Сырх Дзуары Дунеон Комитет у нейтралон ӕмӕ хӕдбар организаци, уымӕн йӕ нысӕнттӕ ӕмӕ хӕстӕн ис гуманитарон характер ӕмӕ здӕхт сты, цӕмӕй хъахъхъӕна, хӕстон конфликттӕ ӕмӕ ӕндӕр мӕгуырау уавӕрты чи бахауы, уыцы адӕймӕгты цард ӕмӕ сын кӕна ӕххуыс. Ацы организаци йӕ архайд ныр цалдӕр азы кӕны Хуссар Ирыстоны дӕр, куыд горӕты, афтӕ хъӕууон бынӕтты ӕмӕ кӕны комплексон ӕххуыс иууыл тыхстдӕр категорийы цӕрджытӕн. Гуырдзыйы агрессийы азты чи фесӕфт, уыдоны хъысмӕт сбӕрӕг кӕнын у ацы Комитеты сӕйрагдæр хæстæй иу. Организацийӕн ӕдзухон бастдзинад ис хицауады ӕппӕт ӕмбӕлон структурӕтӕ ӕмӕ ӕбӕрӕгӕй фесӕфӕг адӕймӕгты бинонты уӕнгтимӕ, цӕмӕй исты бӕрӕг ныхас фехъусой сӕ хъысмӕты тыххӕй. Ацы аз январӕй июны мӕймæ æрӕмбырдчындӕуыд дыууӕ контролон биологон хуызӕджы. Афтӕ ӕмӕ ӕрӕмбырдгонд хуызӕгты иумиаг нымӕц ныр у 142. Уымӕй дарддӕр ма Комитет дарддӕр ӕмбырд кодта 1989-92-ӕм азты конфликты фӕстиуӕгӕн ӕбӕрӕгӕй фесӕфӕг адӕймӕгты хъысмӕт базоныны тыххӕй куырдиӕттӕ. Ӕппӕт уыдӕтты фӕстиуӕгӕн куырдиӕттӕ ӕмӕ анкетӕты нымӕц схӕццӕ 76 ӕмӕ 54-мӕ. Сырх Дзуары кусджытӕ ауагътой 12 индивидуалон сессийы, чи фесӕфт, уыдон бинонтӕн психологон æххуысы тыххӕй. Конфликты фӕстиуӕгӕн йӕ хӕстӕ-джытимӕ бастдзинад кӕмӕн нал ис, уыцы адӕймӕгтӕн бинонты бастдзинад сӕндидзын кӕныны программӕйы фӕлгӕтты ӕххуыс кӕны ӕмӕ сын аразы фадӕттӕ, цӕмӕй Сырх Дзуары ныстуан арвитой се ‘ввахс адӕймӕгтӕм кӕнӕ та сын уа телефонон бастдзинад. Ахӕм адӕймӕгтӕн арӕх зын вӕййы сӕ хӕстӕ-джытимӕ ӕдзухон бастдзинад сӕндидзын кӕнын. Уый ма архайы, чи фæиппæрд сты, уыдоны сæ бинонтимæ баиу кӕныныл ӕмӕ йӕ хӕрзиуӕгон куысты фӕрцы банысангонд рӕстӕгмӕ се ‘ввахс адӕмимӕ баиу сты дыууӕ адӕй-маджы.
Ахӕстӕтты чи ис, уыдонӕн, куыд гуырдзиӕгтӕ, афтӕ хуссайраг ирӕттӕн дыууӕрдыгӕй фарс дӕр сӕ хиуӕттӕ фембӕлдысты семӕ ӕмӕ сын барвыстой ӕрвитӕггӕгтӕ. Уыцы ӕххуысы руаджы 2018 азы марты мӕйы Цхинвалы ахӕстонмӕ барвыстӕуыд 40 матрас ӕмӕ 18 та сынтӕджытӕ.
Комитет ӕххуыс кӕны иууыл тыхстдӕр категорийы цӕрджытӕн. Социалон æххуысы фæдыл программӕйы фӕлгӕтты ӕдзухон бастдзинады бындурыл ӕххуыс кӕны хӕлцадон ӕмӕ ӕндӕр хуызы товартӕй иууыл тыхстдӕр цӕрджытӕн. Ахӕм ӕххуыс банкъардтой ӕвӕрӕз бирӕсывӕллонджын бинонтӕ, иунӕгӕй чи цӕры, бинонтӕ ӕмӕ ӕввахс адӕймӕгтӕй ӕххуыс чи не ‘нкъары, ахӕм ныййарджытӕ. Январӕй июны мӕймӕ Комитет ахӕм ӕххуыс бакодта Хуссар Ирыстоны районты 192 бинонтӕн 423 адӕймагӕн. 15 бинонтӕн та (25 адӕймаджы) бакодтой финансон ӕххуыс ссады бӕсты дзул ӕлхӕныны ӕмӕ уыцы ӕххуысы фӕрцы ахӕм ӕмбӕстӕгтӕ ифтонг уыдысты бон ӕртӕ хатты хӕрдӕй. Дзауы районы Лесоры хъӕуы сæ хæдзар кæмæн басыгъд, уыцы бинонтӕн бакодтой иухаттон ӕххуыс хӕлцадон ӕмӕ ӕнӕхӕлцадон товартӕй.
Банысангонд рӕстӕгмӕ Комитеты кусджытӕ дарддӕр цыдысты хӕдзӕрттӕм санитарон æгъдауæй базылды тыххӕй. Ахӕмтӕ уыдысты 13 ацӕргӕ ӕмӕ иунӕгӕй чи цӕры, уыцы адӕймӕгтӕ. Уыдонмӕ цыдысты ӕрвылбон дӕр Цхинвалы горӕты. Цхинвал, Ленингор ӕмӕ Знауыры районтӕм та цыдысты къуыри иу хатт. Хастой сын хӕлцадон продукттӕ, фыццаг рады чи фӕхъӕуы, ахӕм товартӕ, сӕ цӕрӕн бынӕттӕ сын кодтой сыгъдӕг. Уый йедтӕмӕ ма сын фадӕттӕ арӕзтой ӕнӕниздзинады уагдӕттӕм бацӕуынӕн. Бынӕттон хицауадимӕ ӕнгом ӕмгуысткӕнынады руаджы Комитеты экономикон ӕдасдзинады кусджытӕ административон ӕгъдауӕй сӕ фарс балӕууыдысты 17 ӕмбӕстагӕн. Уыдон ӕндӕр ӕмӕ ӕндӕр аххосӕгты фӕстиуӕгӕн сӕ документтӕ не сфидар кодтой ӕмӕ нӕ райстой социалон ӕххуыстӕ. Ацы азы афӕдзы фыццаг ӕрдӕджы 10 адӕймаджы бахатыдысты Комитетмæ, цӕмӕй сын бакодтаиккой ортопедион ӕххуыс. Уыдонæй ӕртӕйӕ райстой инвалидон коляскæтæ, иуӕн баххуыс кодтой протез самал кæныны. Баххуыс ма кодтой æндæр хуызты дæр. Банысангонд рӕстӕджы ӕнӕаргъӕвгӕ медицинон ӕххуысы тыххӕй уӕззау рынчынты республикæйæн æдтейæ, медицинон уагдӕттӕм фӕхӕццӕ кӕныны тыххӕй 87 хатты уыд сӕ ӕмархайд ӕмӕ уый фӕстиуӕгӕн медицинон ӕххуыс банкъардтой 81 рынчыны.
Хуыбиаты Никъала
Comments are closed, but trackbacks and pingbacks are open.