Фæнды мæ æрдзурын 2017 азы фыццаг æмбисæн бынæттон периодикон мыхуыры фæрæзтæ рафыссыны кампани куыд ацыд, уый тыххæй. Фæлæ уал нырма ирон æвзаджы тыххæй. Нæ мадæлон æвзаг нæ хæзна, нæ удлæууæн кæй у, уый  бирæтæ нæ бамæбрстой гуырдзиаг-ирон ныхмæлæуды дæргъвæтин азты фæстæ дæр, æмæ йæ искуы бамбардзысты, уый  дæр дызæрдыггаг у.

Ацы уац ныфыссын мæ тынгдæр сразæнгард кодта, æрæджы æвдисæн цы цауæн сдæн, уый. Хъуыддаг уый мидæг ис, æмæ мæ сыхæгтæй цалдæр сылгоймаджы кусынц хуыйæн фабрикæ БТК 4-йы. Æрæджы мын сæ иу афтæ зæгъы, зæгъгæ, дам, нын куысты рафыссын кодтой бынæттон газеттæ. Æз бацымыдис кодтон, цы газеттæ сын рафыссын кодтой, уымæ. Уый мын загъта, зæгъгæ, нæ фæрсгæ дæр нæ бакодтой, кæй цы газет хъæуы, уый тыххæй. Фæлæ сын цы газеттæ рафыстой, уый фæбæрæг, постхæссæг газеттæ куы æрбахаста, уæд. Иу бон куыстæй хæдзармæ куы æрбаздæхтæн, уæд асинты æнцойгæнæныл æвæрдæй баййæфтон газеттæ. Уайтагъд сæ мæ къухмæ райстон, æмæ та фыр-мæстæй мæ зæрдæ фæцæйскъуыд. Цыппар газет дæр уыдысты «Южная Осетия»-тæ.

Æвæццæгæн, фабричы кусджытæн газеттæ чи рафыссын кодта, уымæй айрох, кæнæ та йæ бынтондæр нæ, зоны нæ республикæйы ирон газет «Хурзæрин» дæр мыхуыры кæй цæуы, уый. Бацымыдис кодтон фабрикæйы кусджытæн æр-мæст уырыссаг æвзагыл уагъдцæуæг газет чи рафыссын кодта, уымæ, æмæ бацыдтæн агентад «Югосетпечать»-ы директор Саулохты Зоямæ. Уый мын куыд загъта, афтæмæй фабрикæйы кусджытæ æдæппæтæй газет «Южная Осетия»  рафыстой 216 экземпляры, «Хурзæрин» та иу экземпляр дæр нæ рафыстой. Фæлæ, зæгъ, сын газеттæ чи рафыссын кодта, уый нæ зонын. Саулохты чызг мын радзырдта, иумиагæй бынæттон периодикон мыхуыр рафыссыны хъуыддаг куыд ацыд, уый тыххæй дæр. Цæвиттон,  16 февралмæ æдæппæтæй газет «Хурзæрин» рафыстой 1424 экземпляры, «Южная Осетия» – 2466 экземпляры, «Республика» – 2373 экземпляры æмæ журнал «Фидиæуг» та – 740 экземпляры. Республикæйы алы районы дæр ирон газет «Хурзæрин» рафыстой иууыл къаддæр. Уæдæ, ацы бæрæггæнæнтæй зыны, нæ мадæлон æвзагæн куыд аргъ кæнæм, уый.

Ацы аз апрелы мæйы нæ республикæйы уагъд æрцæудзысты Президентон æвзæрстытæ. Ныридæгæн Президенты бынатмæ сæ кандидатурæтæ ра-размæ кодтой цалдæр адæймаджы. Тынг мæ цымыдис кæны, уыцы кандидатурæтæ бирæтæ ирон газет рафыссынц æмæ йæ кæсынц, æви нæ, уый. Кæй зæгъын æй хъæуы, уый зын базонæн нæ, æмæ йæ æнæмæнгæй сбæрæг кæндзыстæм. Ирон газет чи нæ исы, йæ мадæлон æвзагæн чи нæ аргъ кæны, уый Ирыстонæн, йæ радтæг адæмæн хорзæй цы хъуамæ сараза. Ау, 20 азы дæргъы нæ сагсур лæппутæ сæ Ирыстоны сæрыл кæй тох кодтой, се ‘взонг цард сæ радтæг ирон адæмы сæрыл кæй æрхастой нывондæн, уый цæмæн ферох бирæтæй. Ирыстоны ирон æвзагæн,  ирон мыхуырæн куынæ аргъ кæнæм, уæд ма цæй тыххæй тох кодтой нæ хъæбатыр лæппутæ. Ау, афтæ цы схъал стæм, æмæ нæ мадæлон æвзагыл газет кæсын нæ сæрмæ мауал хæссæм?! Хъуамæ алы адæймаг дæр æмбара, мадæлон æвзаджы хъысмæт æппæтæйдæр æхсæнадæй, нæхицæй, ирон адæмæй кæнгæ кæй у, уый. Кæй зæгъын æй хъæуы, афтæ зæгъæн нæй æмæ йыл ничи кусы, никæйы æндавы, фæлæ æмхуызонæй куынæ кад кæнæм æмæ куынæ аргъ кæнæм нæ мадæлон æзагæн, стыр Къостайы æвзагæн, уæд нæ хъуыддæгтæ зæрдæйы фæндиаг никуы уыдзысты. Никуы мæ рох кæны ирон адæмы номдзыд фырт Абайты Васойы фæдзæхст: «Бæлас акæлы, йæ уидæгтæ йын зæххæй куы стонай, уæд. Æвзаг амæлы, йæ уидæгтæ йын бинонты ‘хсæн куы сыскъуынай, уæд. Уымæ гæсгæ, ирон лæг, де ‘взаг хъахъхъæн дæ бинонты ‘хсæн».

