Кæй нæ хъæуы «Чистый мир»?

Ацы кампани нæ горæты фæзынд цалдæр азы размæ. Нæ горæт æмæ йæ алфæмблайы ссыгъдæгдзинадмæ, уый бахаста зынгæ хайбавæрд. «Чистый мир» æмæ «Зеленая Алания»-йæн сæ нысан уыд адæмы  сыгъдæгдзинадыл цайдагъ кæнын. Уыцы нысанæн арæх уагътой акцитæ Спорт, туризм æмæ фæсивæдон политикæйы фæдыл комитеты минæвæрттæ æмæ скъолаты активистты хайадистæй.

Æхсæнадон организаци «Чистый мир»- ы саразджытæ Тедеты Андрей æмæ Вадимы разамындæй канд горæт нæ сыгъдæг кодтой быронæй, фæлæ ма арæзтой бизнес дæр. Уыдон æмбырд кодтой профкартонтæ, пластикæй конд асыччытæ æмæ пакеттæ, ПЭТ тыхтонтæ, полиэтиленæй пакеттæ, кæцытæ калд вæййынц хæлцадон магазинты, къафеты æмæ ресторанты рæзты. Уымæй уыцы куыстуæтты хицæутты сæ бырæттæй ирвæзын кодтой, иннæмæй та сæхицæн пайда хастой. Бырæттæ æмбырд кодтой завод «Вибромашинæ»-йы территорийыл, ам сæ пресс кодтой æмæ сæ уый фæстæ ластой Цæгат Ирыстон – Аланимæ. Уым ис хомыс ногæй куыстгæнæг завод. Пластикæй рауадзгæ продукцийæ пайда кæнынц фæндæгты арæзтады, аразынц дзы доны хæтæлтæ, рудзгуытæ. Картоны дыккаг хомагæй та – ног гæххæтт.

Дыууæ лæппуйы архайд æрмæст хисæрмагонд пайдайæ дарддæр æндæвта экологийы сыгъдæгдзинадыл дæр. Бæрæг куыд у, афтæмæй бирæ гæххæтт калд цæуы бырондæттæм. Цæмæй сæ æмбырд кодтаиккой, уый тыххæй Тедеты лæппутæ цалдæр скъолайы кæрты сæвæрдтой сæрмагонд асыччытæ, скъоладзаутæ уырдæм калдтой сæ макулатурæ. Алы аз дæр ацы организацийæн æнтыстис 200 тоннæйæ фылдæр бырон æрæмбырд кæнын.

Ацы аз дæр кампани хъавыд йæ архайд адарддæр кæнынмæ, фæлæ сын фæзынд цæлхдуртæ. Цæгат Ирыстоны сæ кæдæм ластой, уыцы куыстуат, йæ куысты темптæ æрныллæг кодта. Тедеты лæппутæ хицауадмæ бахатыдысты, цæмæй сæм фæкæсой финансон æгъдауæй, кусджытæн мызд бафидой æмæ куыстуат æхгæд ма ‘рцæуа.

Фæлæ ацы бонты куыстуат æрлæууыд йæ куыстæй. «Чистый мир»-ы саразджытæ архайдтой горæты хæрзæфснайды комбинатимæ бадзырдтытæ саразыныл, цæмæй сæ кусджытæ бынаты сортировкæ кæной бырæтты. Уыдон æрвыл райсом æндæр быронимæ иумæ пластикон мигæнæнты хауæдздзæгтæ æмæ полиэтилены пакеттæ полигонмæ аласынц, куыд зонæм, афтæмæй та ацы бырæттæ зæххы не ‘мбийынц.

Горæты хæрзæфснайды комбинаты хистæры хæдивæг Джиоты Юри ахæм дзуапп радта: «Цалынмæ организаци «Чистый мир» фæзынд нæ республикæйы, уæдмæ дæр хæрзæфснайды комбинат куыста æмæ ныр дæр кусы горæты сыгъдæгдзинадыл. Нæ организацийы ис фаг ресурстæ, цæмæй афоныл ласæм бырæтты. Стыр трагеди аразын нæ хъæуы, уыдонæн сæ куыстуат кæй сæхгæдтой, уымæй».

Чизоны раст уыдаид, ацы организацийы рæстæгмæ зындзинæдтæм исчи йæ хъус куы æрдардтаид æмæ сæм йе ‘ххуысы къух куы фæдаргъ кодтаид.

УАЗÆГТЫ Марфæ