ДÆ ЦÆСТ АХÆСС ДУНЕЙЫЛ

Дыууæ бæстæйы лидерты фембæлд

УФ-йы Президент Владимир Путин æмæ Израилы президент Беньямин Нетаньяху хайад райстой Мæскуыйы дзуттæгты центры мысæн мадзæлтты, кæцытæ баст уыдысты польшæйаг мæлæты лагерь Собиборы растады 75 азы бонимæ. Дзуттæгты музейы директор Александр Борода Уæрæсе æмæ Израилы лидертæн фенын кодта чысыл равдыст, цыран æрмæст нывтæ æмæ документтæ нæ уыдысты, фæлæ ма лагеры схемæ  æппæт Европæйæ адæмы ластой эшелонгай. Ахæст иу бонæй фылдæр нæ цард, практиконæй-иу уайтагъд бахаудтой газы камерæтæм, – радзырдта сын уый. Дыууæ лидеры уынаффæ кодтой Æввахс Хурыскæсæн æмæ Сирийы уавæрыл. Беньямин Нитаньяхумæ катайдзинад æвзæрын кæны уым Ираны позицитæ кæй тыхджындæр кæнынц, уый, кæцы у Израилы ныхмæлæууæг.

«Кремлы номхыгъд»

АИШ-ы финансты министрад бæстæйы конгрессмæ æрбавдыста «кремлаг доклад», кæцымæ хаст æрцыдысты 210 уæрæсейаджы. Сæрмагондæй, санкцион номхыгъды кандиадаттæ систы 114 чиновникы æмæ паддзахадон компаниты къухдариуæггæнджытæ, уыцы нымæцы Уæрæсейы Президенты Админис-трацийы къухдариуæгад. Уымæй дарддæр ма доклады сты æппæт федералон министртæ, Мидхъуыддæгты, Æдасдзинады федералон службæйы æмæ Росгвардийы къухдариуæггæнджытæ. Афтæ ма докладмæ хаст æрцыдысты 96 олигархы. Уымæй дарддæр ма уæвынад кæны кремлаг доклады сусæггаг хай. Уым гæнæн ис уой ахæм нæмттæ, кæцытæ хаст не ‘рцыдысты иумиаг хаймæ. «Кремлаг номхыгъды» ис дыууæ ироны  Хъесаты Игорь æмæ Къациты Сергей

АИШ-ы финансты министрад баныфсæвæрдта реалон санкцитæ «кремлаг номхыгъды» фæстæ. Ведомствойы сæргълæууæг Стивен Мнучин нæ бамбарын кодта, санкцитæ иумиагæй Уæрæсейы ныхмæ уыдзысты æви иуæй-иу фигурантты ныхмæ, уый. Уый йæ раныхасы кæрон загъта, зæгъгæ, санкцитæ ист æрцæудзысты æввахсдæр рæстæджы,

Хайад райсдзысты Паралимпиадæйы

Уæрæсейаг паралимпионтæн сæ бон суыдзæн кореяйаг Пхенчханы Зымæгон хъæзтыты хайад райсын, фæлæ бæрæг уавæртæм гæсгæ. Уыдон хуындзысты «нейтралон паралимпион атлеттæ», уæрæсейаг триколорæн бынтондæр бар нæй Олимпиадæйы. Пхенчханы хъæзтыты хайад райсдзысты 30-35 уæрæсейаг паралимпионы.

Конгресс йæ куыст фæцис

30-æм январы Сочийы уагъдцæ-уæг сирийаг диалогы Конгрессы хайад райстой 1500 делегатæй фылдæр, афтæ ма 50 цæстдарæгæй фылдæр, уыцы нымæцы АИШ, Франц, Стырбритани æмæ ИНО-йæ, Иран æмæ Туркы минæвæрттæ. Дискусситæ райдыдтой эмоционалонæй, уымæн æмæ Сирийы цауты тыххæй хайадисджытæн ис ныхмæ-вæрд хъуыдытæ, фæлæ уæддæр уыдон æрбæстон кодтой диалог.

