ФУТБОЛ

Бетсити – Уæрæсейы Кубокы æрдæгфиналмæ ахызт Ирыстоны сæйраг футболон командæ «Алани». Дзæуджыхъæуккæгтæ Грознæйы фысымиуæг кодтой Санкт-Петербурджы «Зенит»-æн. Специалистты прогнозтæм гæсгæ иууылдæр æнхъæл уыдысты уæлахиз кæй бафтдзæн Уæрæсейы чемпионы къухты. Фæлæ алайнæгтæ æмæ сæ спортуарзджытæ уыцы хъуыдыимæ разы нæ уыдысты. Гогниты Спартакы футболисттæ фыццаг минуттæй хъазын райдыдтой активонæй. Стыр тыхтæй цыдысты размæ æмæ фембæлды фылдæр хай архайдтой сæ ныхмæлæууæг командæйæ хуыздæр. Хъазты 56-æм минутыл «Алани»-йы размæбырсæг Гуырцъыты Батразæн бантыст хыгъд байгом кæнын. Уазджыты тренертæ ивындзинæдтæ бахастой сæ командæйы скондмæ. Хъазæн фæзмæ ног рахизгæ футболисттæн сæ бон ссис нырма хыгъд сæмхуызон кæнын æмæ фæстæдæр та дыккаг пурти бакъуырын. Фæлæ алайнæгтæ равдыстой фидар удыхъæд. Хъазты уæлæмхас рæстæджы «Алани»-йы æрдæгхъахъхъæнæг Николай Гиоргобиани тынг хорз сæххæст кодта иварон цæф æмæ хыгъд ссис 2:2. Афтæмæй уæлахиздзау сбæрæг кæныны тыххæй командæты бахъуыд 11-метрон цæфты сери æххæст кæнын. Ам тынг хорз йæхи равдыста дзæуджыхъæуккæгты кулдуаргæс Ростислав Солдатенко, кæцы ныхмæлæууæг командæйы футболисттæ цы 7 пенальти сæххæст кодтой, уыдонæй æрцахста дыууæ пуртийы. Алай-нæгтæ та бакъуырдтой 6 пуртийы. Афтæмæй пенальтитæм гæсгæ 6:5 хыгъдæй фæуæлахиз «Алани».

Фембæлды фæстæ дзæуджыхъæуккæгтæн раарфæ кодта РЦИ-Аланийы Сæргълæууæг Сергей Меняйло, кæцы уыд стадионы æмæ спортуарзджытимæ иумæ цин кодта командæйы æнтыстыл.

Дыккаг бон хæлттæппæрсты фæстиуæгæн фæбæрæг Бетсити – Уæрæсейы Кубокы æрдæгфиналы «Алани»-йы ныхмæлæууæг. 11-æм майы дзæуджыхъæуккæгтæ хъаздзысты Мæскуыйы «Динамо»-имæ.

Хуриты Батрадз