Советон рæстæджы республикæйы цы бирæ заводтæ уыд, уыдонæн сæ фылдæр ныххæлæттаг сты, нал кусынц. Уымæ гæсгæ адæмæн дæр куыст нæ фаг кæны. Уыцы хъуыддаг сраст кæныныл архайынц инвестортæ. Зындгонд амалхъом æмæ меценат Гуыриаты Владимиры æххуысæй ацы бонты Дзæуджыхъæуы скуыста дурыссæн завод. Уый стыр цау у Ирыстоны царды, уымæн æмæ ахæм куыстуæттæ æнæхъæн Уæрæсейы ис æрмæстдæр фондз.
Заводæн йæ цехтæ се ‘ппæт нæма скуыстой, фæлæ ныридæгæн куыстæй сифтонг кодта 400 адæймаджы, æнæхъæнæй куы скуса, уæд та дзы ваканситæ уыдзæн 1000 адæймагæн. Завод хомаг исы нæхи æрзæты гуырæнтæй æмæ аразы гранитæй алыхуызон фигурæтæ, асинтæ, скульптурæтæ, къултæсæрдæн æрмæг…
Заводы инвестор Гуыриаты Владимир куыд зæгъы, афтæмæй куыстуаты продукци фыццаджыдæр хъæуы нæхи, уæлдайдæр «Мамысон»-ы æмæ тематикон парк «Аланийы арæзтад куы райдайа, уæд. Фæлæ йæ иннæ цехтæ дæр куы скусой, уæд дзы уæйгæнæн уыдзæн суанг фæсарæнтæм дæр.
Уымæй дарддæр, кæронмæ фæхæццæ кæны Алагиры ног куыстуат. Уым уаддзысты ахæм хомаг, кæцыйæ аразынц медицинон препараттæ. Уый канд куысты бынæттæ нæ ратдзæн, фæлæ стыр ахъаз фæуыдзæн республикæйы медицинон кусæнгæрзтæй ифтонг кæнынæн.
Ноджыдæр ма ацы мæй Дзæуджыхъæуы скусдзæн хуыйæн фабрикæ. Райдайæны хуыйдзысты скъолайы æмæ æфсæддон дарæс, фæстæдæр куыстуат рауæрæх уыдзæн. Куысты бынæттæ дзы уыдзæн 700 адæймагæн.
ÆРДЗОН ФЫДБЫЛЫЗТÆМ – ЦÆТТÆ
Уалдзæгы æрбалæудимæ райдайынц æрдзон фыдбылызтæ дæр. Тыхджын дымгæ æмæ тæркъæвдаты фæстæ цы уавæр сæвзæры, уый нымайгæйæ сæрмагонд службæтæм фæсидт республикæйы Хицауады Сæрдары хæдивæг Томайты Ирбег. Уый амынддзинæдтæ радта, фарстамæ бар чи дары, æппæт уыцы ведомствоты разамонджытæн.
– Æппæт сæрмагонд службæтæ дæр хъуамæ æвæстиатæй цæттæ уой алыхуызон æрдзон фыдбылызты фæстиуджытæ аиуварс кæнынмæ. Дымгæ æмæ тæрккъæвдаты аххосæй хæдзæрттæм нуазыны дон, электрон тых куы нæ уал фæхæццæ кæны, сæ хæдзæртты сæртæ сын куы сисы, сæ тыллæг сын куы фесафы, уæд уый адæмы тынг батыхсын кæны. Уый æдзухдæр уæ зæрдыл дарут, æмæ æппæт хъарутæй дæр архайут, цæмæй æрдзы фыдмитæ цыбыр рæстæгмæ иуварсгонд æрцæуой. Ивгъуыд аз æрдзон фыдбылызты фæстиуджытæ рæстæгмæ иуварсгонд кæй нæ ‘рцыдысты, уый бирæ фæкъуыхцы кодта иуæй-иу районты быдыры куыстытæ, хæдзæртты стыр хай та дæргъвæтин рæстæг æнæ рухс æмæ донæй баззадысты. Æрæджы тæрккъæвда куы уыд, уæд та, канализацитæ фаг кæй нæй, чи дзы ис, уыдон дæр иууыл куыд æмбæлы, афтæ кæй нæ кусынц, уый аххосæй, горæт доны бын фæцис, стыр знаггæдтæ ракодта. Ахæм хъуыддагæн ныр æруадзæн нал ис. Алчидæр бавналæд йæ размæ æвæрд хæстæм, – фæнысан кодта Томайы-фырт.
Ныртæккæ æмбæлон службæтæ бæрæг кæнынц ихæхсæн хæцæнгæрзты æмæ горæты канализациты уавæр. Специалисттæ та фидар кæнынц цæугæдæтты былтыл цы дамбæтæ ис, уыдоны, цæмæй къæвдайы рæстæг цæугæдонæн ратонынæй тас ма уа.
«ТБАУ» СУЫДЗÆН ЗЫНГÆ БРЕНД
Цæгат Ирыстоны Æвæрд хъæды 300 метры бæрзæндæй чи цæуы, уыцы хæххон экологон сыгъдæг дон «Тбау» исы æмæ йæ æвгты бæстон кæны компани «Бавария». Суадоны дон у алыхуызон микроэлементтæй хъæздыг. Ацы доны ахадындзинад нымайгæйæ, Мæскуыйы футболон клуб «Локомотив»-ы генералон директор Григорий Ботвинин æмæ «Тбау» уадзæг компани «Бавария»-йы коммерцион директор Абойты Зауырбег бафыстой æмгуыстады бадзырд. Бадзырды фæлгæтты «Тбау» нуа-зыны донæй ифтонг кæндзæн клубы æппæт командæтæ æмæ структурæты. Клубы фæлгонц æмæ футболистты дзаумæтты хуызты сæрмагонд æвгты рауадздзæн дон, кæцы æрвыст цæудзæн Уæрæсейы алы регионтæм. Материалон æххуыс сын кæндзæн алыхуызон мадзæлтты.
Футболы разамынд дæр сæ рады архайдзысты донæн хуыздæр рекламæ скæныныл. Командæ кæм фæнды ма хъаза, уæддæр логотип «Тбау» футболы рæстæджы конд уыдзæн стадионы алы къуымты. Футболистты майкæтæн сæ номырты сæрмæ та фыст уыдзæн бренд «Тбау».
Клуб æмæ компанийы разамонджытæ куыд хъуыды кæнынц, афтæмæй ацы æмгуыстадæн хорз ахадындзинад ис у дыууæ ‘рдыгæй фарс дæр.
Нæ уацхæссæг
Comments are closed, but trackbacks and pingbacks are open.