Æрбалæууы нæ уарзон, хъæлдзæг, рæсугъд æмæ диссаджы бæрæгбон – Ног аз. Алчидæр æм фенхъæлмæ кæсы зæрдиагæй, уымæн æмæ алкæй дæр ныфс ис, азæй-азмæ йæ цард хуыздæ-рæйхуыздæр кæй кæндзæнис, уымæй. Уæлдай тынгдæр та йæм фенхъæлмæ кæсынц нæ чысыл хуртæ. Уымæн æмæ уыдонæн уæлдай циндзинад æрхæссы рæсугъд фæлыст назбæлас, алыгъуызон лæвæрттæ æмæ арфæтæ райсынц се ‘ввахс адæмæй.
Цæмæй Дзауы районы цæрджытæ сæ ног 2022 азыл хъæлдзæг зæрдæйы равгимæ сæмбæлой, уый тыххæй райадминистраци бацархайдта цæрджытæн хорз бæрæгбон саразыныл. Куыд æрвылаз, афтæ та ацы бонты хъæдæй æрластой, йæ дæргъ 15 метры бæрц кæмæн у, ахæм стыр æмæ рæсугъд назбæлас. Тынг ыл фæцин кодтой, чи йæ федта, уыдон æмæ йæ знон хъæлдзæгæй сфæлындзыдтой алыгъуызон æрттиваг хъазæнтæй. Районон назбæлас æвæрд æрцыдис райцентры фæлладуадзæн парчы астæу. Ацы хъуыддаджы хайад райстой куыд администрацийы кусджытæ, афтæ цæрджытæ дæр. Дзауы администрацийы культурæйы хайады сæргълæууæджы хæстæ рæстæгмæ æххæстгæнæг Цхуырбаты Анжелæ нын куыд радзырдта, афтæмæй районы сæйраг назбæлас байгом кæндзысты ног къуыри 28-æм декабры. «Цалдæр боны фæстæ æппæт районы цæрджыты дæр хонæм нæ ногазон бæрæгбоны мадзалмæ. Нæ назбæлас йæ цырæгътæ ссудздзæнис 28-æм декабры боны фыццаг æмбисы. Ам сывæллæттæн арфæтæ кæндзысты Митын дада æмæ Митын чызг. Ардæм сæйраджыдæр æрбацæудзысты нæ районы скъолаты ах-уыргæнинæгтæ æмæ уыдон дæр равдис-дзысты цымыдисон, хъæлдзæг номыртæ, бакæсдзысты æмдзæвгæтæ дæр. Хуыцъейы астæуккаг скъолайы ахуыргæнинæгтæ фæстæдæр кæй ракодтой карантинмæ, уымæ гæсгæ дзы уыдон хайад нæ райсдзысты. Изæры та нæ бæрæгбон адарддæр кæн-дзыстæм концертон программæйæ, цыран хайад райсдзысты куыд горæты, афтæ нæ районы зарæггæнджытæ дæр. Назбæласæй дарддæр ма мах ног азмæ срæсугъд кæнæм райцентры дæр. Цыма закъазæй уыд, афтæ нæм мит дæр æруарыд æмæ та нæм уыдзæнис диссаджы рæсугъд», – банысан кодта Цхуырбаты Анжелæ.
ЦХУЫРБАТЫ Ларисæ
Comments are closed, but trackbacks and pingbacks are open.