Ацы къуырийы дæргъы фыццаг хатт Хуссар Ирыстоны ацыдысты Абхазы Республикæйы культурон бонтæ.
Куыд ацыдысты уый фæдыл «Спутник. Хуссар Ирыстон»-ы уыдис Абхазы Культурæйы министр Даур Ковейы пресс-конференци.
Даур Кове æрыгон политик у, фæлæ ныры онг Абхазы Республикæйы бакуыста бирæ бæрнон бынæтты, 2016 азæй 2022 азмæ та уыд Фæсарæйнаг хъуыддæгты министр. Ивгъуыд азы апрелы мæйы йæ снысан кодтой Культурæйы министрæй. Ис ын бинонтæ, хъомыл кæны дыууæ чызджы.
Министр, фыццаджыдæр, банысан кодта, тынг æхсызгон ын кæй у Хуссар Ирыстонмæ гастролты кæй фæуазæг сты æмæ ирон адæмæн сæ культурæ кæй равдыстой, уый. Сæрмагондæй банысан кодта дыууæ республикæйы æхсæнкультурон æмархайды ахсджиагдзинад.
Даур Кове журналисттæн фехъусын кодта, зæгъгæ, фæнд кæнынц, Хуссар Ирыстоны культурæйы бонтæ майы мæйы кæнæ июны мæйы райдианты ауадзын. Хуссар Ирыстоны Культурæйы министр Зæгъойты Радæимæ нын ацы идея уыдис иумæйаг. Мæнæн тынг æхсызгон у Радæ Филиппы чызджы хуызæн адæймаг Хуссар Ирыстоны Культурæйы министрады сæргъ кæй лæууы, уый. Уый æппæт дæр аразы æмæ архайы национ культурæ нысанмæздæхтæй размæ цæмæй цæуа æмæ ног, æмбæлон æмвæзадмæ схиза. Мах йемæ нæ ацы иумæйаг хъуыддагыл куы сдзырдтам, ууыл рацыдис æрмæстдæр иу мæй æмæ æрдæджы бæрц æмæ куыд уынут, афтæмæй абон абхазаг культурæйы иу хайимæ базонгæ сты æфсымæрон ирон адæм æмæ та культурæ ноджы æнгомдæр æмæ æввахсдæр скодта нæ адæмты. Ныр та мах æнæрхъæцæй æнхъæлмæ кæсдзыстæм хуссарирыстойнаг сфæлдыстадон коллективтæм Абхазы Республикæйы», – загъта министр.
Абхазы министры ныхæстæм гæсгæ йæ коллегæтимæ фæнд кæнынц иумæйаг мадзæлттæ сорганизаци кæнын Уæрæсейы Федераци Абхаз æмæ Хуссар Ирыстоны республикæйы хæдбардзинад банымайыны боныл 15 азы сæххæсты цытæн. «Нырма йæ бæлвырдæй нæ зонæм, цы бацæттæ кæндзыстæм, уый, фæлæ ныридæгæн хъуыды кæнæм нæ адæмты зæрдæтæ цæмæй барухс кæндзыстæм, ахæм цымыдисон мадзал саразын. Уырны мæ, иумæ рæсугъд æмæ цымыдисон бæрæгбон саразын нын кæй бантысдзæн. Ныфс мæ ис нæ ацы культурон фембæлдтытæ кæй æрхæсдзысты бирæ позитивон хъуыддæгтæ æмæ нæ хæларадон ахастытæ ноджы кæй фæтынгдæр уыдзысты», – мидбылхудгæйæ дзырдта Даур.
Уазæг ма йæ ныхасмæ бафтыдта, зæгъгæ, нæ адæмтæн ис иу истори, æмæ нæм цы фыдæвзарæнтæ æрхауд иумæйаг знагæй, уыдон иумæ кæй рацыдыстæм æмæ сын кæй бафæрæзтам Стыр Уæрæсейы фæрцы. «Цæмæй фидæны фæлтæртæй нæ истори ма рох кæна, уый тыххæй хъæуы сфæлдыстадæй пайда кæнын дæр. Зæгъæм, гуырдзиаг-абхазаг хæсты тæфаг кæм зыны, ахæм спектакль «Третий день войны», зæгъгæ, æрластам ирон сценæмæкæсджытæн. Спектакль æвæрд у нæ республикæйы адæмон фыссæг Шалодиа Аджинджалы радзырдтæм гæсгæ. Уæззау æмæ эмоционалон спектакль у, фæлæ мæ хъуыдымæ гæсгæ, ирон театрдзаутæн дæр уыд цымыдисон. Ирон æмæ абхазаг адæмæн нæй хæсты трагикон цауты æцæг истори ферох кæныны бар.
Мах Хуссар Ирыстонимæ культурæйы фадыджы не ‘мгуыстад адарддæр кæндзыстæм æппæт фæдыздæхæнты дæр: вокалон аивады, хореографи æмæ кинематографийы. Махмæ дæр æмæ Хуссар Ирыстоны дæр ис адæмон зарджыты тынг хорз ансамблтæ, ис нæм сывæллæтты сфæлдыстадон коллективтæ. Фæлæ ма нæ республикæтæн сæйраг у, кинематографи райтынг кæныны хъуыддаг дæр. Сфæнд кодтам иумæ аивадон киноныв саразын», – банысан кодта министр.
Журналистты ма бацымыдис кодта Даур Ковейæн ирон национ къæбицы хæринæгтæй иууыл тынгдæр йæ зæрдæмæ цы фæцыдис. Уæливыхтæ йæ зæрдæмæ тынг цæуынц, фæлæ ирон хæдзарон бæгæны куыд хæрзад у, ахæм хæрзад нуазинаг нырма никуы никæмæ банызта æмæ йæ диссагæн æрхаста.
ЦХУЫРБАТЫ Ларисæ
