Нæ горæты цæрджытæй бирæтæ се ’рвылбонон архайды пайда кæнынц газы электронон агтæ æмæ колонкæтæй. Хицæнтæй сисгæйæ, агтæ фылдæр хатт сæвæрынц цæрæн хæдзары астæрды уæлæ, колонкæтæ та кæмфæнды дæр æвæрынц — хæдзары хицауы цы бынаты бафæнды, стæй æнцонвадатдæр кæм у, уым. Колонкæтæ сты дыууæ хуызы: сæ иутæ æрмæст дон хъарм кæнынц, иннæтæ агъуыст дæр, дон дæр тæвд кæнынц. Сæ асмæ гæсгæ сты чысылтæ дæр æмæ стыртæ дæр.

Фæлæ зæгъын хъæуы, алцыдæр хатт йæ куыстæй кæй æрлæууы, цыдæр дзы нывыл кæй нал вæййы, уый аххосæй æмæ уæд нал феххæст кæны йæ хицауы домæнтæ.

Цæмæй уыцы згъуыдтæй хызт уа æмбæстаг, дарддæр йæ куыст æххæст кæна колонкæ кæнæ аг, уый тыххæй нæ горæты Цардуагон лæггæды хæдзары ис, чи сæ сифтонг кæны дарддæры куыстæн, ахæм лæг. Уый та у Джиоты Роланд. Ацы бынаты фæллой кæны æртыккаг аз, æххуыс ма йын кæны йе ’фсымæр Ирбег дæр. Джиойы фырт ацы дæсныйадыл сахуыр кодта Уæрæсейы. Куыд загъта, афтæмæй ахуыр чи фæкæны, уымæн вæййы семинартæ, кæд ахуыры программæйы кæронмæ базонай, уæд сын дæттынц лицензи, кæннод та ногæй райдай ахуыр кæнын, кæд ма дæ бафæнда, уæд. Джиойы фырт дæсныйад райсыны фæстæ бакуыста Уæрæсейы горæтты дæр, фæлæ уæддæр уарзон къуым адджын у æмæ цалдæр азы размæ æрыздæхт Ирыстонмæ æмæ йæ лæггады хай кæны йæ иубæстон адæмæн.

Йæ кусæн хатæны ис сæрмагонд аппарат æмæ дзы сбæрæг кæны, колонкæ цы уавæры ис, цы дзы фехæлд кæнæ куыд у йæ куысты гъæд æмæ афтæ дарддæр. Уый фæстæ æрæвналы йæ сифтонг кæнынмæ æмæ йын боны дæргъы бантысы йе сцалцæг кæнын. Ивæн хæйттæ сфæсауæрц кæнынмæ ацæуы Уæрæсемæ, фылдæр хатт та Пятигорскмæ. Ахæм у се ’рвылбонон куыст ацы дыууæ адæймагæн æмæ се ’нувыд куыстæй рог кæнынц æмбæстæгты уавæртæ.

Хуыбиаты Никъала