2019 азы Цхинвалы районы Ирыхъæумæ хæстæг цы бронкалæн полигон арæзт æрцæудзæнис, уый социалон хызæгты нырма дæр бирæ быцæуттæ расайы. Политикон парти «Адæмон парти»-йы уæнгтæ ног брондон саразыны фæдыл æвдисынц сæ тыхстдзинад, ома, дам, хуыздæр уаид бронсудзæн завод саразын. Стæй полигон кæм арæзт цæуы, разы не сты уыцы бынатыл дæр, хæстæг у цæрæн пункттæм, зæгъгæ.
Фарстыл ноджыдæр æруынаффæ кæныны нысанæн нæ республикæйы Æхсæнадон палатæйы ауагъд æрцыд тымбыл фынг. Ардæм фæхуыдтой республикæйы Сæйраг санитарон дохтыр Коцты Маринæ, горæты мэры хæдивæг Пухаты Димитр æмæ Цхинвалы районы администрацийы сæргълæууæджы хæстæ æххæстгæнæг Бибылты Валерийы.
Тымбыл фынгмæ хуынд æрцыдысты республикæйы архайæг политикон партитæ се ‘ппæт дæр, фæлæ дзы хайад райста æрмæстдæр «Адæмон парти»-йы уæнг Къуезерты Арсен.
Æхсæнадон палатæйы сæрдар Коцты Руслан æрдзырдта Инвестицион программæйы фæлгæтты Ирыхъæуы цы хъæбæр брæтты полигон арæзт хъуамæ æрцæуа, уый проектыл. «Ныртæккæ горæтæй брæттæ кæдæм ласынц, уыцы иунæг брондон ис Къусреты хъæуы. Броны полигон тæссагдзинад хæссы цæрджытæн. Уымæн æмæ хъахъхъæд нæ цæуынц санитарон нормæтæ. Цæрджыты æнæниздзинад тыхсын кодта нæ Президенты æмæ уымæн скъуыддзаг æрцыд ног полигон саразын. Уыцы хъуыддагмæ рагæй бæллыдысты нæ республикæйы цæрджытæ. Фæлæ та фæзынд ахæм адæймæгтæ, кæцытæ сæ претензитæ сæвæрынц социалон хызæгты. Ныр мах æрбамбырд стæм, цæмæй нæ алчидæр йæ хъуыды зæгъа», – бамбарын кодта Коцты фырт.
Горæты администрацийы сæргълæууæджы хæдивæг Пухаты Димитр куыд загъта, афтæмæй полигон арæзт æрцæудзæн нырыккон домæнтæм гæсгæ, дзуапп дæтдзæнис æппæт нормæтæн дæр. «Цæрджыты тыхстдзинадæн нæй бындур. Уымæн æмæ полигон цы 12 гектар зæххы фадыгыл арæзт цæуы, уым проектмæ гæсгæ арæзт æрцæудзæнис 2 брондоны 2 гектар æмæ 400 метры гидроизоляциимæ. Дренажон системæ фадат дæтдзæн чъизи буарыгъæдтæ фæрсудзынæн. Цæмæй полигонмæ цы брæттæ ласт цæуа, уыдон дымгæ фæйнæрдæм ма фалгæрон кæна, уый тыххæй та брондоны алфæмблай арæзт æрцæудзæн 4-5 метры бæрзæндæн æмбонд. Полигонæн йæхи алыварс дæр уыдзæн дыууæ метры бæрзæндæн æмбонд. Проект куыд амоны, афтæмæй æмбонды алфæмблай сфæлындздзысты цъæхда-рæнтæй.
Хъæбæр цардуагон брæттæн полигоны фарсмæ арæзт æрцæудзæн брикетгæнæн системæ, ома, брон хъуамæ цæуа æвзæрст, уый фæстæ цæудзæн пресгонд æмæ афтæмæй ныгæд цæудзæнис полигоны. Ацы мадзал рог кæндзæн брондоны æндæвдад цæрджытыл æмæ æрдзыл. Хъæбæр брæттæ æвзæрст кæй цæудзысты æмæ уый фæстæ та брикетгонд, уый тыххæй æрдзæн ницы зиан хæсдзæн, брикеттæ æвæрд цæудзысты котлованты, цыран цæудзысты гидроизоляци. Ахæм пресгонд брон практикон æгъдауæй у æдас. Æндæр хъуыддаг у ныры брондон кæм ис, уый. Уый экологион тæссагдзинад хæссы цæрджытæн, афæдзы алы афон дæр. Стæй алы полигонтæн дæр ис сæхи рæстæг. Ногæй цы полигон арæзт æрцæудзæн, уый арæзт цæуы 25 азы æмгъуыдмæ», – дзырдта Пухаты Димитр.
Республикæйы Сæйраг санитарон дохтыр Коцты Маринæ куыд зæгъы, афтæмæй проектмæ гæсгæ, Хуссар Ирыстоны территорийыл цы полигон арæзт æрцæудзæнис, уый дзуапп дæтдзæнис санитарон нормæтæн. «Фидæны полигон арæзт кæм æрцæудзæн, уыцы бынат, цæрæн пункт Присæй у 2,5 километр дæрддзæф. Го-рæтæй та 4,200 километр. Санитарон нормæтæ та амонынц, цæмæй æввахсдæр цæрæн пунктмæ полигон ма уа 500 метрæй хæстæгдæр. Полигон аразыны размæ экспертизæ арæзт æрцæуы бынатæн, стæй зæххæн. Уыцы мадзæлтты рæстæджы проектаразæг раиртасы ацы бынаты грунты дæттæ ис æви нæ. Уый тыххæй геологион куыстыты рæстæджы зæхх ныкъахдæуыд 2,5 метры бæрц».
Коцты Маринæ ма дзырдта, ахæм полигонтæ алы районы дæр кæй хъуамæ æрцæуа арæзт. Уымæн æмæ брон ласын зынаргъ хъуамæ ма лæууа комуналон хæдзарадтæн.
Бронсудзæн завод саразыны тыххæй республикæйы Сæйраг санитарон дохтыр афтæ зæгъы: «Фыццаг рады рафæлгъауын хъæуы, завод цы профилы уыдзæн, æф-сæйнаг æмæ пластик донгæнæн, макулатурæ судзæн æви æрдзæн æмæ адæй-магæн стыр зиан чи хæссы, ахæм сыгъд лампочкæтæ æмæ батарейтæ чи дон кæны, ахæм. Уыцы практикæ нæй нырма Уæрæсейы Федерацийы. Уымæн æмæ уыцы заводтæ аразын лæууынц тынг зынаргъ. Цард размæ цæуы, чизоны махæн дæр кæддæр нæ уавæртæ хуыздæр уой. Абон уал та æнæмæнг хъæуы саразын полигон. Æз бузныг дæн Бибылты Анатолийæ, сæрмагондæй уый кæй аскъуыддзаг кодта бирæ азты дæргъы республикæйы цы фарст тыхсын кодта, уый».
Политикон змæлд «Адæмон парти»-йы минæвар Къуезерты Арсен та йæ катайдзинад æвдыста полигон Цхинвалы районы хъæутæ Дменис, Сатихъар æмæ Хелцуамæ æввахс арæзт кæй цæуы. Брондонæй, дам, цы æнуд тæф цæуа, уый дымгæ хæсдзæн ацы хъæутæм.
Фæлæ лæмбынæг куы базонгæ полигоны проектимæ уæд йæ хъуыды фæивта æмæ сразы иннæтимæ.
Уазæгты Марфа
Comments are closed, but trackbacks and pingbacks are open.