Джиоты Алан: «Закъоны раз алчи дæр хъуамæ уа æмбар»

ПТРК «Ир»-æн интервьюйы рæстæджы Хицауады Сæрдары фыццаг хæдивæг Джиоты Алан куыд загъта, афтæмæй министрадты æмæ ведомствоты æнæзакъононæй дыууæ бынаты кусыны проблемæ скъуыддзаг цæуы фæд-фæдылонæй.

«Цалдæр бынаты чи кусы, уыцы бюджетон кусджыты иу æмæ æрдæг ставкæмæ ракæнын закъонмæ гæсгæ нæ нысан кæны адæмы куыстмызд фæкъаддæр кæнын. Ацы мадзæлттæ æххæст цæуынц Фæллойады кодексы цухдзинæдтæ аиуварс кæныны, афтæ ма 2022-2025 азтæн Республикæ Хуссар Ирыстоны социалон-экономикон рæзты паддзахадон программæ реализаци кæныны тыххæй Хуссар Ирыстон æмæ Уæрæсейы Федерацийы ‘хсæн Сразыдзинады домæнтæ æххæст кæныны нысæнттæн», – загъта Джиоты Алан.

Уый ма банысан кодта, зæгъгæ, куыстмызд фидыны ног системæмæ рахызт фадат ратдзæн, закъондæттынады фæлгæтты цы бюджетон уагдæтты цы кусджытæ кусынц, уыдоны куыстмызд бахъахъхъæнынæн æцæг бакæнгæ куысты гъæд æмæ гуырахстмæ гæсгæ. Уый тыххæй бакуыстгонд æрцæудзысты кусджыты алы категорийы куыстæн саргъ кæныны  критеритæ.

Джиоты Алан сæрмагонд хъусдард аздæхта, бынаты  æмбарынгæнæн куыст бакæнынмæ. Йæ ныхæстæм гæсгæ, алы къухдариуæггæнæг дæр хъуамæ йæхимæ райса бæрндзинад æмæ йæ кусджыты онг фæхæццæ кæна, цахæм бындурыл æмæ цæмæн хъæуы иу æмæ æрдæг ставкæйы нормæ æххæст кæнын, афтæ ма кусджытæн бамбарын кæнын, куыстмызд ног системæмæ гæсгæ куыд фыст цæудзæн уæлæмхас бафыстытимæ, уый.

«Ахсджиаг у, цæмæй закъон алкæмæн дæр куса иухуызон, закъоны раз алчи дæр хъуамæ уа æмбар. Кæй зæгъын æй хъæуы, цалдæр бынаты чи кусы, уыцы адæймæгты иу æмæ æрдæг ставкæмæ ракæнын у зын, фæлæ æндæр гæнæн нæй. Хуссар Ирыстон æмæ Уæрæ-сейы Федерацийы ‘хсæн социалон-экономикон рæзтæн ахъазгæнæг программæйы тыххæй сразыдзинады домæнтæ мах куынæ сæххæст кæнæм, уæд, гæнæн ис, æмæ уæрæсейаг фарс рахицæн кæна цъусдæр финансон æххуыс, кæнæ та йæ рæстæгмæ æрурома, гъе та йæ бынтон дæр аива», – банысан кодта вице-премьер.

Ацы фарст скъуыддзаг куы æрцæуа, уæд уый æгуыстдзинады æмвæзад фæкъаддæр кæндзæн, фæлæ цæмæй проблемæ бынтондæр иуварс æрцæуа, уый тыххæй хъæуы къорд мадзæлттæ райсын, уыцы нымæцы ног кусæн бынæттæ бакæнын.

Уымæй уæлдай ма вице-премьер фехъусын кодта, Хицауады кæй кусынц алыгъуызон фадгуыты кадрон дефициты проблемæ аскъуыддзаг кæныныл. Уыдонæй сæ иу у, дефицитон дæсныйадты фæдыл квотæтæ цы рауагъдонтæ райсдзысты, уыдонимæ сразыдзинæдтæ саразын, цæмæй уыдон республикæмæ куы æрыздæхой, уæд ифтонг æрцæуой куысты бынæттæй.