Дзауы районы Сывæллæтты сфæлдыстадон галуаны кусджытæ традицимæ гæсгæ ацы аз дæр сæ хъомылгæнинæгтæн сорганизаци кодтой Цыппурсы бæрæгбоны изæр æмæ йæ хъæлдзæгæй банысан кодтой. Бæрæгбонон мадзалы хайадисджытæ уыдысты районы æппæт скъолатæй дæр. Уый тыххæй нын фехъусын кодтой галуаны къухдариуæгад.
Сывæллæтты сфæлдыстадон галуаны кусджытæ раздæр бацæттæ кодтой сæхи ацы бæрæгбонмæ, сæвæрдтой рæсугъд назбæлас, афтæ ма аив сфæлындзыдтой бæстыхай дæр æмæ йæ уындæй адæймаджы зæрдæ радис. Мадзалмæ чи фæуазæг ис, уыцы сывæллæттæ сæ ныййарджытимæ стыр æхсызгонæй æмбæлдысты ацы рæсугъддзинадыл. Сывæллæттæ сæ бæрæгбонон мадзал райдыдтой ногазон арфæтæ æмæ музыкæйы зæлтæй. Мадзаламонæг Касаты Дзерассæ уазджыты зæрдыл æрлæууын кодта Цыппурсы бæрæгбоны фæзынды истори, цавæр нысаниуæг ын ис æмæ йыл нæ рагфыдæлтæ куыд æмбæлдысты, уыдæттæ. Дзерассæ радзырдта, зæгъгæ, зæххыл æппæт Чырыстон дуне кæй фæнысан кæнынц Чырыстийы райгуырды бон æмæ, зæгъгæ, у стыр бæрæгбон. «Ацы уаз бæрæгбон адæм сæхи фæфæдзæхсынц Хуыцауыл æмæ фæбæллынц ног хæрзиуджытæм. Уый ма сывæллæттæн бацамыдта, зæгъгæ, Цыппурсы бæрæгбон у удсыгъдæггæнæг бæрæгбон æмæ йыл кæддæриддæр кæй хъæуы æмбæлын цинимæ, сыгъдæгзæрдæйæ», – банысан кодта уый.
Галуаны хъомылгæнинæгтæн ма Цыппурсы бæрæгбоны цытæн раарфæ кодтой сæ ахуыргæнджытæ æмæ ныййарджытæ дæр. Уый фæстæ æрыгон фæсивæд равдыстой кæй бацæттæ кодтой, уыцы бæрæгбонон концерт. Уыдон сæ арæхстдзинад æвдыстой зарынæй æмæ кафынæй, аив кастысты æмдзæвгæтæ, хъæлдзæг ныхæстæ, равдыстой чысыл инсценировкæтæ дæр, активон уыдысты сæ хъæлдзæг конкурсты. Ногазон бæрæгбон лæвæрттæй фидауы æмæ æппæт сывæллæттæн дæр мадзалы кæрон Дзауы районы администрацийы къухдариуæгады номæй байуæрстой лæвæрттæ.
Сывæллæттæн ацы мадзал сæ зæрдæмæ тынг кæй фæцыдис, уый тыххæй бузныджы ныхæстæ загътой мадзалы организатортæ æмæ сæ хъомылгæнджытæн.
ЦХУЫРБАТЫ Ларисæ
