2022-æм азы Инвестпрограммæйы фæлгæтты цы мадзæлттæ æххæст æрцыд, уыдоны æмрæнхъ куыст цыдис республикæйы ног электронымайæнтæ сæвæрыныл дæр. Йæ нысан — электрохæххытыл электроэнерги дæттыны рæстæджы технологон сæфтытæ фæкъаддæр кæнын.
«Бæрæг куыд у, афтæмæй рухс фидыны дисциплинæ æнæуый дæр бæллиццаг нæу. Уый хыгъд ма, электроэнерги сæфы хызæгтæй дæр. Хардзгонд электроэнерги рациалонæй нымад нæ вæййы, уымæн æмæ иуæй-иутæ алыгъуызон махинацитæ кæнынц, цæмæй сæ рухс æмæ газы хæстæ ма фидой. Фиддонты дисциплинæ фæхуыздæр æмæ электроэнерги чи давы, уыдоны нымæц фæкъаддæр кæныны тыххæй райстой ацы программæ. Нырыккон нымайæнтæ, автоматикон æгъдауæй, „Энергохызæг — Хуссар Ирыстон“-ы сервермæ дæтдзысты бахардз электроэнергийы зонæнтæ. Уый хорз ахъаз уыдзæн, контролертæ нал зилдзысты хæдзари-хæдзар, электроэнергийы сæфтытæ та фæкъаддæр уыдзысты. Ныртæккæ куыстытæ цæуынц микрорайон Шанхайы, уый фæстæ ахиздзыстым Гудзабар æмæ Цæрæн массивмæ. Æндæр районты дæр ног автоматикон нымайæнтæй сифтонг кæндзысты. Цадæггай ифтонг æрцæудзысты районтæ се ’ппæт дæр», — радзырдта нын «Электрохызæджы» сæргълæууæг Гæбæраты Анатоли.
Ног электронымайæнтæм ма ис ахæм хорздзинад дæр, фиддонтæ æгæр куы сбирæ уой, бæрæг лимитæй куы схизой, уæд абонент электрохызæгæй автоматикон æгъдауæй ахицæн уыдзæн. Ныртæккæ дæр, республикæйы электроэнергийы службæйы кусджытæ бæргæ бамбарын кæнынц, фиддонтæ афоныл куы нæ фидой, уæд сæ кæй ахицæн кæндзысты, фæлæ, хъыгагæн, бирæтæ уыцы ныхæстæ мурмæ дæр нæ дарынц. Цалынмæ сын сæ рухс нæ ахицæн кæ-нынц, уæдмæ контролер бафæдзæхсы бинонты. Уый фæстæ сæм бацæуы офи-циалон гæххæт. Дæс боны фæстæ электрохызæджы кусджытæн бар ис абоненты ахицæн кæнын. Хъыгагæн, æрмæстдæр уæд райдайы абонент агурын мадзæлттæ. Хатт, иуæй-иутæ лæбурдтытæ æмæ æртхъирæнтæ дæр фæкæнынц. Уымæ гæсгæ контролертæ семæ акæнынц барадхъахъхъæнæг органты кусджыты, цæмæй сæ фæрцы конфликт иуварс æрцæуа. Электрохызæджы кусджытæ куыд зæгъынц, афтæмæй æрвылкъуыри дæр бахъæуы 2-3 дебиторы ахицæн кæнын. Уый фæстæ, инструкцимæ гæсгæ, коммуникацитæм ногæй баиу кæнынæн хъуамæ бафида уæлæмхас æхца. Бирæхатт та сæ хъуыддаг бахауы тæрхондонмæ æмæ сын уым рафыссынц ивартæ.
«Энергоресурс»-ы куыстуатыл негативонæй æндавынц цæрджыты рухс æмæ газы фиддонты хъуагдзинæдтæ. Абоны онг электроэнергийы хæс ахызт 18 милуан сомæй. Хъуамæ ма рох кæнæм, цалдæр азы размæ дæр ацы лæггæдтæй цух кæй уыдыстæм. Уæрæсейы Федераци нæ республикæмæ цы ахаст дары, уымæн æнæмæнг хъæуы аргъ кæнын. Кæддæрты æнæнхъæлæджы рухс куы ахуыссы, уæд адæм катайы бахауынц. Кæд та, зæгъгæ, аваритæ æрцыд электроадæттæн хаххыл. Нæ адæм хорз æмбарынц, æнæ электроэнергийæ куыд зын у цæрын ныры дуджы. Фæлæ, алчи не ’мбары кæнæ та йæ нæ фæнды бамбарын, бахардзгонд электроэнерги фидын кæй хъæуы. Ахæм бæстæ нæй æмæ йæ кæм нæ фидынц. Хъуамæ алчидæр йæ бæрндзинад æнкъара Уæрæсейы Федерацийы раз. Рох кæнын нæ хъæуы нæуæдзæм азты блокадæйы зындзинæдтæ…
Уазæгты Марфа
