Республикæ Хуссар Ирыстоны Президент Бибылты Анатоли йæхимæ райста зонæдты кандидаттæ Наталья Жуйкова æмæ Козаты Гульнарæйы, кæцытæ диссертацитæ бахъахъхъæдтой педагогикæйы фæдыл. Уыдонимæ ма уыд зонадон къухдариуæггæнæг, академик Дзæгъиаты Татьянæ. Уый бузныджы ныхæстæ загъта паддзахады сæргълæууæгæн бакæнгæ æххуысы тыххæй.
«Цытджын Анатоли Ильяйы фырт, бузныг дын де ‘ххуысы тыххæй.
Дагестаны Паддзахадон педагогон университеты диссертацион советы историйы фыццаг хатт иу боны мидæг уыд дыууæ кандидаты зонадон къæпхæн райсынмæ, кæцытæн уыд иу къухдариуæггæнæг, æмæ Хуссар Ирыстон райста дыууæ кандидаты», – загъта Дзæгъиаты Татьянæ.
Зонадон къухдариуæггæнæджы ныхæстæм гæсгæ дыууæ кандидаты дæр бахъахъхъæдтой педагогикæйы фæдыл темæтæ. Наталья Жуйкова бахъахъхъæдта хореографи амоныны фадыджы, Козаты Гульнарæ та – «Формирование и развитие инновационной образовательной среды в системе среднего профессионального обучения на примере Южной Осетии»-йы темæйыл. «Банысан кæнын мæ фæнды, Цхинвалы бирæпрофилон колледжы ахуыргæнджытæ кæй кусынц Гульнарæ Роланды чызджы методикæйæ», – банысан кодта Дзæгъиаты Татьянæ.
Президент раарфæ кодта ног кандидаттæн æмæ банысан кодта, зæгъгæ, цæттæ кæй у дарддæр дæр аспиранттæ æмæ зонадон архайджытæн æххуыс кæнынмæ.
«Бузныг уын уæ архайд, уæ тырнындзинад, уæ фæндоны тыххæй. Хуссар Ирыстон алы хатт дæр зындгонд уыд йæ ахуыргæндтæй, ныр уыдоны рæнхъытæ сымах баххæст кодтат. Махæн ис потенциал æвзонг адæмы раразмæ кæнынмæ æмæ мах уыдонæн алыварсонæй æххуыс кæндзыстæм», – загъта уый.
Фембæлды рæстæджы ма уынаффæ кодтой Хуссар Ирыстоны диссертацион совет, аспирантурæтæ æмæ докторантурæтæ саразыны фадæттыл. Паддзахады сæргълæууæг ма банысан кодта, ацы фарст актуалон кæй у æмæ йæ кæй хъæуы сахуыр кæнын æмæ среализаци кæнын.
Comments are closed, but trackbacks and pingbacks are open.