Нæ зæрдыл æрлæууын кæнæм ирон адæмы аккаг фырт Колыты Аксойы ныхæстæ: «Нæ фæл-тæртæ цæмæй хорз хъомыл кæной, цæмæй сæ мадæлон æвзаг уарзой, уый тыххæй хъæуы ахуыр æмæ разæмдзыд бинонтæ… фыццаджы-фыццаг-дæр та – размæдзыд сылгоймаг-мад». О, алцыдæр сæйрагдæр мадæй цæуы, бинонтæй.

 

Ирон æвзаджы фарн дæр саби бинонтæй хъуамæ банкъара. Хæдзары саби ирон ныхас куынæ хъуса, йæ ныййарджыты мадæлон æв-загыл уагъдцæуæг газет кæнæ журнал кæсгæ куынæ уына, уæд уый дæр мадæлон æвзагæн нæ аргъ кæндзæн, æцæг уарзтæй йæ нæ уарз-дзæн. Хъуамæ рох макæмæй уа, æвзагыл цас фылдæр дзурой, фыссой æмæ кæсой, уыйас фидардæр кæй кæны, уый. Хъыгагæн, нæ республикæйы уагъдцæуæг газеттæй йæ тираж иууыл къаддæр вæййы газет «Хурзæрин»-æн, æмæ афтæ бирæ куы ахæсса, уæд нæ уый хорзмæ кæй не ‘ркæндзæн, уый алчидæр хъуамæ æмбара. Æндæр стыр паддзахадтау нæ чысыл бæстæйы дæр цалдæргай газеттæ мыхуыр куынæ цæуы мыййаг. Иунæг ирон газетæн уæлдай тынгдæр  кæй хъæуы кад кæнын, уый цæмæннæ æмбарæм, кæд ма йæ бамбардзыстæм?! Ирон газет рафыссыны тыххæй 330 сомы йæ цæст кæмæн нæ уарзы, уый йæ радтæг адæмы æцæг патриот куыд хъуамæ уа, ахæм адæймаг йæ хæдзары кæстæрты куыд хъуамæ схъомыл кæна сæ радтæг адæмы æцæг патриоттæй.

Министрадтæ æмæ ведомствоты сæргълæуджыты хайадистæй иу рабадты Президент Тыбылты Леонид бацамыдта, уыдон бынæттон прессæмæ фаг хъусдард кæй не здахынц,  уымæ. «Уый у хисæрмагонд цæвиттон. Куыд хъуамæ бахата къухдариуæггæнæг йæ дæлбар кусджытæм газет рафыссыны тыххæй, йæхæдæг газеттæ куынæ рафысса, уæд», – загъта паддзахады сæргълæууæг. Уый сæ куы бафарста, зæгъгæ, сæ чи рафыста бынæттон газеттæ æмæ журнал хæдзармæ, уæд дзы æвæрццаг дзуапп радтой æрмæстдæр фондз адæймаджы, кæд æмæ рабадты хайад истой 60 адæймаджы бæрц, уæд.

Газеткæсджытæн та мæ зæгъын фæнды, бахатут, бауайдзæф кæнут уæ хиуæттæй, уæ зонгæтæй ирон газет чи нæ рафыссы, уыдонмæ, цæ-мæй сраст кæной сæ рæдыд æмæ исой, кæсой æмæ кад кæной ирон æзагыл уагъдцæуæг иу-нæг ирон газет «Хурзæрин»-æн. Кæд алцыдæр фæзынаргъ, уæддæр газеты аргъ æрдæг азæн баззад 330 сомæй. Газетæн рафыссæн ис æрвылмæй дæр. Табуафси, æрбацæут «Югосет-печать»-мæ, кæнæ та газеттæ уæйгæнæн киосктæм æмæ рафыссут газет «Хурзæрин».

Джиоты Екатеринæ

Comments are closed, but trackbacks and pingbacks are open.