Зæрдæйæн æхсызгон вæййы, дæ постхæссæг дæм газеттæ æмæ журналтæ куы æрбадæтта. Уый фæстæ æрбадтæ æмæ сæ кæсыс цымыдисæй, алыхуызон цаутæ дæ акодтой æввахс æмæ дард бынæттæм. Иудзырдæй, базонгæ дæ семæ, райстой алыгъуызон информаци æмæ баззадтæ райгондæй. Ахæм æнувыд газеткæсджытæ нæ республикæйы дæр дзæвгар сты æмæ кæддæриддæр рафыссынц æмæ кæсынц бынæттон мыхуыры фæрæзтæ. Раст у, кæд раздæры азты хуызæн ныртæккæ сæ нымæц фæкъаддæр, уæддæр сын нырма ис иузæрдион хæлæрттæ, нæ сыл исынц сæ къух æмæ сæм фенхъæлмæ кæсынц æнæрхъæцæй. Бацымыдис кодтон, ацы аз бынæттон периодикон мыхуыр нæ республикæйы цæрджытæ куыд рафыстой, уымæ. Уый тыххæй бахатыдтæн «Хуссар Ирыстоны мыхуыр цæдис»-ы агентады хистæр Саулохты Зоямæ æмæ мын уый афтæ радзырдта:
– Бынæттон мыхуыр рафыссыны куыст дарддæр цæуы æмæ йæм мах нæхи бацæттæ кодтам зæрдиагæй. Ацы азы фыццаг æрдæгæн уал бынæттон газеттæ æмæ журнал рафыссыны бæрæггæнæнтæ сты ахæм: газет «Хурзæрин» рафыстой 1021, «Южная Осетия» – 1365, «Республика» – 2168 æмæ журнал «Фидиуæг» рафысджыты нымæц та у 661. Кæй зæгъын æй хъæуы, ацы нымæцтæ нырма бынтон кæройнаг не сты, уымæн æмæ газеттæ дарддæр дæр фысдзысты. Саулохты чызг ма куыд банысан кодта, уымæ гæсгæ уагдæттæ æмæ организациты разамонджытæ хъуамæ кæной æмбарынгæнæн куыст сæ дæлбаруæвæг кусджыты ‘хсæн, цæмæй сæ алчи дæр рафысса æмæ кæса бынæттон периодикон мыхуыры фæрæзтæ, уæлдайдæр та газет «Хурзæрин».
ХУЫБИАТЫ Никъала
