Æгас æрцæуай,
Нæ цъæх наз бæлас.
Ды нæм æрхастай
Бæллиццаг Ног аз.
Ахæм æнгæс зарджытæ та рæхджы айзæлдзысты Ногазон назбæласы алыварс. Уымæй дарддæр ма кæстæртæ бæрæгбоны цытæн дзурдзысты æмдзæвгæтæ ирон æмæ уырыссаг æвзæгтыл, кафты номыртæй хъæлдзæг кæндзысты сæхи, æмæ ногазон хъазтизæрмæ чи æрбацæуа, уыдоны зæрдæтæ дæр.
Ногазон бæрæгбон куыд ацæудзæн Цхинвалы районы иумиагахуырадон скъолаты, уый тыххæй нын радзырдта администрацийы адæмон ахуырады хайады сæргълæууæг Козаты Олег. Фыццаджыдæр æй районы æппæт цæрджытæн бафæндыд æнæниздзинад, зæххыл æрфидар уа сабырад. Куыд загъта, афтæмæй назбæлæстæ уыдзæн алы скъолайы дæр, 26 декабрæй сын уыдзысты зымæгон улæфтбонтæ, æмæ уымæ гæсгæ, бæрæгбонон мадзæлттæ райдайдзысты раздæр. Районы ис 10 скъолайы: Арцеу, Гром, Бихъар, Хелцуа, Сатихъар, Дменис, Тъбет, Къостайыхъæу, Зар æмæ Рустауы, дыууæ та дзы ис сывæллæтты рæвдауæндæттæ Дменис æмæ Къостайыхъæуы. Ногазон назбæлæсты ахуырдзаутæ сæ ахуыргæнджыты разамындæй сфæлындздзысты рæсугъд æмæ сын сæ алыварс кæндзысты зарджытæ, дзурдзысты æмдзæвгæтæ, æвдисдзысты сæ аивад алыгъуызон кæфтытæй. Ахуырады министрад сын цы лæвæрттæ радта, уыдон байуардзысты алы скъолайы дæр æмæ сæ уыдон та ратдзысты ахуыргæнинæгтæн.
Хуыбиаты Никъала
