Михайловскаг театры сценæйыл уагъд æрцыд 6-æм национ оперон преми «Онегин»-ы радты-ны цытджын церемони. Премийы хайад райсынмæ уагъд цыдысты ацы аз кæнæ ивгъуыд азы кæрон æвæрд спектаклтæ. Æппæт Уæрæсейæ оперон театрты æвдисæг лауреаттæ Санкт-Петербургæй ахастой 16 престижон хорзæхы. «Примадонна»-йы категорийы преми райста не ‘мзæххон, Уæрæсейы Федерацийы сгуыхт артисткæ, Цæгат æмæ Хуссар Ирыстоны адæмон артисткæ, дунеон конкурсты лауреат, оперæ æмæ балеты Новосибирскы паддзахадон театры солисткæ Джиоты Вероникæ.
Банысан кæнын хъæуы уый дæр, æмæ ацы аз преми «Онегин» фидар кæй æрцыд оперон «Оскары» статусы. 2021 азы премимæ бадæттой куырдиæтты рекордон нымæц – 98. Шорт-сыфмæ бахаудтой 24 зарæггæнæджы æмæ 9 спектаклы паддзахадон театртæ æмæ хисæрмагонд театралон компанитæй.
Джиоты Вероникæ райгуырд Хуссар Ирыстоны. 2000 азы каст фæцис Дзæуджыхъæуы аивæдты ахуыргæнæндоны вокалы кълас. 2005 азы каст фæцис Н.Римскаг-Корсаковы номыл Санкт-Петербургы консерватори вокалы кълас. Оперæ æмæ балеты Новосибирскы труппæйы архайы 2006 азæй фæстæмæ. Театры сценæйыл сæххæст кодта 20 оперон партийы: «Марфа», «Земфира», «Книягиня Урусова», «Графиния», «Леди Макбет», Виолетта» æмæ бирæ æндæртæ, афтæ ма Моцарт, Бетховены фарастæм симфони, Реквием Верди æмæ æндæр солон партитæ дæр. Вероникæйæн ис нырыккон композиторты уацмысты уæрæх репертуар, уыцы нымæцы Р.Щедрин, Б.Тишенко, М.Минкова, М.Таноновайы уацмыстæ. Оперæ æмæ балеты Новосибирскы театры труппæимæ гастролты уыд Хуссар Корея, Таиланды. Уый ма у Уæрæсейы Стыр театры фæхонгæ солисткæ дæр. Арфæ кæнæм Джиоты чызгæн ахæм престижон преми йын кæй саккаг кодтой, уый тыххæй. Нæ зæрдæ йын зæгъы фидар æнæниздзинад æмæ дарддæры сфæлдыстадон æнтыстытæ.
Comments are closed, but trackbacks and pingbacks are open.