28-æм марты нæ республикæйы уæвæг Æппæтадæмон организаци «Сырх Дзуар»-ы комитет хæстон конфликты азарæй æбæрæгæй чи фесæфт, уыдон бинонтæн сорганизаци кодта экскурси.
Паддзахадон университеты музейы комплексы райзæрдæйæ сæмбæлдысты уазджытыл. Музейы директор Касаты Фатимæ райдианы радзырдта музейы къухдариуæгад ХИПУ-йы ректоримæ иумæ кæй архайынц, цæмæй райгуырæн къуыммæ уарзондзинады æнкъарæнтæ алы адæймаджы зæрдæмæ бахъарой: «Музейы алы экспонат дæр у цæуылдæр дзурæг. Æмткæй экспонаттæ нын аивæй дзурынц, куыд цардысты нæ рагфыдæлтæ, цахæм уыдысты ивгъуыд рæстæджытæ. Нæ ивгъуыд куынæ зонæм, уæд нæ сомбон куыд сараздзыстæм. Хъуамæ фидарæй зонæм, кæцæй рацыдыстæм æмæ дард-дæр нæ фæндаг кæдæм у, уый».
Уазджыты базонгæ кодтой музейы комплексы æртæ залимæ дæр: зоологи, этнографи, бæстæзонæн, ирон хæцæнгарз æмæ аивадон равдысты хайадтимæ. Уыимæ иумæ сын радзырдтой не ‘мбæстæгтæй бирæтæ кæй баххуыс кодтой зынаргъ экспонаттæй музейæн. Зæгъæм, Зонкъары æвæрд хъæды директор Бестауты Анатоли музейæн балæвар кодта Хуссар Ирыстоны фаунæйы уникалон экспонаттæ – мæргътæ æмæ цæрæгойты быдыргътæ. Æндæр æмбæстаг Козаты Нодар та музейæн радта Наполеон Бонопарты рæстæгæй французаг æвзист дзыппыдарæн сахат, Уæрæсейы империйы æвзист æхцатæ, советон автомашинæты макеттæ. Археологон экспонаттæй та сын баххуыс кодта Зонад-иртасæн институты директор Гаглойты Роберт. Рагон ирон националон дарæс та музейæн радта Четион Майæ.
Музейы къухдариуæгад бахатыд уазджытæм, кæд æмæ дам, искæмæ ис музейы фонд чи баххæст кæна, ахæм æрмæджытæ, уæд сæ, ма бавгъау кæнут музейæн. Экспонатæн, дам, æрцæудзæн арæзт сæрмагонд зонадон паспорт, йæхи фондон карта. Йе ‘рбахæссæджы ном та, дам, хаст æрцæудзæн музейы комплексы цытджын æрбацæуджыты чиныгмæ.
Æбæрæгæй сæфт адæймæгты бинонтæ стыр цымыдисимæ æрзылдысты музейыл. Уæлдай тынгдæр цымыдис кодтой эскизты рагон Цхинвалы хуыз æвдисæг нывтæм.
Уый фæстæ та музейы уазджытæ бабæрæг кодтой университеты «ЮОГУ-ТВ»-йы студи. Ам уазджытыл рæдауæй сæмбæлд студийы сæргълæууæг Джиоты Аллæ, базонгæ сæ кодта сæ архайд, сæ куыстимæ. Сабитæн фадат радта корреспонденттæй сæхи бафæлварынæн. Уыдон кæрæдзийæ интервьютæ истой æмæ университеты уæвгæйæ цы тæлмæнтæ райстой, ууыл ныхас кодтой сæ къухты микрофонтæ, афтæмæй.
УАЗÆГТЫ Марфа
