ДÆ ЦÆСТ АХÆСС ДУНЕЙЫЛ

Куынæг æрцыдысты террористтæ

Уæрæсейаг æфсæддон службæгæнджытæ провинци Идлибы цы спецопераци ауагътой, уый фæстиуæгæн куынæг æрцыдысты террористтæ æмæ æнæпилотон тæхæн аппаратты æфтауцдон. Уæрæсейаг æфсæддон развæдсгæрсты цыбыр рæстæг бахъуыд, цæмæй авиабæзæ «Хмеймим»-мæ чи бабырста, уыдоны ссардтаиккой. «Спецоперацийы кæройнаг этапы бæрæг æрцыд боевикты диверсион къорды бынат провинци Идлибы ныгуылæйнаг арæны цур. Террористтæ микроавтобусмæ куыд хъуамæ рахызтаиккой, афтæ куынæг æрцыдысты.

Æдасдзинады советы рабадт

УФ-йы Президент Владимир Путин Уæрæсейы æдасдзинады советы æдзухон уæнгтимæ æруынаффæ кодта Сирийы бæстонкæнынады фарстытыл, – хъусын кæны паддзахады сæргълæууæджы пресс-секретарь Дмитри Песков. «Æруынаффæ кодтой Сирийы политикон бæстонкæнынадыл, уыцы нымæцы Сочийы национ диалогы Конгресс бацæттæ кæныны тыххæй», – загъта уый.

Ныхас кодтой телефоны

Сирийы национ диалогы размæ УФ-йы Фæсарæйнаг хъуыддæгты министр Сергей Лавров телефоны ныхас кодта йæ ирайнаг коллегæ Махаммад Джавад Зарифимæ. Уыдон æруынаффæ кодтой Сирийы уавæрыл æмæ ацы бæстæйы политикон бæстокæнынады фæдыл ИНО-йы эгидæйы бын Æдасдзинады советы 2254 резолюцийы бындурмæ гæсгæ.

Фæцис документтæ исыны æмгъуыд

УФ-йы Централон æвзарæн къамисы фæцис документтæ исыны æмгъуыд Уæрæсейы Президенты бынатмæ претенденттæй. Партитæй документтæ истой 12 январы æрдæгæхсæвмæ. ЦÆК-ы сæргълæууæг Элла Памфиловайы ныхæстæм гæсгæ, æвзæрстыты размæйы съездты тыххæй фехъусын кодтой 24 партийы. Иумиагæй æвзæрстыты хайад райсынмæ хъавыдысты 70 претенденты, фæлæ ЦÆК-мæ æнæмæнгхъæуæг документтимæ бацыдысты æрмæстдæр 36 претендентæй. Документтæ райсыны фæстæ ЦÆК-æн ис фондз боны сæ басгарыны тыххæй. Нырма уыцы басгæрст рацыдысты, сæхæдæг сæхи чи раразмæ кодтой, уыдонæй дыууæ – УФ-йы архайæг президент Владимир Путин æмæ УФ-йы сгуыхт æрымысæг Владимир Михайлов. Абоны бонмæ æвзарæн хыгъдтæ бакодтой 14 кандидаты.

Фæтыхджындæр кодтой санкцитæ

АИШ-ы хицауад рауæрæхдæр кодтой санкцитæ Ираны ныхмæ. АИШ-ы финансты министрады пресс-службæ куыд хъусын кæны, уымæ гæсгæ сау номхыгъдмæ хаст æрцыдысты 14 ирайнаг физикон цæсгомы. Уымæй дарддæр ма куыд рабæрæг, афтæмæй АИШ-ы президент Дональд Трамп фæстаг хатт уынаффæ райста ирайнаг ядерон програм-мæйы фæдыл сразыдзинæдты фæлгæтты антиирайнаг санкцитæ æруромыны режим адарддæр кæныны тыххæй. Уæ зæрдыл уын лæууын кæнæм, Ираны ныхмæ АИШ-ы санкцитæ иу кæнæ иннæ формæйы кæй уæвынад кæнынц 1950 азтæй фæстæмæ. Санкциты цæхгæр фæтыхджындæр кодтой 1970 азты, Ираны пысылмон революцийы фæстæ.

Равæрд æрцыд дивизион С-400

Севастополы равæрд æрцыд зенитон-ракетон системæты С-400 «Триумф». Интерфакс куыд хъусын кæны, уымæ гæсгæ УФ-йы Æфсæддон Уæлдæфон тыхтыл командæгæнæг инæлар-лейтенант Виктор Севостьянов цытджын церемонийы уæлдæфон арæнтæ хъахъхъæныны комплексы фæдыл бардзырд радта Æфсæддон уæлдæфон тыхты хъахъхъæнынады баиугонд зенитон-ракетон полкы командирмæ. «Абонæй фæстæмæ Хъырымы уæлдæфон хъахъхъæнынады къорд ифтонг у иууыл нырыккондæр зенитон-ракетон системæ С-400, кæцыйæн дунейы аналог нæй. УФ-йы Президенты пресс-секретарь Дмитри Песков йæ комментариты куыд загъта, уымæ гæсгæ зенитон-ракетон системæты равæрд у хибахъахъхъæныны мадзал, æмæ йæ нæ хъæуы  тасхæссæгыл нымайын.

Æрбаздæхтысты сæ  базæмæ

Балтийаг флоты науты къорд æрбаздæхт базæмæ дард балцы фæстæ. Экипажыл фембæлдысты цытджын æгъдауæй. Корветтæ «Бойкий» æмæ «Сообразительный», афтæ ма танкер «Кола» денджызы фесты æртæ мæйы. Уыцы рæстæгмæ уыдон ацыдысты Атлантикæ, Астæуккагзæххон денджыз æмæ Индийаг океаныл 35 мин денджызон милы. Наутæ хайад истой ахуырты, афтæ ма сæххæст кодтой артиллерион æхстытæ дæр.

Аразынц «арæны æдасдзинады тыхтæ»

«Сирийы демократон тыхты» оппозицион къордтæ цæттæдзинад рацæудзысты АИШ-ы дунеон коалицийы контролы бын. Уый фæстæ сæ равæрдзысты Туркимæ Сирийы æмæ Иракы арæныл.   Хæстон цæттæдзинад ныридæгæн цæуынц 230 адæймаджы. «Арæны æдасдзинады тыхты» нымæц схиздзæн 30 мин адæймагмæ.

Информацион агентадты

хъусынгæнинæгтæм гæсгæ