Мыхуыры рацыд журнал «Фидиуæг»-ы 4-æм номыр.
Журнал йæ фыццаг фарсыл мыхуыр кæны поэт Чехойты Оляйы æмдзæвгæ «08.08.08». Ирон литературæмæ аккаг æвæрæн чи бахаста, уыцы фысджытæй иу у Гафез. Ацы аз йæ райгуырдыл æххæст кæны 110 азы. Уый цытæн ын журнал мыхуыр кæны йæ къам æмæ йæ радзырд «Сæмпи». «Гафезы тыххæй загътой» – ахæм рубрикæйы бын журнал мыхуыр кæны Дзугаты Георги, Нафи æмæ Булкъаты Михалы мысинæгтæ Гафезы тыххæй.
Номдзыд ирон фыссæг Тедеты Рюрикыл сæххæст 85 азы. Уый оххыл ын журнал мыхуыр кæны йæ къамтæ æмæ йе ‘мдзæвгæтæ: Тедеты Рюрикы царды æмæ уацмысты тыххæй сæ хъуыдытæ зæгъынц ирон фысджытæ, Букуылты Алыкси, Цхуырбаты Иван, Дудайты Чермен, Цхуырбаты Мери, Хъодалаты Герсан, Серго Миндиашвили, Наниты Асиат æмæ Рюрикы чызг Тедеты Роксанайы.
Зынгæ ирон фыссæг Хуыгаты Сергейыл 90 азы сæххæсты цытæн журнал мыхуыр кæны йæ къамтæ æмæ йе ‘мдзæвгæтæ. Афтæ ма Наниты Асиаты арфæйы ныхæстæ «Бузныг, Сергей!», зæгъгæ, ахæм сæримæ.
Журналкæсæг ма зæрдиагæй бакæсдзæн Годжыцаты Неллийы мысинæгтæ Æлборты Хадзы-Умары тыххæй. Журнал мыхуыр кæны Хадзы-Умары æмдзæвгæтæй дæр иу цалдæр.
«Ног нæмттæ» – ацы рубрикæйы бын та мыхуыр æрцыдысты Хаситы Вильгельм æмæ Пухаты Игоры æмдзæвгæтæ. Ацы автортæ поэзимæ æрбакодтой фыццаг къахдзæфтæ æмæ Хуыцау зæгъæд, цæмæй поэзийы ссарой аккаг бынат.
Поэзийæ ма журнал мыхуыр кæны Хъæцмæзты Азæ, Кокойты Эльзæ, Джиоты Павел, Дзæгъиаты Мария, Къозонты Жаннæ, Мæргъиты Ирбег æмæ Чехойты Алыксандры æмдзæвгæтæ.
Прозæйæ журнал мыхуыр кæны Остъаты Аланы уацау «Сау тымыгъ»-æй скъуыддзаг. «Нæ чысыл хуртæн», зæгъгæ, ацы рубрикæйы бын журналкæсæг бакæсдзæн Джыгкайты Беллæйы аргъау «Бирæгъы зæрдæ».
Рубрикæ «Чингуыты тæрхæгыл» нæ Дыгъуызты Дали зонгæ кæны зынгæ ирон ахуыргонд Кокайты Теймуразæн æрæджы мыхуыры цы чиныг рацыд «Уырыссаг –ирон энциклопедион дзырдуат», зæгъгæ, уый мидисмæ.
Ацы рубрикæйы бын ма мыхуыр æрцыды Мзокты Асланбегæн «Уарзæгой зæрдæйы лæвар», зæгъгæ. Ам Асланбег лæмбынæг æрдзырдта Коцты Юляйы чиныг «Æрдхæрæны зарæг»-ы тыххæй. Чиныджы дзырд цæуы нæ дзæнæттæг Хаджеты Таймуразы цард æмæ сфæлдыстады тыххæй.
«Мысинаг-фыссинаг»-ы бынмæ мыхуыр æрцыд Гæбæраты Екатеринæйы уац, «Номдзыд дохтыры мысгæйæ», зæгъгæ.
Рубрикæ «Сфæлдыстадон бынтæ»-йы журнал мыхуыр кæны Серго Миндиашвилийы радзырдтæ «Хуыцау бæрзондæй кæсы» æмæ «Сабибонты фарн – зæрыбонты фарн».
Нæ уацх.
