ÆГАС НÆМ ЦУ, НОГ АЗ!

Æвæццæгæн адæмæн, уæлдайдæр сабитæн сæ иууыл уарзондæр бæрæгбон Ног аз у, фæлæ та ацы азы бæрæгбоны дæр эпидемийы уавæр чысыл йæ фæд ныууагъта.

Æрвыл аз дæр проспекты Уæлахизы фæзы 26 декабры официалон хуызы байгом вæййы рæсугъд фæлыст Ног азы наз бæлас. Уый вæййы стыр бæрæгбон цæрджытæн. Вæййы дзы алыхуызон хиирхæфсæн мадзæлттæ. Фæлæ ацы аз уавæр нымайгæйæ, ивд æрцыд ацы бæрæгбон. Наз бæлас йæ бынаты æвæрд æрцыд цалдæр боны размæ, фæлæ дзы сæрмагонд мадзæлттæ нал сарæзтой. Хъыгагæн, эпидемиологон уавæр йæ фæд ныууагъта нæ уарзон бæрæгбæтты дæр æмæ кæцыдæр традициты иуварс æвæрын бахъуыд.

Фæлæ уæддæр, горæты администраци сабитæн æрхъуыды кодта алыхуызон хиирхæфсæн мадзæлттæ «Новогодний Владикавказ», зæгъгæ, ахæм номимæ, æрмæст ковиды ныхмæ рекомендацитæ æххæст кæнгæйæ. Сæйрагдæр, парчы фæзы йæ раздæры «хæдзары» баддзæн сабиты уарзон Митын Дада йæ хъæбулы хъæбул Митæимæ æмæ йæхимæ исдзæн сабиты. Уыдон æмдзæвгæтæ радзургæйæ исдзысты лæвæрттæ. Фæзы алы бон дæр уыдзæн адджинæгты армукъа, рæстæгмæ æвæрд сценæйыл алы изæр дæр æвдыст цæудзæн концерттæ. Сæ аивад дзы æвдисдзысты республикæйы аивадон коллективтæ, æрвыл изæр гом арвы бын бакæсæн уыдзæн кинонывтæм. Кæй фæнда, уыдонæн фадат уыдзæн алыхуызон мастер-классты архайынæн. Æнæхъæн горæты уынгты зилдзысты дыууæ ретро-трамвайы бæрæгбоны фæлгонцгондæй æмæ бæлццæтты ласдзысты лæвар. Чи сæ сбада, уый бакæсдзæн кинонывтæм, бацымдзæн тæвд цай, райсдзæн адджинæгтæ.

Ацы бæрæгбоны мадзæлттæ канд проспекты нæ цæудзысты, фæлæ аххæсдзысты Дзæуджы-хъæуы бирæ уынгты.

Уымæй уæлдай, республикæйы Сæргълæууæг Сергей Меняйло профилон ведомствоты размæ сæвæрдта бæлвырд хæстæ бæрæгбоны транспорты куыст банывыл кæныны тыххæй. Куыд загъта, афтæмæй цæрджытæ транспорт хъуаг ма хъуамæ баййафой, уæлдайдæр 31 декабры æмæ 1-æм январы.

Уырны нæ, эпидемиологон гæрæнты аххосæй адæмæн сæ уарзон бæрæгбон кæй нæ фенад уыдзæн.

Нæ уацх.