Цыппæрæмы, 27 июны, Цхинвалы банысан кодтой Фæ сивæды бон. Бæрæгбоны цытæн «Ныхас»-ы фæсивæдон къорды хъæппæрисджын уæнгтæ ногдзауты паркы ауагътой ирон кафты хъазтизæр. Фæндыры зæлтæм, зарынмæ æмæ къæрццæмдзæгъдмæ æрбамбырд сты куыд æрыгон фæлтæр, афтæ хистæртæ дæр. Хъазтизæры организатортæ куыд загътой, афтæмæй кафæн фæзмæ ацы хатт æрбацыд бæрæг фылдæр адæм. Хъазт байгом хонгæ кафтæй – ирон адæмы уæздандæр кæфтытæй сæ иуæй, уый фæстæ фæсивæд дарддæр сæ арæхстдзинад æвдыстой æндæр æмæ æндæр номыртæ æххæст кæнгæйæ. Нæртон симд, чепена, ерысы кафт – ацы æмæ æндæр рагон кæфтытæм æхсызгонæй кастысты ардæм æрбацæуджытæ.
Хъазтизæры райдайæны снысан кодтой чегърейы, уый æвзæрста кафæг къæйттæ, стæй йæ цæст дардта, цæмæй хъазт аккаг уагыл цæуа – нæ дзы уыд фехъусын хъæрæй кæнæ тызмæг ныхас, æхситт æмæ æнæпълан митæ, фæсивæды æддаг бакастæй та, хистæртæ куыд бафиппайдтой, афтæмай зæрдæ рухс кодта. Уæлдай дисы адæмы æфтыдтой æрыгон фæлтæр куыд хорз зонынц рагон ирон зарджытæ æмæ кадджытæ, уый.
Ирон кафт æмæ зардмæ цыдысты горæты уазджытæ дæр. Хъазтмæ йæ райдайæнæй кæронмæ цымыдисæй фæкаст кардзыд лæг Кокойты Хъазбег дæр æмæ зæрдиагæй æмдзæгъд кодта алы кафт æмæ зарæгæн дæр. «Ирыстоны фидæн фæсивæдæй аразгæ у. Хъазты цы æрыгон чызджытæ æмæ лæппуты федтон, уыдонмæ гæсгæ та мæ бон бæлвырдæй загъын у, нæ сомбон кæй уыдзæн рухс æмæ амондджын. Симдæй хуыздæр ма кæцы кафт æрбангом кæны адæмы? Ацы бæрæгбон махæн чи балæвар кодта, уыдоны цæрæнбон бирæ уæд, нæ хорз фæсивæд та даргъ, уæрæх кæнæт!», – загъта уый.
Ирон кафты аивдзинад ницæимæ ис абарæн: чызджыты уæздан цæстæнгас, сæ аив æмæ уæздан змæлд. Йæ фарсмæ та – ныфсджын, уæнгрог, фидар æмæ хъаруджын лæппу. Афтæ царды дæр кæрæдзийы фарсмæ сты уæздандзинад æмæ ныфс, æфсарм æмæ хъайтардзинад. Ахæм сты Ирон адæймаджы хуыздæр миниуджытæ. Уыдоныл ахуыр кæнынц кæстæрты хъазтизæр аразджытæ æмæ йæм цы хистæртæ æрбацæуынц, уыдон.
Раздæр-иу ахæм бæрæгбæттæ арæх уыд. Сæ нысан – адæмы кæрæдзийыл бæттын, хистæртæй – кæстæрмæ ирон кафты аивдзинад æмæ уæздандзинад хæссын æмæ амонын, музыкæйы æвзагæй ирон æгъдау æмæ ‘фсарм æмбарын кæнын. Ирон зарæджы алы ныхас дæр сын уыд ныстуаны хуызæн. Арæх-иу амондагур æрыгæттæ ахæм хъазтизæрты сæ цæст кæрæдзийыл æрæвæрдтой æмæ-иу сæ цард баиу кодтой. Ирон музыкæйы зæлтæм йæхи ничи урæдта, кафыдысты карджын адæм, фæсивæд, суанг ма сывæллæттæ дæр æвдыстой сæ арæхстдзинад.
Бæрæгбон хорз зæрдæйы уагыл æфтыдта алкæйы дæр. Бузныг хъазты архайджытæ æмæ организатортæн, сымах фæрцы бæрæгбон рауадис хъæлдзæг æмæ рæсугъд.
Дриаты Лейла
