Хъæууон цæрджыты скъуыддзаггæнинаг фарстатæ дзæвгар вæййынц афæдзы алы афон дæр. Уыдонæй иуты ахицæн кæнынц æмбæстæгтæ сæхи тыхтæ æмæ фæрæзтæй, æндæрты æрбæстон кæнынмæ та бавналынц æмбæлон куыстуæттæ, сæ сæххæст кæныныл бакусынц зæрдиагæй æмæ уымæй цæрджыты домæнтæ æрнывыл вæййынц. Сæ разы скъуыддзаггæнинаг хæстæ æххæст кæнынмæ бæрндзинады цæстæй кæсынц Цхинвалы районы цæрæнуатон-коммуналон хæдзарады кусджытæ дæр æмæ бакусынц хъæууон фæллойгæнджыты цардуагон уавæртæ фæрогдæр кæныныл. Раст зæгъын хъæуы, раздæр азты-иу донхæры сезоны агъоммæ цæрджытæ сæхи тыхтæй къанаутæ æрбæстон кодтой æмæ уымæ гæсгæ ницы зындзинæдтæ æвзæрстой. Ныртæккæ уыцы куыстытæ æххæст кæны уæлдæр загъдгонд куыстуат æмæ сын уымæй рог кæны сæ къух.
Цæрæнуатон-коммуналон хæдзарады инженер Хуыбиаты Ахмæт куыд банысан кодта, афтæмæй куыстытæ æххæст кодтой мæйы дæргъы. Цæстуарзонæй та дзы бафæллой кодтой къахæн техникæйыл кусæг Тъехты Геннади, цы бырон æмбырд кодта, уый та æм-бæлон бынатмæ аласыныл куыста КамАЗ-ы шофыр Цхуырбаты Ацæмæз. Æппæт куыстытæ дæр сæххæст кодтой Гудзабар, Дменис, Къостайыхъæу æмæ Сатихъары хъæуты. Æрмæст Къостайыхъæуы ссыгъдæггонд къанауы дæрддзæг у 900 метры бæрц.
ХУЫБИАТЫ Никъала