Мадзал байгом кодта Сирийы фæдыл УФ-йы Президенты сæрмагонд минæвар Александр Лаврентьев. Йæ фæстæ арфæйы ныхæстимæ раныхас кодта УФ-йы Фæсарæйнаг хъуыддæгты министр Сергей Лавров.  Владимир Путин ныстуан арвыста Конгрессы хайадисджытæм, цыран банысан кодта, зæгъгæ, Сочийы сирийаг нацдиалогы конгресс фадат ратдзæн æфсымæрон хæст æруромыны фæдыл сирийæгты тырнындзинад сæххæст кæнынæн. Сирийы фæдыл ИНО-йы сæрмагонд æрвыст лæг Стаффан де Мистура конгрессы хатдзæгтæм гæсгæ фехъусын кодта, зæгъгæ, Сочийы мадзал уыд æндыгъд, фæлæ уый нæ бахъагдардта уынаффæ кæныны процессы. Сирийы фæдыл радон фембæлд уыдзæн Астанайы февралы кæрон. Конгрессы фæлгæтты ист æрцыд æртæ сæйраг документы – хатдзæгон хъусынгæнинаг, фембæлды хайадисджыты сидт æмæ конституцион къамисы номхыгъд.

Трампы ныстуан

АИШ-ы президент Дональд Трамп «Бæстæйы уавæры тыххæй» йæ фыццаг ныстуан сарæзта конгрессмæ. Йæ раныхасы уый Уæрæсе æмæ Китайы схуыдта АИШ-ы ныхмæлæуджытæ. Йæ доклады æддагон æмæ хъахъхъæнынады политикæйы хайы Трамп зæрдыл æрлæууын кодта Гуантаманойы ахæстон сæхгæныны тыххæй Барак Обамайы уынаффæ кæй аивта, уый тыххæй.

Дебаттæ уагъд не ‘рцыдысты

Каталонийы Парламенты хъуамæ уагъд æрцыдаиккой дебаттæ регионы лидеры бынатмæ Пучдемоны кандидатурæйы фæдыл. Испаны территорийыл архайы ордер Пучдемоны æрцахысны тыххæй æмæ Испанмæ куы æрбаздæха, уæд æй гæнæн ис æрцахсой. Политикы æвварсхæцджытæ фæндон бахастой, цæмæй уый автономон хицауады сæргълæууæджы бынатмæ бацæуа дистанционон æгъдауæй. Уыимæ ууыл разы не сты Мадрид æмæ бæстæйы Конституцион тæрхондон. Каталонийы сæдæгай митинггæнджыты нæ баурæдтой полициæгтæ æмæ бацыдысты Парламенты бæстыхаймæ. Уыдон домынц, цæмæй Пучдемоны сфидар кæной Парламенты сæргълæууæгæй.

Ныхас кодтой телефоны

Уæрæсейы æмæ Туркы фæсарæйнаг хъуыддæгты сæргълæуджытæ Сергей Лавров æмæ Мевлют Чавушоглу, телефоны ныхас кæнгæйæ, уынаффæ кодтой Сочийы сирийаг национ диалогы конгрессыл. Министртæ æруынаффæ кодтой къорд практикон фарстыл, кæцытæ баст сты ацы проблемæимæ.

Ис иумиаг кондадты хъомыс

Уæрæсе æмæ Бельгийæн ис иумиаг кондадтæ саразыны хъомыс, – уый тыххæй фехъусын кодта УФ-йы премьер-министр Дмитри Медведев йæ бельгийаг коллегæ Шарль Мишелимæ баныхæсты хатдзæгтæм гæсгæ. «Махмæ фармацевтон сектор рæзы стыр темптæй. Нæ базарады бынат ис бельгийаг компантиæн дæр æмæ иумиаг кондадтæ саразынæн дæр. Ис нæм стыр проекттæ энергетикæйы, аэрокосмикон, химикон сæудæджерады фадыджы дæр. Уырны мæ амалиуггæнджытæ сæхи кæй равдисдзысты активондæрæй», – загъта Дмитри Медведев.

Тереза Мэйы

Официалон визит

Бритайнаг хицауады сæргълæууæг Тереза Мэй официалон балцы ис Китайы. Уый бацыд горæт Уханмæ. Китайы фæуыдзæн æртæ боны. Уыцы рæстæджы уый фембæлдзæн китайаг уæлдæр къухдариуæгады минæвæрттимæ. Йæ визиты сæйраг нысан у дыууæфарсон базарадон ахастыты оптимизацийы фарстыты фæдыл баныхæстæ ауадзын.

Информацион агентадты хъусынгæнинæгтæм гæсгæ