Компани «Чистый мир», ныр дыккаг аз фæнд кæны хицауадæй æххуыс ракурын.
Фирмæ «Чистый мир» æмæ экологон æхсæнадон организаци «Зеленая Алания» нæ горæты æмæ йæ алфæмблай бронæй ссыгъдæг кæнынмæ сæ хайбавæрд хæссынц. Уый тыххæй ауагътой цалдæр акцийы. Бантыст сын 210 тоннæйы брон æрæмбырд кæнын. «Чистый мир» кусы, Цæгат Ирыстон-Аланийы цы дыккаг хомæджы завод ис, уыимæ. Ам пластик æмæ картонæн дæттынц «дыккаг цард». Картоны дыккаг хомæгæй арæзт цæуы ног гæххæтт. Пластикæй та пайда кæнынц фæндæгтæ аразынæн. Ацы архайд æрмæст хисæрмагонд пайдайæн дарддæр ма хорз æндавы экологийыл. «Зеленая Алания» æмæ «Чистый мир»-ы тандемы фæрцы нæ горæты скъолатæй цалдæры раз æвæрд æрцыд брондæттæ. Уыдон дих сты пластик, картон æмæ алюмины асыччытыл.
Ног азы ацы компанитæ хъавыдысты сæ архайд адард кæнынмæ, фæлæ сæ куысты фæзынд цæлхдуртæ. «Ивгъуыд азы Хуссар Ирæй ласт æрцыд 210 тоннæйы макулатурæ. Уыдонæн сæ 80 процент уыдис профкартон. Уымæй дарддæр ма æмбырд кодтам ПВХ-ПЭТ æвгтæ, пластикæй конд асыччытæ. Фæлæ нæ куыстуатæн фæзынд зындзинæдтæ. Цæгат Ирыстон-Аланийы цы дыккаг хомæджы куыстуат ис, уыдон сæ куысты темптæ æрныллæг кодтой, макулатурæ райсыны æргътæ дæр ныр фæкъаддæр сты. Уымæ гæсгæ нæ кусджытæн мызд цæмæй бафидæм, уый нын нæй. Мах фæнды Хицауадмæ бахатын, цæмæй нæм рæстæгмæ фæкæсой финансон æгъдауæй», – зæгъы куыстуат «Чистый мир»-ы сæргълæууæг Кобесты Виленæ.
Куыд зонæм, афтæмæй ацы куыстуат æрбынат кодта завод «Электровибромашинæ»-йы территорийыл. Уазал бон куыстуаты æрлæууæн нæ вæййы, уымæн æмæ йæм хъармдзинад уагъд нæу. Уымæ гæсгæ ам цы прессгæнæн ифтонгад ис, ууыл кусæг операторæн бирæ рæстæг йæ бон кусын нæ вæййы». Компанийы ныфс ис, рæстæджы цыдимæ уавæр кæй рараст уыдзæн, Цæгат Ирыстон-Аланийы дыккаг хомæджы завод фæстæмæ цы æргътæ фыста макулатурæйæн, уымæ та кæй раздæхдзæнис. Уæд, Кобесты чызг куыд зæгъы, афтæмæй сæ кусджытæн мызд компани йæхæдæг фиддзæн.
Ивгъуыд азы сæрды мæйты «Чистый мир» бадзырд сарæзта горæты хæрзарæзтады комбинатимæ. Уыцы бадзырдмæ гæсгæ «Чистый мир» нæ горæты 24 раны сæвæрдта брондихгæнæн асыччытæ. Хæлцадон броны асыччы æмрæнхъ æвæрд æрцыд, макулатурæ æмæ пластик кæдæм аппарой, ахæм асыччытæ дæр. Уый та ахадгæ æххуыс у бынæттон хæрзарæзтады комбинатæн.
Уазæгты Марфа
