæуы, уый. Сывæллæттæ хъуамæ хатой гаммæты кæрæдзийæ куыд хицæн кæнын хъæуы. Мæнмæ гæсгæ, махæн уый саразын нæ къухты бафтыд æмæ нæ гом урок уагъд æрцыд æмбæлон æгъдауыл», – загъта Котолиты Тамарæ.
Уыцы бон ацы скъолайы æвзонг ахуыргæнæг Коцты Индирæ та гом урок ауагъта фортепианойæ 2-æм къласы ахуыргæнинаджы хайадистæй.
Банысан кæнын хъæуы уый дæр, æмæ музыкæйы ахæм гом уроктæ уагъд кæй æрцæудзысты республикæйы æппæт музыкалон скъолаты дæр. Æввахс рæстæджы та гом урок уагъд æрцæудзæн Дзауы поселочы музыкалон скъолайы.
Джиоты Е.
Comments are closed, but trackbacks and pingbacks are open.