Æппæтсезонон хæххон-рекреацион комплекс «Мамысон»-мæ фæндагыл тъунелмæ фæндаджы реконструкцийы куыстытæ кæронмæ фесты. Уый тыххæй йæ Телеграм-каналы фехъусын кодта РЦИ-Аланийы Сæргълæууæг Сергей Меняйло.
«Реконструкцийы фæдыл куыстытæ кæронмæ фесты, æввахс рæстæджы официалонæй байгом кæндзыстæм объекты. Ныр мах райстам нырыккон тъунел, кæцы æххæстæй æмбæлон у бæлццæттæ ласыны домæнтæн æмæ ифтонг кæны змæлды æдасдзинад», — банысан кодта Сергей Меняйло.
Тъунел у «Мамысон»-мæ фæндагыл ахсджиагдæр объекттæй иу. Уый айгæрстой 1980 азы Зæрæмæджы гидроэлектростанцы арæзтады рæстæджы. Тъунелæн куыд технологон, афтæ йæ габариттæм æмæ техникон ифтонгадмæ гæсгæ нæ уыд бæлццæттæласæн транспорты змæлды нысан.
«Мамысон»-ы курорты арæзтады фæрцы республикæйы туризм уыдзæн азы алы афон дæр. Зымæджы гæнæн уыдзæн къахдзоныгътыл бырын. Сæйраг сезон уыдзæн уалдзæджы æмбисæй фæззæджы æмбисмæ. Азы алы рæстæджы дæр туристтæн фадат уыдзæн Ирыстоны ног фарсæрдыгæй базонын æмæ йын йæ рæсугъддзинад фенынæн.
