Дæ цæст ахæсс дунейыл

ДЫУУÆВАРСОН БАНЫХÆСТÆ

Уæрæсейы æмæ Казахстаны фæсарæйнаг хъуыддæгты министртæ Сергей Лавров æмæ Бейбут Атамкулов сæ къухтæ æрфыстой 2019-2020 азтæн дыууæ бæстæйы æддагполитикон ведомствоты æмгуыстады фæдыл мадзæлтты планыл. Сергей Лавров куыд банысан кодта, уымæ гæсгæ уæлдай хъусдард здæхт æрцыд Евразийаг экономикон цæдисы фæлгæтты интеграцион процесстæ сфидардæр кæнынмæ.

РАХИЦÆН КОДТОЙ 1,6 МИЛЛИАРД СОМЫ

УФ-йы Хицауады Сæрдар Дмитрий Медведев вице-премьертимæ рабадты рæстæджы фехъусын кодта, зæгъгæ,  МС-21 хæдтæхæджы проект саразыны тыххæй рахицæн æрцæудзæн 1,6 миллиард сомы паддзахадон субсидитæ. Америкæйаг санкцитæ тасдзинады бын æвæрынц МС-21 хæдтæхæгæн композитон «сау базыр» саразын. Дзырд цæуы Америкæ цы композиттæ уадзынц, уыдоныл. Ныр фæлварынц сæ аналогтæ Уæрæсейы рауадзыныл.

СÆХХÆСТ КОДТОЙ ХÆЦÆНГАРЗ АУÆЙ КÆНЫНЫ ПЛАН

Уæрæсе, 2018 азы сæххæст кодта фæсарæнтæм хæцæнгарз ауæй кæныны план, – фехъусын кодта æфсæддон-техникон æмгуыстады фæдыл федералон службæйы сæргълæууæг Дмитрий Шугаев. Уыимæ уый банысан кодта, зæгъгæ, фæстаг æртæ азы дæргъы Уæрæсе æрвылаз дæр фæсарæнтæм æрвиты 15 миллиард доллары аргъ хæцæнгæрзтæ. Фæсарæнтæм арæхдæр æрвыст цæуы авиацион техникæ, кæцы ахсы æппæт закъазты 50 проценты. 2017 азы Уæрæсе уыд дыккаг бынаты хæцæнгарзуадзджыты рейтингы. Фыццаг рæнхъыл уыдысты Иугонд Штаттæ.

СДЗУАПП КОДТА УЛЬТИМАТУМÆН

Венесуэлæйы президент Николас Мадуро сдзуапп кодта Европæйы цалдæр бæстæйы ультиматумæн, кæцытæ æрдомдтой ног президентон æвзæрстытæ ауадзын. «Европæ рæдийы Венесуэлæмæ ахасты. Ныр 200 азы хæдбар паддзахад кæй стæм, уымæ нæ кæсгæйæ, уыдон нæ нымайынц нæ истори. Никæмæн у йæ бон махæн ультиматумтæ æвæра», – фехъусын кодта уый. Мадуро банысан кодта, зæгъгæ, Венесуэлæйæн Европæйы ис бирæ хæлæрттæ, æмæ Евроцæдисы лидерты позици та не ‘вдисы адæмы хъуыды. «Европæйы лидертæ ахсынц Трампы дзыхæй рацæугæ алы ныхас дæр. Æппæт Европæ кæсы Трампмæ æмæ йæ разы лæууы йæ зоныгуылтыл уæлдайдæр та Венесуэлæмæ ахасты», – загъта уый.

 

БАКОДТОЙ САНКЦИТÆ

Иугонд Штаттæ санкцитæ бакодтой Венсуэлæйы егъаудæр нефткуыстгæнæг компанийы ныхмæ æмæ йын сæхгæдтой 7 миллиард доллары аргъ активтæ, кæцыйы руаджы баххæст цыд бюджеты ахсджиаг хай. Ацы фæрæзтæ Урс хæдзары æххуысы руаджы гæнæн ис рахизой оппозицион лидер Хуан Гуайдойы контролы бынмæ. Уыимæ Вашингтон æргомæй æрсидт венесуэлæйаг æфсадмæ, кæцы нырма у легитимон президент Мадуройы æвварс, цæмæй рахæцой Гуайдойы æвварс.

Венесуэлæйы президент Николас Мадуро куыд загъта, афтæмæй АИШ санкцитæ бакодтой, цæмæй тыхæй сæхи бакæной Венесуэлæйы æрдзон ресурсты. Мадуро фæаххосджын кодта Дональд Трампы кæцыфæнды тыхми æмæ тугкалды дæр, кæцытæ гæнæн ис æрцæуой Венесуэлæйы.

 

САРАЗДЗЫСТЫ АДÆМОН КЪОРДТÆ

Æввахсдæр мæйты Венесуэлæйы фæзындзæн адæмон бархионты  50 мин дæлхайæ фылдæр, – уый тыххæй фехъусын кодта Мадуро. Венесуэлæйы сæргълæууæджы ныхæстæмæ гæсгæ, ацы аз майы мæймæ бæстæйы уыдзæн 2 милуан бархионы (ополченец). Мадуро банысан кодта, зæгъгæ, Венесуэлæйы гарзджын тыхтæ цæттæ сты уымæ, цæмæй фадат макуы радтой сæ райгуырæн бæстæйы территорийы иу метрмæ дæр исчи бавнала. 10-15 февралы республикæйы уагъд æрцæудзысты æфсæддон ахуыртæ, кæцыты Мадуро банымадта «иууыл ахсджиагдæртыл» бæстæйы историйы.

 

 

БАР ЫН НÆЙ БÆСТÆЙÆ АЦÆУЫНÆН

Венесуэлæйы Уæлдæр тæрхондоны уынаффæмæ гæсгæ, оппозицион лидер Хуан Гуайдойæн бар нал ис бæстæйæ ацæуынæн, афтæ ма æхгæд æрцыдысты йæ хыгъдтæ. Мадуро Гуайдойы схуыдта «АИШ-ы марионеткæ».

 

ÆВЗÆРЫЛ БАНЫМАДТА АИШ-ы УЫНАФФÆЙЫ

Боливийы президент Эво Моралес æвзæрыл банымадта АИШ-ы уынаффæ Венесуэлæйы финансон активтæ оппозицийы контролы бынмæ радтыны фæдыл. «Мах тæрхон кæнæм АИШ-ы паддзахадон департаменты уынаффæйæн æнæзакъонæй Венесуэлæйы æфсымæрон адæмы æхцатæ хи бакæныны тыххæй, цæмæй сæ радтой оппозицимæ, кæцытæ бафæлвæрдтой паддзахадон фæфæлдæхт саразынмæ æмæ сты АИШ-ы плæнтты дæлбар», – фехъусын кодта Моралес. Афтæ ма банысан кодта, зæгъгæ, экономикон блокадæ æмæ АИШ-ы ‘рдыгæй хæстон æрбабырсты тыххæй æртхъирæнтæ хæссынц тæссагдзинад регионы сабырдзинадæн.

 

НЕФТЕПРОДУКТТÆ БАХАУДТОЙ РЕЙНМÆ

Германы дыууæ науы кæрæдзийыл кæй сæмбæлдысты, уый фæстиуæгæн 2 мин литры нефтепродукттæ бахаудтой цæугæдон Рейнмæ. Оперативон службæты дæсгай кусджытæ æмбырд кæнынц, нефть кæм ис, уыцы тæнгъæд.

Информацион агентадты

 хъусынгæнинæгтæм гæсгæ