Дзæуджыхъæуы байгом фыццаг Алайнаг гимназ. Ахуырады къабазы ацы проект уыд ахсджиаг, æмæ йæм æнтыстджынæй бацæттæ кодтой. Цымыдисаг уымæй у æмæ дзы æппæт предметтæ скъоладзаутæ ахуыр кæндзысты ирон æвзагыл. Сæ уæлæдарæс дæр уыдзæн национ хуызы. Йæ гом кæныны цытджын æмбырдмæ æрбацыдысты ахуырдзаутæ, сæ ныййарджытæ æмæ уазджытæ.

«Цæмæй зонындзинæдтæ уа, ууыл хъæуы бирæ бакусын, – загъта республикæйы Сæргълæууæг Битарты Вячеслав æмæ йæхæдæг ныссагъта гимназы кæрты фæткъуы тала.

Нырма уал гимназы ис дыууæ фыццаг къласы. Ам ахуыр кæндзысты æрмæст Дзæуджыхъæуы сабитæ нæ, фæлæ республикæйы районтæй дæр. Сы-вæллæттæн сарæзтой хорз уавæртæ, суанг хуыссæнуæттæ дæр хицæнтæй – лæппутæн æмæ чызджытæн. Алайнаг гимназы ахуыр кæндзысты къуыри фондз боны. Фæлæ сабаты та кæй фæнды, уыдонæн сæ бон уыдзæн сæ рæстæг æрвитын алыхуызон сфæлдыстадон къордты.

Алайнаг гимназы ахуыры рæс-тæг хицæн кæндзæн иннæ ахуыргæнæндæттæй. Сабитæ цæудзысты фыццаг урокмæ чысыл раздæр. Республикæйы министрады куыд зæгъынц, уымæ гæсгæ, Алайнаг гимназ  у фыццаг ахуырадон уагдон, кæцы æнæмæнгæй феххуыс уыдзæн нæ мадæлон æвзаг æмæ нæ адæмон традицитæ бахъахъхъæнынæн.

Нæ уацх.

Comments are closed, but trackbacks and pingbacks are open.